ABORTION (NAU THLAKNAK)

Tongfang hmeltheihnak,

Kan ram uknak khal a tha so vivo thlangih mipi in ramkhelh thuhla zalen zetin kan rel ngam ve thlang. Sinan, khawthim memmem lak ihsi khaw-eng hmu hruak kan si ruangah theihnak tawdam kan tlasam nasa. Ca kan vun siar tinte’n tongfang thar kan tong leuhleuh, a mik a mak rak theih dah lomi an si cun thinlungluhnak a mal duh zet.

Radio ngai, thuthang siar, cabu siar, titi thunuam relnak tivek khalah miin political tongfang lamdang deuh an run sal hin kan hlo tum mai. Politics lawngah a si lo, zirthlurhnak dang khalah tongfang pakhat hin anmah zawnte cio ah duhsan bulce an rak nei vivo. Cumi thei lo cun kan casiar man a hla thei lo.

Ka hawl bantawk tete ramkhelh tongfangpawl (political terms), A, B, C,… ti’n dictionary vekin a sangsangte’n run ngan vivo ka tum ding.

Abortion

(Nauthlak Siannak)

Nitlaknak ram lamah politics khawvel ih elawknak thuhla buaibai zet suaktertu pakhat a rak si. Milai pakhat ih bulpak duhhril theinak le Christian sakhua zirhnak karlak ih khitawknak tumpi a si fawn. Soviet Union tiih kan rak kawh theumi USSR (Russia) ram tivek ahcun sakhuanak an lavawng tuk loih tluang zetin an hmang thei mai. Nau hmehthlak hi fahrin tamtuk ding suatnak(birth control) hrangih hmanmi cindan pakhat a si. Nitlaknak ram lamih an el-buaiawknak san pahnih in a um.

A pakhatnak cu minu pakhatin fahrin a duh maw duh lo timi ah a bulpakin thubawhcat theinak vo nei ve ding ti hi a si. Cucu milai pakhat ih khuarel canvo(natural rights) lakih pakhat a si ve tiah an ruat. Khatlamah, a suak hrih lomi naute cun milai pakhat si ve dingih canvo a nei ve timi a rak um fawn. A pahnihnak cu Roman Catholic sakhuanak in rampi daan le dun ah huham na tak a rak neiih, RC daan ahcun nauthlak cu a zarh fawn. Italy, Ireland tivek Roman Catholic hliahkhuh rampawl ahcun nauthlak cu daan in a siang lo bembem. Kan ram daan khalah, nunhar ruangah maw duh hrim ruangah maw, nauthlak an um a si ahcun sualbuar daan pukma 312 vekin kum sarih tiang thawngthlak simaw, sumfai ih cawhkuan simaw, asilole hremnak a pahnih khal a si thei. British ahcun 1968 kum ihsin nauthlak siannak daan an tuah.

American ram vethung ahcun nauthlak siannak thuhla hi a sosangbik mi thubuai a tling ban. 1974 tiang cu nauthlak theinak thu thlawn pehparin federal daan a rak um lo. (Federal daan timi cu ramthen pakhat cio ih mah le daan an neih celcel mi tlunah rampum huapih thlun tlang vualvo dingmi daan a si.) Mah le ramthen cio ah a cuk a pak le remti dandan ih rak hman men a si. 1973 kum ah Tlangsuak Thuthenzung sangbik in Rose V. Wade ih thubuai a relcatsak hnu ihsin federal daan ah a rung tel fang.

*Sanzul daan tuahmi ciocio hmanah leitlun ram dangdang kan bangaw lo celcel thluh. Zalen zetih siang an tam laiah, fifik tak le ralring fahranih daan tuah ram an tam zet ve. Thimnak ah ram hnihkhat kan vun bih duak pei. East Asia Ram Hrekkhat ih Nauthlak Siannak Dinhmunpawl (1,2,3,.. tivek hminsinnak ih sullam cu table hnuaiah simfiangnak a um)

Ram hmin      1          2          3          4          5          6          7

Brunei           Yes     No       No       No       No       No       No

Cambodia     Yes     1st       1st       Yes      Yes      1st       1st

China            Yes     Yes     Yes      Yes      Yes      Yes      Yes

Hong Kong   Yes     2nd     2nd      2nd      2nd      No       No

Indonesia      Yes      No       No       No       No       No       No

Japan            Yes      Yes      Yes      Yes      Yes      Yes      Yes

North Korea Yes      Yes      Yes      Yes      Yes      Yes      Yes

South Korea Yes      Yes      Yes      Yes      Yes      Yes      Yes

Laos   No      No       No       No       No       No       No

Malaysia       1st       1st       1st       No       No       No       No

Mongolia      R         R         1st       1st       1st       1st       1st

Myanmar      Yes      No       No       No       No       No       No

Philippines   Yes      No       No       No       No       No       No

Singapore     Yes      2nd      2nd      2nd      Yes      2nd      2nd

Thailand       Yes      Yes      Yes      Yes      No       No       No

Taiwan         Yes      Yes      Yes      Yes      Yes      Yes   Fiangfel lo

Vietnam       Yes      Yes      Yes      Yes      Yes      Yes      Yes

1 = Nui’ nunnak hmu dingah

2 = Taksa tontaih ruangah

3 = Thinlung lam damcak lo

4 = Pawngsual/sualpi mi nunau

5 = Thihp tham natnak ruangah

6 = Nunhar ruangah

7 = Nu ih ngennak ruangah 

1st =  zarhkar malte siar lawng pai mi naute (pum sungih nau note lai)

2nd =  zarhkar siar tma deuh pai zo mi naute (hrin cu naih hrih lo)

R = daan cun a kham ih thuthencat dan ah a thumaw

# Ziang san le vang ruangah ti um loih nauthlak siang viahviah rampawl cu China, North Korea, South Korea, Japan,  Vietnam, Bahrain, Iceland, Netherlands, Spain, Sweden, Albania, Belarus, Bosnia and Herzegovina, Bulgaria, Croatia, Czech Republic, Georgia, Hungary, Latvia, Lithuania, Macedonia, Montenegro, Russia, Serbia, Slovakis, Slovenia, Turkey, Ukraine,  Canada, United States tipawl an siih, adang hmuahhmuah ruangah sun nauthlak siang na’n Nui’ ngennak ruangih siang lo rampawl cu United Kingdom (Northern Ireland tello in), Taiwan, Israel, Lebanon, Moldova tipawl hi an si ve.

written by 

JC Kip Ling (Klirlungz)