US President-elect Donald Trump chu TIME Person of the Year 2016 atan thlan a ni.Kum 70 mi, Trump hi US President 45-na tura thlan tlin a ni a, nakkum January thlaah lakluh a ni ang. Time magazine hian Person of the Year candidate mi 11 thlang chhuakin, an zingah hian inthlan dawna Trump-a khingpui Hillary Clinton-i leh India Prime Minister Narendra Modi te pawh an tel. Person of the Year first runner-up-ah Clinton-i thlan a ni a, online readers poll-ah Modi chuan a hmu sang ber thung.
US President Barack Obama chu president-a thlan tlin a nih hnu, kum 2008 leh 2012-ah Person of the Year atan hian thlan a lo ni tawh a, kum 2000 leh 2004 khan George W Bush thlan a ni a, kum 1992 khan Bill Clinton thlan a lo ni tawh bawk a ni.
Kumina Person of the Year thlan tur chhawpchhuah zingah hian Trump leh Clinton-i bakah American dang pathum an tel a, ṭum li Olympic gold medalist lo ni tawh Simone Biles, zaithiam Beyonce Knowles leh Facebook founder Mark Zuckerberg-te an ni.Germany Chancellor Angela Merkel-i chu nikum khan Person of the Year atan thlan a ni a, Trump hi runner up a ni thung.
Time magazine hian kum 1927 aṭang khan kumtin Person of the Year hi a thlang a ni. A tirah chuan Man of the Year tia vuaha ni a, a hmasa ber atan Charles Lindbergh thlan a ni a. Kum 1999 khan Person of the Year tia thlak a ni ta a ni.
See more at: http://www.vanglaini.org/khawvel/64655#sthash.GtIDDnaJ.dpuf
http://www.bbc.com/news/world-us-canada-38238892
