• Mi na ṭanpi asi hmanah milakah an hmin, an sinak le dinhmun sem ṭheu awhlah. Na bawm asi ahcun bawmtop men awla, atheitu diktak asimi Pathian cun athei ding ti hi zumtop aṭha sawn.
• Zokhal na ṭanpit hlanah an ṭulmi ngaingai na pek theihnak dingah le na tuahsak theinak dingah ṭhaten ruat cimciam hmaisa ta ṭheu aw.
• Zokhal in bawm ding an ṭulnak zawnih ṭanpit dingih kut an lo dawh asi ahcun, beidongin umter hlah. Na titheilo dingmi ṭanpit an lo dil asi khalah na bawm theilonak ding san fiangtein sim thei zuam ṭheu aw. Bawm ding vekin na sim ih na bawmthei leh si lo ahcun, an thin na tina sawn pang ding.
• Midang hrangih mithluasuak kan si theinak hi tangka pek tivek le thil dangdang pek timen lawng hi asi men lo, hnemawknak ṭongkam thlumte tivek an mangbang vansan lai caanih an kiangih kan rak umpi khal hi arak huap ṭheh si.
• Midang hrangih malsawmnak kan si theinak ziindang lala cu, an ziin kan khamsak lo, buainak kan pek lo ding hi kan theih aṭha. Miṭhenkhat cun ṭanghmasial zet leh mai hmaikhua lawng ruatin midang fehnak ding ziin kan rak kham hrim ṭheu. Cukvek nunnei cing cun mihrangah malsawmnak, mithluasuak kan si thei dah lo ding.
Note: Midang hrangih siangzet leh uilo zetih kan pek le kan tuahsak tikah, kan mah riangri kan lung a awi hleiah kan nih Pathian mifateih kan tuah dingdiktak sawn khal arak si, asan cu, kan biak Pathian in Amai roriih arak tuahmi le akehneh thluntu dingih hrilmi kan si timi hi hngilh siang lo tein midang hrangih malsawmnak kan si theinak dingah ṭhatsuah cuh sinsin usih. Thilṭha tuah dingih rundammi kan si(rawngbawl dingih rundammi kan si). Bawipa'n lo hrusiseh awsehla, mal lo sawm ko seh.
