Upa (Deacon) timi holhfang asullam:

Deacon timi holhfang hi Greek holh ‘Deaconos’ timiin arami asi, asullam ngaingai cu ‘rianṭuantu’ tinak asi, cucun pakhat cu ‘sal’ tinak asi. Curuangah amin sullam bantuktein Khrihfabu le Pastor cungah nawlngeitu le uktu si loin rianṭuan piaktu Pathian sal an si ti cu afiang. 

Kan ruahsual tawnmi le kan fian tawn lomi pahnih aum mahhna cu:

     1) Khrihfa Upa hi mipi le  Khrihfabu apehtlaihtertu an si

     2) Pastor hi Thlaraulam lawngah hruaitu, hohatu an si i, upa nih i uknak leilam an tlaih...timi hi an si.

An lakmi le an i hngohchanmi Bible cang cu Acts 6:1-7 asi. Hi Bible ca hi Greek cun ‘Chreia’ timi in arakmi asi i, asullam cu ‘Rian’ or ‘herhmi’ tinak khi asi. Biakam Thar chungah hin (46) acuang, Acts 6:1-7 ah ‘Rian’ tiin a chim nain adang (45) ahcun ‘Herhmi’ tiin ai ṭial.

Curuangah cun, hi Acts 6:1-7 i, mi pasarih 7 atimi hi Ahnungzultu dingah athimmi an si. Khrihfabu Upa ‘Deacon’ ti zongin a ṭal lem lo, khuacan ahung sau deuhdeuh tikah Khrihfabu chungah sinak le dinhmun pakhat bantukah kan van canter cawpmi asi.

Cun Biakam Thar Khrihfabu hmaisabikah A hnungzultupawl hi Thlarau lei le uknak leiah phunhnih ah ṭuanvo neitubik an si. Upa hi bawmtu an si tiin Acts 6:1-7 i, mi pasarih 7 zoh in kan chim khawh. Greek ‘Deaconos’ sullam zong nih anemhngeh chih fawn. A nawlngeih zawngin si loin tangdortein ‘sal’ bantuktein Khrihfabu le Pastor bawmtu ding Pathian ‘sal’, Pathian thimmi an si.

#Note: (Base on the article of the pastor and his wife)

Zumtu nih sual atuah tikah Zeitin dah si lai??

Zumtu mipiangthar pawl hi sualnak neitilomi le kan tlamtling khitkhet cang tinak asi nemmam lo. asinain, hi vawlei sualnakram, Setan uknakram ahhin zumtu nihcun Pathian hmurka chuakmibia hmangin (Sam 119:11), Jesuh thlacam piaknak thawngin (John 17:15, Heb 7:25) le Thiangthlarau bawmhnakin sual lo tein um khawh asi. Zumtu nih sual atuahtikah acungah zeidah aphan lai timi hi Bible hmangin van zoh hnik usih:

Zumtu nih thilsual atuahtikah a Khamhnak atlau maw?

Pathian fa sinak cotu mipiangthar taktak, khamhnak thawngṭha aco cangtu nihcun a khamhnak atlau kho lo. Zungzal nunnak hi fawi le bai i tlau kho sawhsawhmi asi lo.

1) Pathian biakam asi, John5:24, Rom 8:29,30

2) Pathian huham ruangah, John 10:29, Rom 4:20, 2Tim 1:12

3) Pathian dawtnak ruagnah, Rom 5:8-10, John 3:16

4) Jesuh thlacam piaknak ruangah, John 17:9-11, 20, Heb 7:1-2

5) Thiangthlarau seal hmelchunhnak atlau kho bal lo, 1Kor 1:22, Efe 1:13

6) Thlarauthianghlim cencilhnak atlau kho bal lo, 1Kor 1:22, Efe 4:30

7) Nunnak cauk chungi minṭial cangmi ka phiatṭhan ti lai lo ati, Phungchimtu 3:5

Zumtu nih thilsual atuahtikah

1) Pathian he i pehtlaihnak acat, Isa 59:1-2: 1John 1:8,9. Zumtu nih thilsual atuah asi ahcun Pathian fa asinak (Akhamhnak) cu atlaulo nain,Pathian he kan i pehtlaihnak cu ai rawk kho, acat kho. Pathian lungtong siangpahrang David zong kha kan zoh asi ahcun, Sam 32:3-5:51 Pathian he an i pehtlaihnak airawknak kan hmuh khawh.

2) Lomhnak atlau, Sam 51:12. David nih Pathian sinah nakhawmhnak lunglomhnak cu ka pe ṭhan tiah ati. Zumtu nihcun Pathian he i pehtlaihnak ṭha aneih tikah lunglawmhnak, lunghmuitakin hlasaknak, Bible rel le nuamhnak, khawmhnak nuamhnak tbk pawl hi an nunah aum. Thilsual atuah tikah cupawl cu an tlau dih. Sam 51 hi kan rel asi ahcun David sualnak atuah ṭum i, a ṭah aihramnak aw asi.

3) Athlacamnak Pathian nih ape ti lo, Isai 59:1,2: Sam 66:18

4) Anunah Thiangthlarau bomhnak atlaniam. Zumtu nih apianthar le cangka tein acomi Thiangthlarau hi zeitik hmanah azam bal lo. Zumtunih sual atuah tik zongah azam hlei lo nain, angaih achia kho. Rian aṭan kho lo, Efe 4:30, 1The 5:19. Sualnak ruangah zumtu nihcun akhammi ka si atingamnak tiangin atlauter khawh. Akhamhnak tiang hmanhin amah le amah i zumhngamlonak tiang hmanh aneihter khawh. Thiangthlarau uknak le lamhruainak zong atlau.

5) Thlarau tlau zaangfahnak le Thlarau huham aneihmi zong atlau. Zumtu nih sual atuah tikah acungi kan vantarmi thil 5 pawl khi chikkhat teah an tlau kho. Asinain,  asual aphuan i, Pathian sinah arauh hlanah akirzau asi ahcun Pathian he an i pehtlaihnak zong atharin aṭhain acak kho ṭhan, cuti kan ti asi ahcun taksa lei lawng si loin thlarau lei zongah thlawchuahnak kan don khawh ṭhan( 1 John 1:9). Thilsual tuah zumtu nihcun a sualnak i chir duh loin, sualnak chung aluhthuk deuhdeuh asi ahcun acungah thil ṭihnung aphan chinchin lai.

Zumtu cu sual chungah aluhthuk deuhdeuh asi ahcun:

1) Pathian nunchimhhrinnak atong lai, Heb 13: 1-5. Pathian nih afale taktak cu nun a chimh tawn hna. Piangthar aiti ṭungi, suallakah ai ciah, aibualh thotho asi ahcun acungah Pathian chimhhrinnak aum lo, alangh lo asi ahcun, Pathian fataktak asi lo tinak asi. Mah cu chinhrimnak cu: zawtnak zawng asi kho (1Kor 11:30, James 5:13-16), tlakchiatnak, accident tonnak tibantuk maw, chungkhar buainak le tisa phungin tlakchiatnak aphunphun zong asi kho.

2) Zumtu Khrihfabu lakin remlonak, dawinak  1Kor 5:4, 5, Matt 18:17. Sualtuah pengmi zumtu cu Khrihfabu chungin dawi uh tiah Bible nih akan ti. Pathian he an i pehtlaihnak acah hnuah, zumtu minung he an i hawikhawmhnak acat chap rih fawn. Asualnak ai ngaihchih i Pathian he an i pehtlaih ṭhan khawh asi ahcun Khrihfabu chungah luhter ṭhanawk an si tiah Bible nih a kan cawn piak.

3) Taksa thihnak--- 1Kor 11:30b, 1John 5:16. Sualtuah zumtu Pathian sinah kir duh lomi cu avawlei tisa nunnak alak piak lai. Vanramah laksawng hmu loin a um lai. Culawng si loin Pathian fate zumtu sualtuahnak ruangah atefachin tiangin chiatserhnak an cungah aphan kho Exod 20:5,6. David nih Uriah nupi asualpi ruangah atheitlai pawl cu:

1. Afapa athi (2Samuel 12:15-19)

2. David fanu Tamar kha David fapa Amnon nih asualpi (2Samuel 11-14)

3. David fapa Absolom nih David fapa Amnon nih athat, (2Samuel 13:28:29)

4. Absolom nih apa David that dingin a dawi, (2Samuel 15:1-37)

#Note: David nih asual theitlai hi amah lawng nih azunloh. Chungkharah zumtu pakhat sualnak ruangah buainak aphan kho. Pastor sualnak nihcun Khrihfabuah buainak, tuarnak zong aphakter khawh. Siangpahrang Jehosafet sualnak nihcun atufa tiangin an tuar. Afapa le atupa, an pahnih in zumlotu, Pathian huat zawng tuahtu ah an hung i cang. Zumtu unau nanunnakah Pathian duhlo zawng thil a um ti na theih asi ahcun arianran khawh chungin Pathian sinah na sualpalhnak pawl cu phuangin ngaihthiam hal zaukhawh i zuam( 1John 1:9).

Saya Sui Lian Mang