Sunglawi ropi tatakin tuanbia an rak ttial cangmi cu tuanbia dang nih avan khuhdiam hoi ṭhan ai, tuanbia hlun cu chiahtakin tuanbiathar nih avan khuh diam hoi ṭhan cang. Miropi le cuanghmuar pawl nih an thiamnak le mihleiluat an sinak cu avan pholangh hoi ṭhan ko! mithiam le mi hlawhtling an van tam chin lengmang fawn. Ni 16 chungte ahcun ram dangdang (207) lakin lente aicelhmi 10,000 reng lo nih Rio Olympic 2016 ah gold medal (306) an i cuhnak tuanbia te hi ngaihnuam avatling hringhran dah!!
Zohtu an karh:
Khuathlanglei thangzamhtu pawl nganbik lakin pakhat asimi BBC nihcun Rio Olympic kha vawleicung mipi zohkhawh dingin an tuah. BBC kaltlang in TV- ah vawleicung hmun khuazakip in (million- 45.24) hrawngnih an zohtlukin tuak asi. Ahlan ahcun FIFA World Cup asi loah European Championship si maw siseh hitlukin zohtu an tam hi BBCnih an tong bal lo ti asi. Internet leiin zohtu zong an karh chinchin caah BBC website lenkhawhnak aphunphun computer, phone, tablet le a dangin arak zohtu zong hi UK-ah lawnghmanh ahhin ( million- 68.3) hrawng an si pinah vawleicung pumpi huapin van cawhrual ahcun (million- 102.3 ) an tling ti asi. Mahhi zawnte zong hi record thar cu asi. ''The greatest show on Earth" tiin min an bung zong hi khuaruahhar zong asi hlei loh! Aphu ve hrim ko.
US ttheuttheu hi an si ko:
Pakhatnak US nihkhan gold medal 43 an lak caah, akum zawnin an champion bakah Olympic ah pakhatnak a ṭum 17 si kho hmaisacem an si. Kum 1984 ah khan Los Angeles-ah US nih medal 174 an rak lak, mahhi ṭum ti loh ahcun tukum medal 116 an lakmi hi a tamcem ṭum a si rih. Olympic tuanbia ahcun US nihhin ahleicein boruakthacem an si, gold 1,022 an lak cang, cucun anmah naihcemtu Russia nihcun 395 an lak ve cang, pathumnak cu gold 261 latu Britain an si thung.
Record thar pawl cu:
Rio-ah hin archery, athletics, modern pentathlon, track cycling, shooting, swimming le weightlifting lakin world record thar 27 bak tuah tthan asi. American tihleuh thiam mingthang Ktie Ledecky- nihcun 400m le 800m freestyle-ah record thar a tuahmi cu langsarzual pawl asi fawn. World champion Pole Anita Wlodarczyk nihcun nu hammer throw-ah amah record rak tuahciami lonhin 82.29m tluk hla ahlonh khawh caah - record thar a tuah khaw tthan. Kum 1999 ahcun Sevilla-ah khan Michael Johnson nih 400m world record a rak tuah, kum 17 chung lengluang alonh khotu an um bak loh. South Africa tlangval Wayde van Niekerk nihcun second 43.03 chungah Johnson- cu a lonh caah, Johnson rak tuah ciami record cu second 0.15 in van lonh diam ai!.
Sulhnu ṭhapawl:
*Japanese artistic gymnast Kohei Uchimura cu kum 44 chunga gymnastic all-around title neitu asi khotu hmaisacem asi, an rampiin an champion pi fawn.
*South Korea nihcun thalkah (archery) ah gold medal pali cu a voikhat nakah ahui viar ai! Olympic hnuhnung pawl pakua lakin mahhi lentecelhnak ah gold medal vialte 36 lakin 23 bak an lak khawh, mahhi 76.67% thling kho mi an si.
*Great Britain long distance runner Mo Farah nihcun 2012 ahkhan London-ah a rakti cang bantukin 5,000m le 10,000m-ah gold medal alak. Finland tlangval Lasse Viren nihcun mahhi lentecelhnak pahnih ahhin kum 1972 ah Munich le 1976 Montreal-ah a zawnzawnin gold medal a raklak cang fawn, anmah pahnih lawng hi hibantuk dinhmun luahkhotu um chun an si.
*World number 2 Andy Murray nihcun Man single tennis final-ah Juan Martin del Potro cu atei caah amah lawng hi Olympic Man tennis ah gold medal voi hnih azawnin alatu um chun asi.
*Jamaica sprinter Elaine Thompson cu kum 28 chungah 100m le 200m gold medal lakawp khotu hmaisabik asi. Kum 1988 Seoul ahkhan Florence Griffith-Joyner nihcun hibantuk dinhmun hi arak luahbal cang.
Note: (Base on Vanglaini News)
