Mi pakhat nih hin vanramah arak leng i. Vanram tuallaiah a va cuahmah lio ahcun Jesuh he cun ruah lopi ahcun an i tong thut ai, Jesuh nih cun, “Unaupa. Ra tuah, lei i minung pawl khi kan hmuhsak tuah ngat lai” tiah aban cun a hruai i vawilei cu a hei zoh tik ahcun Pathianni(Sunday) cu arak si, mi tampi cu i khawm ding cun biak leiah an panh thliahmah lio hna cu a hei hmuh hna ti asi. Biakinn chung i a thil hmuhmi pawl cu a khuaruah hi a har tuk hringhran. Hi tihin maw Pathian hi kan rak thangṭhat vet awn minung pawl nih hin tiin poi ti ngai cun a ṭang ai cum ti asi.
@ Piano tumtu le awnmawi tumtu pawl nih cun an awnmawi hmangin hla an hruai hna lio cu a hmuh hna ti asi, asinain an awnmawi tummi thawng cu ka thei kho hna lo.
@ Ai khawmmi pawl hla an ṭhupmap ko, asinain ahlasak thawng zeihmanh ka thei kho hna lo, an hlasak thawng theih ding hi pakhat hmanh a um lo ti asi.
@ Thawngṭhabia chimtu nih cun ṭhahnem ngaiin Pathian thawngṭha cu a aupi cuahmah lio zong a hei hmuh tikah a kaa angin a aw zeihmanh theih ding a um lo ti asi fawn.
@ Thla an cam i, asinain an thlacam thawng hi pakhat te hmanh theih ding a um lo ti asi.
A khuaruah a har tuk ahcun Jesuh sinah, “ Bawipa, zeiruangah dah an awnmawi tum mi pawl siseh, an hlasak thawng zeihmanh ka theih khawh lo, an thawngṭha chimmi le zeihmanh theih khawh asi lo?, ti i a hal tik ahcun, JESUH nih cun zeitin dah a leh ti ahcun, “ Na theihkhawh lo nak chan cu, thinlung le tihtakthlak tel loin an thangṭhat lo ruangah asi khi” tiah tlangval pate sin ahcun a chimh. “Cucun, thinlung chung muril le tihtak thlak in an thangṭhat ahcun na theih khawh hrimhrim hna lai tiah a van ti fawn. Cu bantuk i an tilo ruangah asi khi an thangṭhatnak hlasaknak cu a nung kho lo i, an thlacamnak pawl zong cu anung kho lo, cun an thawngṭha chimh zong theih khawh an silo” . tiah Jesuh nih cun tlangval pate sinah a chimh ti asi.
.jpg)
Cuti asi ahcun, kan nih anung Pathian biatu ti i, aa chaltu vialte nih kan biakmi kan Pathian hi pathian sawhsawh asilo ti cu fiangtuk in a theitu kan si, asinain hikaah hin kan hmuh khawh mi cu, Sunday tinte in Biakin pelh loin ai khawm zungzaltu pastor, khrihfa upa zong kan si ko hnga, asinain Pathian hna ah thei kho ding tiangin a phan kho lomi thangṭhatnak asi kho mi asi tihi kan theih apoi mawh tuk hringhran. Zeibantuk thangṭhatnak khi dah Bawipa theih khawh dingmi thangṭhat cu asi ti ahcun kan van chim cang bantuk khan, TIHTAK THLAK NGAI I THANGṬHATNAK lo cun kan rak thangṭhat nak menmen hi Bawipa hna ah a rak phan kho tawn lo tihi kan theih a herh tuk mi asi. Kan mah le pulpak cioah kan bia halnak ding i van tarlanh ka duh mi cu: Cu ti asi ahcun Pathian bia dingin kan i khawm tawn hi teh vanram khin an rak thei kho ve hnga maw?? Kan thlacam nak le kan thawngṭhabai chimnak pawl hi teh athawng theih ding a um ve hnga maw??
.jpg)
Pathian bia chim lo, vawlei lei thil hmanh ah kan duhmi le ngah kan duhmi lak ahcun heh tiah kan thazaang neih diklak hmanh in chuah kan i huam asi lo maw kha, cuti i, vawlei thil hmanh ah cuti fako i, tihtak thlak chuah kan i huam ahcun anung Pathian kan biakmi hi a phung men i biatu kan si ahcun kan tifuh lai lo. Hiti i a phung men i Bawipa kan thangṭhat ve sual asi ahcun vanram kan phak tikah Jesuh biaceihnak hmaiah nan nih kan thei hna lo, timi lak i ai tel dingmi kan si tihi kan theih cia a hau. Curuangah kan thangṭhatnak awle, kan tuahsermi pawl hi Bawipa theipi mi le a theihkhawh dingmi an si khawh nak hnga tihtak thlak te i kan tuah, kan ṭuan, kan biak a herh. Bawipa theih kahwhmi zumtu, thangṭhattu kan si cio khawh nak hnga Bawipa thlaw kan chuah piak ko seh.
Matthaia 15:8 – ah van zoh hnik u sih, “Hi mi hna nih hin an kaa lawngin an ka upat, sihmanhsehlaw an lungthin taktak cun an ka hlat nagingai, tiah Pathian nih a ti”.
