Tulai leilungpumpi deuhthawih ṭhangthar, mino nunih zaangfahnak fate hman umloin ngeet bangih a eisia rerotu (Pokemon games) thuthawn pehparawin nu le pa dinhmun ihsin fale nun kan zirhnakah ralrinnak in petu asithei sinsinnak dingah asauzetnan kimten raksiar ve leh tengteng aw, na sir awlo ding!!
An hrangaih thilṭhazet ih kan ruahmipawl hi an hrangah nunnak siivai rimsia an rak siriangri thei. Pokemon timi umzia cu, Poket Monster tinak asiih alamdaan dik ngaingai cu Poh-Keh-Mon ti asi. Pockemon hi leilungtlun pumpiah alar emem ih nauhak thinlung lakduh zawng T-Shirt, Boat, Box, Bag le thildangdang khal tampi a um. Himi ‘Pocket Monster’ hin ziangsi in zirhduh ti le ‘Pokemon games’ hin ziangvekin so kan thinlung le kan ruahnak in hruaikuai ṭheu timi cu kan zoh hnik pei uh:
Pokemon hi Games/ Cartoon show ṭihnungbik laki Dungeons and Dragon le occultic religion (hnadaan thilih minung thawiawknak, abikin Satanism) magic tivek pawl thawn an bangawrep. ‘Pokemon’ hi cu nauhak pawl hrangah tiin tumtahnak tumpi thawn tuahmi asi ruangah aduhnung theibik le milatheibik dingin thiltinkimah azuk a ben ciamco. ‘Pokemon’ apolsuaktu hmaisabikih an ruahmi cu: (Nintendo) asiih, 1995 ahkhan Japan ramah an rak tuahsuak. ‘Pokemon’ ih cangtupawl hi ‘Shinto’ timi lak ihsin lakmi an si. Shinto timi cu, Buddhism, Hindusim, Japanese pawl hlanlaiih andaan pawl le New Age (Zumtu dodal zawngih zirhawknak) komkhawm pawl an si.
‘Pokemon Games’ in akhihhmuhmi cu hlanlai Japanes raldo mipawl in ‘Pokemon’ dangpawl (himi hi minung dang pawl) rakthlakzet ih an dodaan le dawithiamnak(Sorcery) hmangih an nehdaan pawl asi deuh bik. Computer Games satliah vekmen ih lekdingih an lanter, antuah ruangah azingzoi paih deuhtu hrang lo ahcun an miziathukzet pawl khi va hmuhthiammai ahar zet.‘Pokemon tampi hi Pokemon dangah an cang thei. An piannon or an suaksal tinak asibik. Pokemon dangih an vacan tikah ahlanih andinhmun, an sinaknakin thiltitheihnak (power) an neitam sinsin. Hivek hi asinak diktak ahcun (Reincernation) Hindupawl ih zumdaan suahsalnak an timi diktak cu asi.
Pokemon Card ih um le Card dangdang pawl hin tahṭhimnak, san makzetzet an nei ṭheh. Cumilakah alar deuhbik pawl cu Nimthlakau, lutan, kaa ihsin meialh phutsuak, midang natuarlai hmuhnuamti, thihsii inawkter, electric leihawkter, zeng tvk...an si. Kan fale kan kilkhawinak le nun kan zirhnakah an hrang ṭhatnak, hlawknak umriai lo, an ngamnak le lungawinak asiphot ahcun ziangvek games khal cu lek ko seh, tham ko seh tiin thlahdahzetin, ziangsiar loin na caan sunglawi na liamter pang maw?? Maw innsangnu le pa kan fale nun kan zirhdaan ahhin kan lung awitawk maw, ṭhaten ruat usih!!! Atlunih kan relzo bangin Pokemon umzia pawl le thil le ri pawl khin kan nunah ṭhatnak pakhatte hman inpe lo, thilṭha tuahlo dingah Pathian hnen ihsin ṭenter ṭeuṭeu in tum. Asinan, kan nih zumtu Christian nauhak thinlung thianghlimzet pawl hrang ahcun kan Pathianthu cun, midang dudawt ding le an ṭhatnak dingih thilṭha tuahṭheu dingah in duh/ in fial.
#Note:<<<<Peh sal dingmi>>>>> (Pokemon hmangih khuasia pawlin nauhakpawl thinlung sungah hna an ṭuandaan ti asi ding)
