Burma ram Prime Minister hmaisabik U Nuh hi 1907 May 25 ah khan Irrawady region Wakema khuaah U San Tun le Daw Saw Khin te karah arak chuak. an unau hi pahnih pahnih telawng an si. Ahngakchiat lioah Tun Minn tiin auh arak sit awn, amin tak cu Maung Nu a si. kum 1929 kum ah khan BA degree a rak lak, a Graduat hnu ahhin National Hight School Pantanaw ah Headmaster rian ttuanin aum hnuah 1934 ah khan Rangoon University ah Law a cawng tthan. Kum 1935 kum ah khan Rangoon University Student Union ah President dingah thim asi. Mahhi kum thotho ahhin Mya Yi hi hin innchungkhar an rak dinh ve fawn. kum 1938 kum ahkhan Gen. Aung San nawrna ruangah Dobama Asiayone ( We Burman Association ) ah ai pumpe ve, Takhin Nu timi min hi avanput hramthawknak asi. Cuticun Burma ram politics ah zuanhram avan i thawk ve colhnak asi. 
Mahhi caan lio caan ahhin Takhin ( Master ) member pawl cu British cozah nih an rak tlaih len hna lio asi. " Takhin Tuaithar thla 6 chung thawnginn ah aum " timi holhkam lar cu avan chuahter phah ti asi. Asinain Takhin Nuh nihcun cu holhkam cu poisaknak nei loin Bristish cozah adoh zungzal dingin minopawl cu hehtiah a fawrh hna ti asi, Takhin Nuh hmalak nak ruangah cun Burmese thalai/mino lakah ramdawtnak le British cozah huatnak thinlung neitu an van kharchinnak zong hi asi ti asi. Kum 1940ah khan Takhin Nuh cu Bristish cozah nihcun a van tlaih. Gen. Aung San belte tlai loin a rak i thup manh rhamhram ti asi. 26th December, kum 1941ah khan General Aung San " Thirty Comrades " pawl nihcun Burma ramnih zalennak sangbik a neih khawhnak dingah ralkap nuncan cawng dingin Japan ram lei an rakpanh ti asi. Burma Independence Army cu cutin dinh in avan um, General Aung San ralkap Burma Independence Army pawl le Japan ralkap pawl nihcun British cozah cu Burma ram in an van dawi hna i, Burma ram cu Japan kuttangah cutin a van um tthan. Japan cozah nihcun 1943 kum ah khan Burma ram cu Nomial Independence a pek, Dr. Ba Maw nih ahruaimi hna cozah dinh asi i, Takhin Nuh cu Foreign Minister canvo pek a si. 1945 kum i Bristish cozah nih Burma ram a van lak let tthan hnu khan U Nuh nihcun Politics vawlei cu avan dinhtak ve rih.
Gen. Aung San le U Nuh hi hawikawm ttha ngaingai an rak si iU Nuh Burma Politics movement i ahnukluttu zong hi Gen. Aung San arak si. Gen. Aung San le U Nuh tepawl Dobama Asiayone le Student Movement ah an ihman lio hrawng ahhin Gen.Aung San a hawile pawl hi U Nuh tein ah an rak celbualnak hmun asi tlangpi tawn, Gen. Aung San le a hawilepawl U Nuh tein ah akhuasak lio hrawnghrangah hin bazarnak heitibantuk an i deihlocaan voitampi an rak tong vet awn, U Nuh Daw Mya Yi nih hin Pantanaw i aummi a nu le pa sinah tangka avahal tawn hna ti asi. Gen. Aung San le ahawile nihcun U Nuh hi " Ko Gyi Nu " tiin an auh tawn ti asi. British cozah nih Burma ram an uk hnu kum 1946,October 10 ah khan Gen. Aung San nihcun U Nuh cu Politics ah au tthan in Anti Fascist People's Freedom League Vice President dingah a van chiah tthan.
Kum 1947,July 19 ni ah Gen. Aung San le a Cabinet tepawl Galon U Saw' nih a thah hnu hna ahkhan U Nuh cu British Governor Sir Hubert Rance timi nihcun Interim Government a tuahter, British Colonial Burmese Prime Minister a van si. Burma ram nih freedom tlamtling Full Independence a van neihkhawh nak dingah Gen. Aung San hmalaknak cu pehzulh peng avan si, Burmese Prime Minister U Nuh le Bristish Primier Clement Attlee te pawl nihcun October 1947ah khan " Nu- Attlee Agreement " remnak an siam tthan. cuticun, Burma ram nihcun 4th January,1948 Ni ahkhan full Independence a rak hmuh khawh. Burma ramnih zalennak famkim a neihhnuah Prime Minister hmasabik dingah U Nuh cu lakluh avan si. U Nuh nihhin 1948 kum thokin 1956 tiang khan Prime Minister rian avan tlaih. U Nuh hruaimi party Anti Fascist People's Freedom League cu a vankehdarh ruangah khan 1956-57 karlak ahkhan U Ba Swe cu Prime Minister a van si duak. 28 Febuary,1957 kum thok khan 26 September,1958 tiang U Nuh nihcun Prime Minister sinak cu van tlaih tthan! AFPFL party cu avan buai chin lengmang tikah cun Army Chief Gen. Ne Win nihcun Caretaker Goverment dinhin Prime Minister sinak a van tlaih, 1960 Febuary thla i General Election neih a sihnu ahcun U Nuh kaihhruai mi AFPFL ( Clean ) nihcun cozah siamkho ding khawp in teinak a van hmuh U Nuh cu Prime Minister dinhmun avan i hlangkai kho tthan. Asinain, U Nuh cozah thar cu kumhnih hmanh atlin hlanah Gen. Ne Win nihcun ralkap hriamhrei tthawnnak hmangin Prime Minister U Nuh cozah nak cu avan chuhsak diam tthan.
Gen. Ne Win-nih khan U Nuh hi a umnak innah leng chuak kho loin a hren ( protective custody) ah kumli(4) a liamhnu 27th October 1966 kumah khan a chuah zalen ve fabg. Kum 1969 Febuary thlaah khan U Nuh nihhin Gen. Ne Win sinah cozah petthan dingin caa" Interim report" a theh lut, Gen. Ne Win nihcun arak pom piak duh loh. U Nuh cu Sakhua(religious) thilah khualtlawng harh dingah India ramah atlawng, Burma ramah i let tthan loin England ah alan cih.1969 August thlaah khan U Nuh nih cun London ah Press Conference a auh hna, Upadi bantukin thimchuah asi mi Prime Minister ( Legal Prime Minister ) a si zungzal ti achimh fawn hna. 1988 kumah khan Burma buai hnuah khan U Nuh nihhin Political Party thar League for Democracy and Peace ( LDP) a dirh tthan, Legal Prime Minister of Burma a sizia hehtiah a tlangau pi zungzal. Burma Interim Govenment a dirh i, vawleicung cozah dangdang hna a cozah sinak cu pompi dingah anawl tawn hna. U Nuh hi Theravada Buddist sakhua/zumhnak ruhkawl le ai hmangmi asi ti asi. Rangoon khawpi ah Kaba Aye Pagoda le Maha Pasana Guha ( Great cave ) pawl hi 1952 kumah amah nih adirh mi an si. Kum 1961 August 29 ah khan Parliament ah " State Religion Promotion Act 1961" a pass khawh.
U Nuh State Religion Promotion Act hi a ttha lo ngai, Buddist sakhua/zumhnak nihcun Burma ram state sakhua/zumnhank sithlu seh" tih te le Burma ram Sakhua/zumhnak dangpawl zohniam duhnak nawl, nawl tthalo tete an rak umlen ti asi fawn. Gen. Ne Win ralkap cahnak hmangin U Nuh cozah anthlaknak chan zong mahhi ruangah hin asi ttheu lai tizong an zumh deuh fawn. U Nuh hi Literature lei i athinlung pe ngaimi mi asi i, cauk tampi attial lawng silo in aleh zong tampi aleh han ti asi. U Nuh hi University of Belgrade nihcun honorary Doctorate degree 1955 kum ah khan a rak pek ve. U Nuh le a nupi Daw Mya Yi hi U Ne Win ngaihthiamnak an hmu in kum 29th July, 1980 zaanlei nazi lai 3:30pm ah khan Burma ramah an van kir tthan.
First Prime Minister of Burma U Nuh hi 14th Febuary,1995 ni ah khan Rangoon i a umnak inn Bahan Township ah kum 87 asi ah athi, Daw Mya Yi he hin fa panga an nei hna, cupawl cu 1. San San Nu, 2.Thaung Htaik, 3.Maung Aung, 4.Than Than Nu 5.Khin Aye Nu (Cho Cho) te pawl an si hna.
