Minung kan theih hrimhrim dingmi le biapi ngaiin kan chiah dingmi asi ko nain voitampi kan daithlan sualmi le kan ruahtuk bal lem lomi cu “pumpelh khawh lomi thihnak” hi asi. Saam cattialtu nihcun Saam 90:12 chungah, “Nun atawizia hi kan cawnpiak law cutin kan fim kho lai” ati. Vawileicung nun atawizia, zeihmanh asi lo zia, atheifiang taktaktu nih hincun Pathianbia lawnglawng hi an buaipi. Asinain, vawleicung nun tawizia aruatballotu nihcun vawileicung sunparnak, nuamhnak le sualnak lakah an nun duhtharekin an hmang tawn. Curuangah kan i hngilhnak in akan tthangtu dingah Thihnak kong hmangin ralrinnak van latti ciao tthan hna usih.
1. Mizei zong pohnih ton ding mi asi (Heb 9:27: Job 30:23)
Thihnak hi mi zeipoh zong nih kan ton dingmi asi, culak ahcun nang le kei zong kan i tal ve. Ni nikhatkhat ah kan tlaihkhawh loin kan thi ve hrimhrim te lai (mithianghlim pawl lawrkhawm tiangin cengmang kan rak nun lem lo asi ahcun).
2. Mi vialte ahngah dih hna (Lamkaltu 7:2)
Thihnak nihcun mi vialte cu a kan hngah dih. Mirum le rethei, ramnuam le ram harsa, miropi le mizeilemlote zong siseh cu thihnak nihcun akan hngah ciao, akan hgnah zungzal zeitik ahdah kan ton lai tilawng ahngaktu kan si. Cu thihnak cu zeitik ah a van phak lai kan thei fawn lo.
3. Tikcu caan khiahcia te asi(Job 14:5)
Thihnak nihcun mi vialte cungah ro arel lai bantukin, atikcu le caan zong Bawipa Pathian nih a khuakhan cia thlumi asi. Cu Pathian lairel mi cu zeibantuk minung hmanh nih an lonh kho lo, an tan kho lo.A sinain cu Pathian i lairel mi tikcu le caan cu Pathian nih akan chim lo, ahohmanh nih kan thei lo. Nang le kei zong cu lairel mi caan ahcun thihnak kan tong ve hrimhrim lai.
4. Luatnak a um lo, humhimnak a um hrimhrim lo(Lamkaltu 8:8)
Hilei taksa hi thihnak lakin a himkhotu, aluatkhotu a nithla tthial khotu hohmanh an um lo tiin (lamkaltu 8:8) ah kan hmuh khawh. Ramnuam kan phak zongah, rumnak kan neih zongah, cawngnak lei degree sangsang kan neih zong hmanhah cu thihnak cun luatnak ding lam a um kho hrimhrim lo. Nang le kei zong kan luat hlei lai lo.
5. Lei taksa donghnak asi (2 Samuel 14:14; Job 7:9, 10:21)
Thihnak hi kan lei taksa donghnak ding cu asi, asinain (Thlarau belte donghnak asi lo”. Phungthlukbia ahcun, “ti abung cangmi cu ruhkhawh asi lo” ti asi. Minung zong hi thihnak kan ton hnuhnu ahcun ka duh rih lo, nun bet rih kan duh ti zong atheih fawn lo. Vawlei cungah tthate in ka nung tthan duh, nu le pa cawm tthan rih kan duh hna, Pathian hrangah ka theihkhawh tawkin nun tthan ka duh ti zong angah fawn ti lo. Curuangah cun thihnak kan ton hi kan lei taksa donghnak cu asi ruangah, kan lei taksa hi taksa nun ah siseh, Pathian hrangah siseh, diriam tein atthabikin hman ciao khawh i zuam hna usih.
6. Tikcu le caan theihkhawh asi lo (Gen 27:2)
Minung kan nunnak hi zeitik ah dah adih lai, zeitik ah dah thihnak hi kan ton lai tihi kan thei lo. Bible nih akan chimh ning ahcun voikhat thawhchuah tluk men fang kan si zia (Saam 62:9), nikhat chung te hmanh it hi kho mi(Job 4:20), thaizing zongah thi kho mi (James 4:14), caantawite lawng asi (Saam 90:5). Cu thihnak cu minung cungah ruah lopiin aphan tawn, hohmanh an i timlam manh bal lo. Kan cung zongah aphan kho mi le aphan lai dingmi asi fawn.
7. Biapi ngaiin chiah dingmi asi (Phungchimtu 7:4, 14)
Bible nih hitin achim, “mifim pawl ruahnak cu mithiinn ah a um” ati. A belmi cu “Chiatni ah khua ruat” ti asi. Mifim pawl nihcun midang thihnak kong an theih tikah khua an ruat, thi kho ve mi ka si ti an i fiang i, ralrinnak cang an thiam. Mifim kan si ahcun nang le kei zong thihnak kong hi biapi ngai tein kan ruah ding mi asi. Asile cu thihnak kong cu zeiruangah dah kan ruah a herh nak chan? Si... Bawipa khamhnak nei co loin thihnak thlanmual na liam sual pang asi ahcun, na thihni kha zungzal hellram, dongh thiamti lomi hmun ah na phakni asi colh lai (Luka 16:23-26, 2 Thes 1:8, Biathlam 20:15). Bawipa neitu, khamhnak cotu na si zongah tuni ah na cungah thihnak van phan sual sehlaw, na Bawipa tong dingin atu nanun ning te hi na di ariam ko maw? Bawipa hi lunglawm tein na tong ngam hnga maw??
Maw unau, thihnakin caan anei loh, a duh caanah na cungah a van phan te lai. Thihnak nih hmun a nei fawn lo, aduhnak hmunhmun ah na cungah avan phan te lai, thihnak nih duhthlannak anei fawn hoi lo, aduhduh ningin na cungah a van phan kho. A sau lai lo, minung kan nunnak hi....!!!!
NOTE: Khristian nun vaitamin timi cauk behchan in ttialmi asi.....
