Voikhat cu pa pakhat hi athi i, adam liao ahcun Khrihfabu lei rainttuannak, cawlcanghnak(activities) aphunphunah akaihruaitu bik siin tthahnemngai ngaimi arak si. Mi vialte nihcun anih cu vanram akai hrimhrim lai tiah achim zungzalmi pafel, zohchungtlak tiin an zoh mi, an i bochan ngai mi arak si. Aruakvuinak program khawmhnak an tuahnak zong ahcun aropitnak le upat tlak asinak pawl cu hehtiah chim zong an chim len fawn. Cuticun sunglawi ngaiin an vui, an thlah ti asi.
Athlarau cu vanram kutka cu avan phan, vanram chung lut ding cun hmabak pakhat te aum; Vanmi pakhat nihcun cauk lianpi(NUNNAK CAUK) cu kengin arak i dirpi, cu Nunnak cauk chungi min um cangmi poh nihcun vanram chungah cun an kho lut kho colh. Vancung mi sin ahcun kei ka min cu Daniel asi, ka min van ka zohpiak ve ca tiah a vanti ti. Vancungmi nihcun Nunnak cauk chung cu avan zoh..!! "Ka pu, na min ka hmu lo, avan ti daim ai, Daniel nihcun tthatein van zohtthan law tiah avan ti tthan, kan dam lio zongah Khrihfabu ah mipawimawh le ttuanvo dangdang zohkhentu ka rak si tawn. Cheuhra chuekhat aitam zong rak pe tawnmi ka si.Ka min cu a um ve ding hrimhrim hi asi tiah Daniel nihcun avanram kai ding ai zumhning cu a vun chimnolh tthan. Vancungmi nihcun Nunnak cauk cu avan zohtthan tawn, avan checknawlh tthan tawn. Asinin Daniel min cu a hmu bak lo. Tuufano Nunnak cauk chungi min ttial mi lawng an lut lai" tiin (Biathlam.21:27) ah kan hmuh khawh.
Zeitiawk attha hrim ti lo, zenhtukbuin, loh-theih-loin zungzal meihlipi umnak lei cu panh a hau cang..!!! I chirnak caan second khatte hmanh a um kho ti fawn lo, zungzal, zungzal, hremnak meihlipi rapthlak chungah hnuh in a um diam ai..!!!
Maw dawtmi unau, tulio thil kan toncuahmah mi kan mit le kan hna nih atheihmi pawl hi van ruat neuhneuh hmanh usih, kan Bawipa Jesuh Khrih rattthannak caan anaituk cang tihi, biathlam chungah a chimbantukin hna anei mi nihcun theiseh, atibangin kan theihfian hi aherh. Bible, Pathianbia nih a rak chimchung mi pawl hi pakhat hnu pakhat adik chin lengmang ko, ralring tein kan um hi zeithluk hin dah a herh cang?? Jesuh Khrih rattthannak hi damin kan rak hngak manh lo zong asi kho men; nitin, nazi ttemtin te hin chiatnak, thihnak hi aphan zungzal da kaw..!!!
Na piangthar cang maw? tiin i hal lennak caan dinhmun i um ding khi kan si ti lo, "NUNNAK CAUK" chungah na min a cuang ve cang maw?? tinak caan tu asi cang. Hi vawlei caan a dongh tikah, Thlarau vailte anmah le hmunah; kal dingin NUNNAK CAUK chungah an min cu hawl an si cang lai.
(NUNNAK CAUK) chung ahcun na min cu an ttial cang maw?
Aphek an ttialnak ahcun na min a cuang ve cang maw?
Pathian rorelnak ni ahcun mivialte cu, Bawipa hmaiah biaceihpiak in kan um lai. Maw unau na manh cang maw? Nai ready cang maw? Vanram nuamah leng ve dingin Khawmhtu Bawipa nihcun a kan sawm, cu hmunnuam le thianghlim chung i um ve dingin khawm na si ve cang maw? Na thiltuah tthat ruangah vanram kai dingin nai ruat sual maw? Hi vawlei na dam chungah sinak sangpipi tlaitu na si ruangah vanram kai dingin nai ruat sual maw? Kan SAKHUA tthatnak men in vanram luh kan i timh sual asi ahcun vanramkai kan i timh nak cu kan ngah diam tinak asi. Kan caanttha neihchun te hi (LAST CHANCE, LAST MINUTE) asi tihi fimhring tein theiin NUNNAK CAUK chungah kan min ttial asi rih lo sual asi ahcun Bawipa sinah nun hnangamnak taktak, khamhnak tlamtling cu a caan kan neihchun teah hin halin au zokzok usih' tiin Bawi Khrih min in kan sawm tthan hna. Bawipa nih nan dihlak atharin thlawchuah in pe ko hna seh.
