Mit'ha hrangah ni a chuah bantuk in misual mi hna ca zongah ni achuak t'hiamt'hiam ve, misual mi hna hrangah ruah asur bantuk in mit'ha mi hna ca zongah ruah asur ve ko. Cu ti a umnak suallam cu zeidah asi tiah cun Bawipa dawtnak chungah kan lengza hna tinak asi.A sinain Pathian dawtnak theithiam lo le sawtpi lotu tor le cheng kan um rih rua tiah ka ruah. A min sunloih thiam i, lomhnak cang thiamtu le thangt'hat i kan nunah Bawibik si dingin hmun akian siangtu kan tlawmtuk rih. Amah ruangah kan nung i, a cangvai kho mimen kan si ti i cathiang nih achim bantuk khan zeizong vialte kan donmi hi, akan dawttu cung Pathian ruangah asi. Kannih nih cun taksa thil leiah tluanglo ngai i kan i theih chel, mitluk lo ngai i kan i theih tawnnak hmun pohpoh ah phunciar pah le i hmaipanh lo ngaiin Biakinn ah kan i khawm tawn....Sam cattialtu nih cun "Bawipa cu lunglawm le thatho tein kan thangt'hat le sunloih ding hi asi" ti i akan chimhnak A biathiang chungah tampi kan hmuh khawh.
Sam 23:1 ah David nih cun "Bawipa cu tuukhal bantuk in aka vengtu asi, ka herhmi vialte kha aka pek dih" tiah ati, hi vawlei uktu bawi hna le hruaitu hna cu anmah nak in sinak niam deuhmi bawi pawl nih an mah bantuk minung t'hiamt'hiam nih an ven hna i an duhmi poh an fialhna i an tuanter tawn hna. Kan nih Pathian fale nih cun A kan vengtu cu kanmah akan sersiamtu le kan zumh, kan biak, kan thangt'hat cuticun A sinah thla kan cam tawnnak Bawipa Pathian asi. Curuangah David nih cun, "Pathian alam ah a ttang i akilven zungzal tile aherhmi zeizong vialte atheih" ti atheihnak " Bawipa bia asin i aphan mi kha ZUMHNAK cu a rak si. Cu Pathian bia rak phan mi ZUMHNAK ah cun David nih cun i dinhnak tlamtling arak hmuh tikah zeizong vialte neitu le pe khotu amah zeitik poh i aveng zungzaltu a si ruangah chambau i um dingin ruahnak t'ha lo, thinphannak nih anun ah hmun akhuar kho ti loh. Cu ZUMHNAK cu David ai dinhnak asi cang caah anih nih cun colhnak tikam ah aka hruai i thazang thar kha aka pek" timi cu atak in anunah atem khawh cang. Bawipa zangfahnak ahlawkpi tunih cun "zangfahnak hlei i zangfahnak"cu mipiangthar cangmi pawl Bawipa nih donglo catlo i akan hruai zungzal nak hi asi. "John 1:14-17".
Curuangah kan nunnak neitu Pathian le kan neihmi Jesuh hi kanmah a um zungzal hi kannun lam akan hruaitu Thlarauthianghlim kan theifian leve tein " Bawipa cu tuukhal bantuk in aka vengtu asi, kaherh mi vialte kha aka pek dih" tihi atan in kan nunnak ah kan van tikhawh tawn. Mitampi an hnangamnak cu arumnak, an cahnak, an fimnak, an felnak, an tthatnak, anralthuam tibantuk hna asi. Asinain Pathian zumtu fale nih cun "Bawipa" hi kan cahnak le kan tthawnnak, a kan vengtu cu arak si. Zeihmanh neihmi kan neih lo hmanh ah tikhawhmi kan rak neih lo lio zongah felnak le tthatnak lomi hna hrang zongah PATHIAN SI HI ANING AZAK HRIMHRIM LO.
Tthawngngai i ai thei mi le ai zum ngaimi,tuahkhawh lomi neilo bantuk i ai thei mipawl, fimngai i ai theimi le theingai i ai ruat mipawl cu ven an hau lo. Asinain cubantuk silo tu poh nih cun vengtu, hruaitu kan herh i, bawmtu kan herh, khamhtu kan herh, hruaitu zong kan herh, thlacampiaktu zong kan herh fawn, Jesuh Khrih nih cun "Adam minih cun sibawi an herh lo, azawmi lawng nih an herh" tizongah ati fawn. Kei misual bik le tthatnak pakhatte hmanh nei lotu zongnih hin KHAMHTU JESUH cu aka veng zungzaltu dingah siseh A thlarauthianghlim lamhruainak, umpi nak ka herh zungzal, a ka bawmtu naibik zong asi. Kannun nak ah aho hi dah a kan "VENGTU" or "a kan "HRUAITU" hi an si kan nun i zohtthan hna usih.Bawipa nih inthlawchuah ko seh.
