.jpg)
Hi vawlei cung caantawite na nun chungah hin na neihchiah chawva in na minung hawi le hrangah thilṭha, roca ah zeidah hnutchiah khawh mi, tanhtak ve ding mi na neih ve lai?? Na damchung i neih le chiah in tanta, rohta ding na neih khawh ve lo asi hmanhah, rotlingmi capar pakhat tetal hi na minung hawi sinah chiahta khawh i zuam ve ca---!!!
Bernard Saw nih cun "hi vawlei cung minung pawl nih kan thihhnu tiang i ka munung hawi hrangah mithlawchuak kan sikhawh nak um lak i kan i timh le kan tuah dingmi cu (capar tanta) tanta hi asi tiah arak chim tawn.William Shakespear sonnet miropi le thil a tihkhawh zia kan theih, bia le hla ruangah ram le ram ai do mipawl zong nih an i remkhawh phah viar ti asi. Molton i capar ṭial mi “ Paradise Lost, Pope- Epitles on man” te pawl hna kan relah cun thinlung hi a khoihtuk hlei ah kan thlarau nun ṭhanghphawk hau ṭhan mi tiangin an kan thawhter khawh lai titiangin reltu tampi comment nak lebang nih cun an chinceih mi a si. Phillip yancey nih "what so amazing about grace" ti cauk le bang nih kha cun Zangfahnak thukzia le a sunlawi zia a kan theihter ṭhan hleiah, A zangfahnak a tharin, a takin kan nunah a van kan temter ṭhan khawh.
Mark twain- nih cun "Sleepless Night" ti a ṭialmi cun Bawipa nih akan pek mi zandai nuam, zan sunglawi chungah thinhnangam tein caan a hmang kho lomi, relcawk lo an um, cucu hremnak cikhat asi ve kho ti a van kan theihter hlei ah, kan nih nih lungretheih nak um lo tein, hnangam te i zaancaan kan hman khawh hi, a sunlawi zia atak in avan kan theihter ṭhan fawn. Isaac watts ve nih cun "Joy to the World" ti hla a phuah nih cun Zumtu pawl thinlungah Bethlehem leiah kan thinlung a van kan hoi ter ve ṭhan i, Vawilei khamhtu van Siangpahrang Bawi Jesuh Khrih van chuak cu kan thinlungah hmun van kian ṭhan in kan van chuahter ṭhan khawh.Wlliam shakespear nih ṭialmi thotho "Merchant of venice" nih khan minunrawng le thlachiar ruatlo pawl nih cun zeithil tuah hmah hna sehlaw hlawtlinnak taktak an hmuhbal lo zia avan chin pinah dawtnak taktak neih dingin theihkhawh chungin rak i zuam ve a rak hauh hleiah beidong loin hramhram i ai zuammi pawl nih dawtnak cu an rak neih khawh tawn ti a kan cawnpiak.
Longinus- ve nih cun, On the Sublime i caṭial pawimawh nak a chimnak ah cun, caṭial a poimawh ning le a herhning zia duh tharek in lung singai in a chimh hna cu, "Anmah bulpak hrim zong nih a minthan ter khotu capar, a phek tin van rel zong i thinlung lami biaṭhaṭha a pai mi, lomhnak le hlawhtlinnak lam i, a kan hruai khotu capar sublimity cu asi" tiah asi ti asi. Hi kan damchung caantawite ah hin kan ruahnak le thazaang hmanin midang l kanmah hrang i capar pakhat tal chiahtak khawh, hnutchiah khotu si hi a ṭhatuk mi rootling pakhat asi. Curuangah caṭial thiammi cu kan situk lo kho men, asinain bia le hlanung thiltikho, kan tuahhnu lenglam tiang i, hngawr neitu cauk Ropibik, sunglawibik vawlei cung thu le hla vialte tlinnak, umnak, nunlam a kan hmutu BIBLE kan neih hi mi vannei tuk mi kan si hleiah, fimnak le thiamnak a kan pe khotu hi thathu le daithlanh in umtak hlah usih.
Hi cauk ṭhawnnak in akhat mi hi midang hrang chin zong nih an rel khawh chinnak hnga tikhawh mi kan nei, cuah zawnah cun kan thazaang le kan neihchiah zong hi ui hlah u sih. A ṭhalei i, i sensonak hi Bawipa duhzawng zong asi. Napek ruangah khan minih Bible an rak neihkhawh i an rak relkhawh vetawn, cucun cu an rak relnak ruangah piantharnak tiangin an rak i neih khawh pinah zungzal nun lam i a thlenhtu a rak si kho tawn, ti zong hi kan theih ṭhan ding zongah kan van i sawm ṭhan duh fawn. Cutluik i khamhnak lam hmuhsaktu sitluk i sunglawi mi hi vawlei ah a um hlei lo.
A donghnak bikah cun zeidah ka van chim duh tiah cun caṭial sunglawibik mi le ṭhabik BIBLE hi midang zong nih thlawchuahnak an rak donkhawh cio nak hnga a BIBLE bia lawng zong si loin kan nunnak nunphun le khawsaknak ah lam akan hmuhsaktu asi mi, ṭhahnem dingmi capar tluan pakhat tetal hi chiah ve ta i zuam ve ca.!!!
