Pathian bia (Bible) hi vawleicung cauk lak vialte ah cauk danglam cemmi le maksakbik cauk asi. Zeiruangah ti ahcun Bible chungah thilttha zeizong vialte a um dih, thlawchuahnak, fimnak an um. Bible adanglam nak atawi zawngin van tar usihlaw:
1.FIMNAK:
Vawleicungah fimnak timi he pehparin holhkam phunthum a um: 1). Cawnnak, 2).Theihnak/theihkauhnak le 3).fimnak tiin an um. Cawnnak le theihnak hi, vawlei vawnnak le theihnak ruangah neihmi an si hna, asinain fimnak taktak cu Pathian sinin arami asi. Saam 19:7, 119:30.
Minung tampi nih kan holhsual ttheu mi cu zeidah asi ti ah cun midang bantukin catang sang ka kai lo, cawnnak ka nei lo, thiamnak ka nei lo kan titawn. Asinain mifim le mithiam, catang sang le degree tam pipi neitu pawl nih an cobanh lomi fimnak taktak cu Pathian sin arak mi fimnak hi asi. Bible hi rel zungzal law, nunpi khawh i zuam law, minung nih pek khawh lomi fimnak Bawipa nih an pek lai. Phungthlukbia 1:7
2.LUNGLAWMHNAK
Lunglawmhnak timi hi phunhnih in a um: miring nihcun “Happiness le Joy” tiin an tthen. Vawlei lei zu le sa, sum le pai, rumnak le nuamhnak pawl hi minung hrangah cun lunglawmhnak taktak atling kho lo, akan pe kho lo “Happiness” caan tawite chunglawng nuamhnak men fang lawng an si hna. Lunglawmhnak taktak “true Joy” timi cu Pathian bia chung lawngah hin a um. Saam 119:1-2.
Vawlei daan ahcun unau tthittha ka nei lo, cawnnak le thiamnak ka nei lo, degree kan nei lo tibantukin beidong in na um tawn maw? Bible hi rel zungzal law, nunpi zungzal law Pathian nih khuaruahhar lunglawmhnak an pek lai.
3.THLAWCHUAHNAK
Bible hi hlawhtlinnak le thlawchuahnak hrampi cu arak si ko (Jos 1:8, Saam 1:1-5). Bible aduhtu cu bulpak, innchungkhar, Khrihfabu ah siseh, ram hrangah siseh, miphun hrang tiangin Bawipa nih athlawchuah tawn hna. Pathian thlawchuah co dingah hin: unau ttha tengteng neih a hau lo, background ttha tengteng neih a hau lo, cawnnak le degree neih kherkher hi arak si hlei lo, Bible Pathian bia aduhtu hi Bawipa nih a cawisang tawn han i, thlawchuahnak taktak cu a vurh tawn ko hna. Zumtu mipiangthar ai ti zungzal ko nain Bible relduh lo hi cu khuaruahharbak khi kan si ko. Bible rel kan uar lo ruangah zumtu kan nunnak ah danglamnak, lunglawmhnak, hlawhtlinnak le thlawchuahnak kan co khawh lonak hi asi. Curuangah minung kan dam chung i kan herhbikmi asi mi: FIMNAK, LUNGLAWMHNAK LE THLAWCHUAHNAK kan co khawh nak dingah Bible rel zungzal, nunpi zungzal usih!
Note: Bible hi duh! Tlai zungzal! Rel zungzal law a chung i ummi thlawchuahnak cu co hrimhrim lai!!!
(Note: Khristian nun vitamin cauk chung i van leh tthan mi asi.)
