Pastor le Innchungkhar (pastor’s family)

Kan nih laimi tampi nih kan cawh tawnmi le kan theihsual, kan ngah deuh tawn mi cu, pastor lawng Pathian rianṭuantu ah kan ruah tawnmi hi kan nganh bak. Pastor lawng si loin an nupi le fale an dihlakin Pathian rianṭuantu an si tihi kan theih dingah ka van chim hmaisa duh. Nifatein Pathian rianṭuan dingah Khrihfabu nih sawmmi an sin bantukin riandang tanta in Pastor chungkhar ei-ding hmanh adaih lo ahcun nufa le nih Khrihfabu huatzawng, lo rian zong an ṭuan ding asi ve ko. Pastor nih a phungchimmi mipi nih an ei zungzal khawh ve nak dingah cun riandang ah ai hrawlh ding asi loh. Aherh ahcun nu-fa zong nih  rian dang ṭuan angah ko kan ti rualrual in arian biapibikmi cu Pathian rianṭuan asi tihi philh lo aṭha, cupawl cu atanglei ahhin van zoh usih....

1) An biachim mi le an holh relmi hi an pabik (pastor) thinlung le ruahnak asi tiin mi nih an ruah tawn ruangah holhrel i ralrin ding.

2) Church programme, khawmh ah asikhawh ikpak ahcun pelh lo khawh i zuam, Buu tlangrianṭuannak lei ah i thlahdah lo ding.

3) Pastor fa le nih zuk le hmuam, sex lei ahman ding asi lo. Pa le chungkhar mual an photer tinak asi.

4) Mivialte hmuh ah an nunning, an holhkam in Pastor chungkhar an si an langhter awk asi.

5) Chungkhar khawmhnak, thlacamnak, aneitawntu Pastor chungkhar nunning ziaza ai chim lengmangtu an si awk asi fawn.

6) Khrihfabu hrangah thlacam zuntgzaltu an si fawn lai.

7) Khrihfa dawbiktu an si awk asi.

8) Khualtlung cungah mithmaipanhte put zungzal, awkam zaangte he an donhna, an conghawih hna asi.

9) Pastor innchungkhar cu holhtamtuk lo aṭha.

10) An nufaza in Pathian rian aṭuannak ah siseh Khrihfa rianṭuannak ah siseh, daithlang ding an si hrimhrim lo. Sarah nih apasal a upat, a cawimawi (Gen 18:12), Philip fanu pali nih Pahtian bia an chim tawn, Jeptha fanu nih apa biakamnak atlinhpiak (Biaceihtu 11:36).

11) Pabik ih Pathian rian aṭuannak ahlawhtlin khawhnak hnga akilkawi kipin an bawmh i, ahnoksak zawngin an um lo ahau. 

A.Pastor nupi le ṭuanvo

**********************

Pastor pawl nihhin upattlak sinak thukngai an nei bantukin an nupi le zongnih zeimawzat upattlak an sinak dinhmun a um ve fawn. Curuangah an nupi pawl nihhin an holh le an tuahmi, an ziaza le an cawlcangh ning, an hnipuan i hrukning le an i ṭamh ning, fale an zohkhenh ning pawl, an pasal le cungah an i hman ning ti lawng si loin thla an cam maw cam lo titiangin mipi lakin beiseinak sangngai an rak nei zungzal tihi an theih zungzal a herh.

1).Pasal cungah: Pasal uknak tangte ah tangdor tein a um lai (Gen 3:16), pasal duh zawng azulh lai (Eph 5:22), Pasal tangah tangdor ding(Eph 5:24), pasal bawmh ding (Gen 2:28), pasal hrangah tlamtlintertu (Gen 2:23), pasal upat (Gen 18:12),pasal tlinlonak khuhpiak , pasal chanhtu nupi, pasal dawhtertu (1 Samuel 25:9-37). Pasal hrangah ahleicein thla acampiak zungzal lai, hrokhrawl bia pasal bia chimh lo ding, pasal cungah thikchiat tuk lo ding, pasa aihruk aih ding thil timhcia tein chiah piak, shoes,angki tbk....


2).Fale cungah: Zumhnak fel an neihnak hnga cawnpiak (II Tim 1:5. Eph 6:4, Prov 22:6), Cawnpiak zungzal khawh i zuam (Deut 6:5-7), nu le pa upat dingin cawn piak (Eph 6:2), Thlacam piak zungzal, amah campi zungzal khawh i zuam. Innchungkhar rianṭuan ning cawn piak, an tikhawh tawk cio rian pe hna, pa le rinchan, upat, bia i cheuhbauh ning cawn piak lengmang, unauza i dawt ding, i ngaihthiam zungzal ding, aherhning bangin fungfek zong hman ding, an duhning zulhtuk nakin an hrangah thilṭhatu cawnpiak deuh hna, cawnnak, ngandamnak, zungzal nunnak, nupi pasal ding chim zungzal hna, fa le hrangah missionary ropi pakhat ka si ti i theih in, Pathianbia, nun caan ziaza, nupi pasal ding...tbk...chimh in cawnpiak zungzal ding an si.Pasal le mumal lo hmanh ah nusalṭha nihcun hruaitu ṭhaṭha fale an nei ti le pasal thling le fel zong nu amumal lemlo ahcun hruaitu ṭha an nei kho bal lo an timi hi theih zungzal khawh i zuam. 

NOTE: (Pastor le a Nupi timi cauk chirhchan in ka van ṭialmi asi)