Ahrangah thlemtu bantukin alang lem lomi sihmahsehlaw tukforhnak nakin tihnung deuh mi a um, sinak le dinhmun tiangin arawk khotu an um cupawl cu van zoh hna usih:
1. Uanthlarnak: Uanthlarnak le hngalnak hi an umtlang duh ngai. Thangthachim hlawhtlin ruangi uarnak le hngaltam nak nun hi tlakchiatnak asi, tih anung tuk.
2. Mah le mah i uahnak: Mitlamtling bik le mi thabik i i hngalhnak, midang zeiah rel lemlo hi uahnak, ruankainak cikhat asi. Sinior hruaitupawl nihhin mah le mah i uah(manah) neih an hmang cuang. Hlawhtlin le van rum deuh i faknak awkam te hna van don caanah ruamkai kan hmang, uah, manah in kan khat.
3. Thikthuchiattuknak: Kan hlan i rak tuan pawl an fak hna tikah, kan tuanpi pawl nih kan nakin an tuan that tikah hi nun hi achuak tawn. Jerusalem mipi pawl nih David hehtiah an cawngh lawmh tik ahcun Saul Siangpahrangpa cu umawk thei loin thik buai in a buai ti kan hmuh.
4. Larduhnak: Pathian riantuantu thenkhat pawl cu kan sinak leng tiangin mi nih kan hmu hnaseh, kan thei seh ti an duh cu nihcun larduhnak a neihter thawn hna. Saya thenkhat le bang hi cu mi an van kan cawisan hlan in kan mah le kan mah tein cawisan kan hmang, hibantuk mi zia hi tihnungawk ngai asi mi le tlakniam awlnakbik hmanrua pawl asi tihi kan theih ahau.
5. Hman lo thei lo i i ruahnak: Pathian riantu thenkhat pawl cu an tuahmi zeipoh khi ahmanbik le athabik i an i ruahtuk ruangah riantuanpi thitha zong an neih khawh lo theunak chan zong asi.
6. Mah le mah biapituk i i ruahnak: Keimah tel lo cun zeihmanh an si kho lo, an tha kho lai lo tibantuk ruahnak, Mipi nih keimah nakin uar deuh mi ngaihsan deuh an nei cuang lai lo tibantuk ruahnak, uarthlarnak, uahnak, hibantuk ruahnak kan nei hin cun ralrin kan rak cu tuk cang tihi kan theih awk asi.
7. Midang i rinchannak: Kan hlawhtlin i kan tluan hin mah le mah kan i zum i, mi kan lei tang viar bantukin kan ngaih athat i, kan i ruahawk asi lo. Zeiruangah ti ahcun umpawng ruangrop mi bantukin bochanawk, rinchanawk an tlak lo tihi kan theihawk asi. Rinchan thlak, bochantlak taktak cu Bawipa lawng hi asi. Luke 10:20
8. Midang zumh khawh si lonak: Midang zumhngam lonak kan neih asi ahcun an nih zong nih a kan zum ve ngam ve lai lo, asinain kan zumhngam hnuhnu hna ahcun an thiltuahmi tuanmi zong kan zumhawk hna aherh. Zeipoh tuahpoh i thinphan zungzal, zumhngam lonak hi cahlonak, derthawnnak cikhat asi.
9. Fakdernak: Micheukhat nihcun an kan teithannak dingah athlitein an rak kan fakder ziar tawn. Asinain midang sinah an rak ceihphai thiamthaim tawn.Curuangah kan cungi thatchuahtu pohpoh sinah hin kan thinlung vaithumhtuk ding kan si lo.
10. Ruahnak cheuh: Hruaitu na si hnuah ruahnak thatha neitu an van lang lai, nangmah rawi zawngin biachimtu an si kho men, daankalh zawngi ruahnak hmangtu an si kho men. Ruahnak cheuhmi diklak hin an tha thlu viar lem loh.
11. Nu lakin: Nu pawl hi Pathian duhngaimi le Khrihfabu zongah miteima, mi tlawmngai tu an si tlangpi tawn. Thla zong an cam kho, thilsiang ngai zong an um kho, asinain thlemtu hmanrua zong an si kho. Cucun nu nih hin fim ngai le nemtein pa teikhawhnak an neih ruangah ralrin aherhtaktak fawn.
Note: Pastor le anupi timi cauk chungin van t'ial t'hanmi asi.
