“BAWIPA nan Pathian min cu ning-cang loin hmang hlah u, ningcang loin ka min a hmangmi cu dan ka tat hna lai,” (Exodus 20:7).
• Hi nawlbia hi Pathian hmaiah zumhawk-tlak tein kan nunnak hnga le Amah cu kan ṭihzahawk asi zia langhtertu asi; zeirellonak le ṭihzahlonak tibantuk pawl nun hi an i tlum hrimhrim lo, sian an si lo sian asi lo pin-ah khap viar an si ti hi afiang cikcek ko.
• Judah miphun pawl nihcun Pathian min hi thiltikhawhnak ah ruat in; Amin chal in bia an i kam mi asi lo ah, chiat an serh in bia an i kam mipawl cu ataktakin an phan ṭheu tawn tiah an zumh. An biakamnak tette ah an hman tawn. Mah le ṭanghmasialnak ah kan duh le herh, kan chambaumi atlamtlin khawhnak hnga tiin Pathian min asawhsawh in thla kan cam tawnnak pawl hi Pathian nih a fih, aduhlo taktakmi asi.
• Hinawl akan pekmi hi; minung diriam sawhsawhnak le kan hamṭhat menmen nak ding hmanrua an si lo i, zumhnak kawr sawhsawh ah va hman zong an kan duhsak fawn lo. Culawng si loin Polictics tuahnak caah Pathian min le abia kan duh paoh in va hman le celetnak tibantuk zong khi kan Pathian nihcun rem atimi asi hrimhrim lo.
• Kan mah hamṭhatnak le midang caah minchiatnak si maw, zatlaknak caah tibantukin Pathian min hi asawh sawh in Pathan min hman ṭheu tawnnak pawl hi Pathian nih aduh hrimhrim lo.
• Pathian min aphung men i i lak riangmangin asinah kan duh, kan herh kan chambau mi kan halnak vialte khi lehpiak kan si lo, lehpiak cu chim lo, aphung menmen in Pathian min hman hi ṭih anungtuk mi zong asi pinah Juhdah mipawl zong nih khan an serhmi le an rak ṭih ngaingai mi zong arak si fawn. Cathiang nih achimmi cu ‘Pathian cu Thlarau asi caah abiatu nih Thlarau le biatakin abiakawk asi.’ Pathian min asawh sawh si loin atakin kan hmanawk le kan biakawk thengte hi asi tihi athar thei ṭhan usih.
• Pathian nih amin umzianeitein kan hman hi akan duhsak lawng si loin atakin, biatakin kan hman i, asinah kan thlacamnak pawl cu umzianeimi raithawinak asi awk asi. Kan lei pathian kan nu le pa hna hmanh khi an min umzianei theng loin fefuk nawn khin van au hna usihlaw vuakvelh bak kan ni huah lai lo, cultukin kan lei pathian le pawl hmanh nih an duh lo dingmi thil asi ahcun zeitluk khin dah kan nunnak aneitu Cungnungbik Pathian, Amin dawngdah ngangin kan chim, kan hman, kan phuan cu ava duh hnga dah? I ralring usih, kan caah ṭih anung, adaantatnak kan i huah sual lai..!!!
