“KAN TUH BANGIN KAN ZUN LAI”

Tuhmi zun timi ah hin hi vawlei cung i a um mi minung Kan za tein kan i tel dih. Kan i timh zong, timh lo zongah kan tuh mi theitlai cu achia maw at'ha in kan zun thotho ko lai. Bible ah Rebek nih innchungkhar ah t'hennak ci atuh ruangah i t'hen nak nih an innchungkharah a tlunhnawh hna ti kan hmuh, Jacob nih meheh hmul in a pa adehnak i, afale pawl nih meheh thisen t'hiamt'hiam in an dehnak ve ti kan hmu t'hiamt'hiam, Profet Eli nih afale pawl sual azuah ruangah, aw lawkchong vansangin an tuh man sual theitlai cu an zun ti kan hmu fawn.

David nih atuah mi sual cu, “vainam nih akal tak lo” ti asi, aram le amipi pawl nih an tuar t'hiamt'hiam ti kan hmuh fawn, Solomon nih phun t'hennak ahrin, Haman hrawkhrawl nak nih cun amah le amah thihnak aphanh ter, JUDAH pawl nih hruaitu thalo, hmanlo zulin JESUH cu an hnawl i, sersatnak an neih bangin vailamtah deih lo tiangin Rome kut ah an tuar i an chungchuak fale sa hmanh ei ding tiangin retheihnak, pamnak an cungah atlung ti kan hmuh.Hi pawl hna nih hin an tuh man cu an zun ning cu fiang tuk in kan hmuh khawh,,,chiatnak in an zun dih ti kan hmuh khawh.

At'ha lei zawng zongin kan tuh mi bantuk tein kan zun khawh mi an um ve thiamthiam, cucu hi kaah hin vun zoh ve hnik usih. JOSHEP kha i atuhmi theithlai cu Egypt ram i a chungkhar hna le arammi hna nih atuh mi theitlai cu an zun ti kan hmuh, an ram tiang nih a t'hat chih ti zong kan theih, cun MOSES nu tuhmi theitlai cu Egypt teinak le phun hnam i tundirh nak a hung si ai, Samuel nu nih atuh mi cu Bawipa nih a thawh i phun le hnam fehter tuah thlaw achuah.

Atutiang in hi vawlei cung theih ding tiangin  mi cungcuang, muhual vantha pawl an si. A tam u hi cu nu le nih an rak tuh mi thlaici tha ruangah asi tiin mithiam(researcher) pawl nih an rak chim bal.Kan i timh ah maw siseh, kan i timh lo zongah  si seh,a ho poh nih kan tuhmi thlaici cu achia atha in kan zun dih cio ko lai kan dih lak in. A canah cun achia atha in kan tuh mi nak hmanh in alet in kan zun tawn. Cu ruangah hawi dawt nitin te kan nunnak ah zeiban tuk thlaici dah kan tuh timi hi kan i check zungzal hi arak hau tawn.

“Minih atuh mi cu azun ko lai” Galiti 6:7.

Bawi Khrih ah ka u le ka nau hna zeibantuk thlaici dah kan tuh tihi nifa tinte in i ralring cio hna usih. Bawipa thlawchuah nak cu na cungah um ko  seh.

A Nung in Pekchanhmi Raithawinak

Bible Cang: Rom 12:1 " Cucaah ka u le ka nau hna, Pathian nih a kan zaangfahnak nganmi ruangah hin, Pathian sinah a nung in pekchanhmi raithawinak bantuk in i pe tuah u; "

Lamkaltu Paul nih Rom cakuat a tialmi hi, then 3 ah then asi i, then 1 nak: Dal 1-8, tiang hi sualnak in Khamhnak a kan cawnpiak i, Dal 9-11 chung hi Israelmi hna nuncan le hmailei ah Pathian thluachuah an hmuhthannak ding le, Dal 12-16 chung hi cu zumtu hna, Khrihfa hna nuncan ning ding a kan cawnpiaknak asi.

Kan cangthim nih a kan fialmi cu, Pathian nih a kan zaangfahnak nganmi ruang ah hin, amah Pathian sin ah a nung in pekchanhmi raithawinak bantuk in i pe tuah u, ti asi.

Ca Hlun chan ah, Tlangbawi nih misual caah raithawinak a pekchanh tikah, saram kha a thah i, a thih hnu ah a pekchanh ko. Asi ah kan nih tu cu, " a nung in pekchanhmi raithawinak bantuk in Pathian sin ah i pe tuah u," a kan timi hi zeibantuk raithawinak dah asi hnga ti hi karuat theu tawn.

Ca Hlun ah kirthan rih u si law, Isak nih a fapa upa deuh Esau kha athluachuah pek a duh caah, a ramvaihmi sa eih dih hnu (araithawinak sa) hnu ah pek ding in a chimh. Cu bia cu an nu Rebekah nih a theih tik ah, a dawt deuhmi a fapa hniang Jakob kha, a pa thluachuah co ding in a zuam piak.Rebekah nih Esau thil tha tha bikbik, an innchung i a chiahmi kha,a lak hna i Jakob kha a aih ter hna. Meheh phaw cu Jakob kut le a hmul a um lonak a hngawng ah khan a benh hna. Cun thaw ngai ngai in a chuanmi rawl le changreu a sermi cu a pek.

                       Jakob nih a pa sin ah ei awk a hei put tik ah a pa nih cun a rak zum ziar lo. "Ka fapa Esau na si tak tak maw si tak tak lo kan tawng tuah lai" a rak ti. A pa nihcun a rak tongh i, "Na aw cu Jakob aw asi tung, na ban cu Esau ban asi tung," ( Genesis 27:22 ) a rak ti. A thluachuahnak kha pek a von i thok cang na in a thawh than i, "Ka fapa Esau na si taktak maw?" a ti than. Ka si ko tiah a leh.  Isak nih Jakob pekmi sa cu a ei i a thluachuah cu a pek. Jakob nih a u Esau sin in fater sinak kha a rak cawk i a thilthuam kha aa hruk hna caah a pa thluachuah cu a hmuh.A pa thluachuah a co dih in a pu Laban sin ah a zam A pu Laban sin zong cu a zam than i,a u Esau he ton a herh tik ah a thin a phang ngai i a awlok a chong. Peniel timi hmun ah a mah lawng a taang i, zan khuadei Vancungmi he an i pai. Jakob nih "Thluachuah na ka pek lo ahcun kan thlah bal lai lo" a ti i,Jakob in Israel ah a min a thlen hnu ah thluachuah a pek tiah kan hmuh.

      Kan pu/pa hna nih khuahrum vangpa an rak biaknak in,a nungmi Pathian, Khamhtu Bawipa Jesuh zumhnak ah an kan thlen i, Centenary puai hna an kan tuah pi. Bawipa lianhngannak cu kan miphun sin ah a phuang i, kum 2000 hnu in, a bu bu in ram kip ah kan phan kho hna.Khrih Khamhnak Thawngtha in kan i thuam hna i thluachuah ram ah kan lut. Kan aw te cu Jakob aw si ko hmanh se law, kan thuam kha roco tu Khrih thuam thawng in thluachuah kan hmu. Hi kan hmuhmi thluachuah le kan nunnak hna hi, Jakob nih Peniel ah Vancungmi sin ah a pumpek bantuk in, kan nih zong, "Pathian nih a kan zaangfahnak nganmi ruang ah hin, amah pathian sin ah a nung in pekchanhmi raithawi nak bantuk in i pe chin hna u sih" ti in kan sawm hna. A reltu nan dihlak Bawipa nih thluachuah in ko hna seh!

By saya Kharte