(2 Kor 1:4):Harnak kan innak kipah akan hnemh caah kannih zong nih harnak a phunphun in a ingmi kha kan hnemh khawh ve hna i kan hnemh hnanakah cun Pathian sinin hnemhnak kan hmuhmi kha kan hman.
• Athi khomi leitaksa nei minung kan si chungah cun kan duh le duh lo si hleng loin atam simaw, atlawm deuh si maw kan mah le tawk cioin harsatnak, zatlaknak, ngaihchiatnak le hlawhchamnak kan tong cio, kan harsat tong ning belte ai lo cio lai lo. Acaan ahcun kan tonmi harsatnak le kan beidonghnak pawl hi ahohmnah nih lakpiak khawh le bawmhkhawh ding zongin kan ruahkhawh lo caan voitampi aum fawn. Asinain, hikazawnte ahhin, lunglawmhnak khuaceu dawhte cu a hung chuak ṭhan. Mahcu zeikhi dah asi hnga ti ahcun, pathian hna lak i Pathian, bawi vialte hna lak i Bawibik, damtertu vialte hna lak i Damtertu, ngaihchia lungkuai i arbangin avaimi hna hnemtu Jesuh Khrih bawmhnak le athiltikhawh ṭhawnnak le bawmhnak thazaang peknak thawngin cu kan harsatnak vialte hna cu akan bawmhin akan damter khawh, ava sunglawi hringhran dah...Halleluijah..!! Amen.
• Khrih zultu le ahnakkar i atenhmi afahniang le kan si bantukin, kan tlangtar bantuk khin amahbantuk thinlung zawnruahnak, zaangfahnak, teimaknak, dawtnak thinlung neih ve ding hi akan duhsak mi cu asi. Aneih lawng si loin atakin tuahsernak he langhter ding zongah akan duh fawn. Abiathiangah kan hmuh mi cu, “Aṭapmi hna cu ṭappi hna u law, ai lawmmi hna cu lawmhpi ve hna uh,”tiah kan hmuh. Mahhi biahi Bawipa bia asi, cucu kan tuahawk i akan duhmi lakah aitelmi asi caah kan kiang kan kap, kan chak kan thlangah bawmh le hnemh aherhmi kan innchak thlangpa, hawikom si hna seh Bawipa nih tuah dingin aka duhsakmi, aka fialmi rian asi titheiin Amah sunlawinakah atikcu ah siseh, tikcu lo zongah siseh remcaannak hmangthiam cio hna usih.
• Ṭhanghphawknak namen loin Pathian Thawngṭha rak aupitu lak i pakhat asi ve mi Evangelist Vance Havner nihcun hitihin arak chim bal, “Bawipa rian kan ṭuannak ah harsatnak tupi chung le hlawhchamnak hawrkuang chungah kan luh lo ahcun, nun atlamtling kho taktak lo.” tiah arak chim bal. Voitampi cu lungrethei vansangmi hna hnemh le hramh cu chim lo, akan hmuhsual lai tinacha khin ai phetchem mi ko khi kan lo. Mahhi theiin philh hlah ngat usih, ngaihchia mi hna an ngaihchiatnak hrawmhpi khawh, tuarpi ve khawh nun hi kan neih hrimhrim awk asi, cucu Bawipa nih akan cawmpiakmi asi. Thihhnu lawng si loin hi vawlei kan dam chung lila ahhin kan tuhbangin kan zuun ko lai. Thilṭha thlawchuah zuun na duh asi ahcun Bawipa nih akan fialmi hi tuah khawh i zuam ko. Cucu hanngam tlingbik cu asi ko.
• Adonghnak bikah chim ka duhmi cu, midang caah thazaang pek le kan phak tawkin bawmh hi ṭih hlah usih, zenh hrimhrim hlah usih, Jesuh Khrih holhkam tein thazaang van i lak duak ṭhanta usih, (Mathai 14:27) Jesuh nih cun hmakhatte ah ahei chawnh hna i, “Nan thinphang hlah u. Keimah pei ka si ko cu. Hnangam in um ko u,” tiah a ti hna. Kan nih zong tuah ve hnaseh ti akan duhmi pawl hi ṭihhlah usih, zenh hlah usih, zeiruangah ti ahcun Amah ni pei ṭihhlah u akan ti fomn cu! Anih nihcun bawmh kan herhnakah akan bawmh i hnemh kan herhnak caanah akan hnemh, (2 Kor 1:4). Cun hihi philh hlah u; nan sinah a zungzalin, caan dongh tiangin ka um lai (Mathai 28) tiah akan tibuin zeiruangah ṭihphang in kan umpeng rih lai! Bawipa nih ṭihhlah u akan ti.
• Pathian nih abia atharin nanun ah thlawchuah ṭhan ko seh.
