Ngaihthiamnak nih kan lung akan lomhter:
Pakhat le pakhat cungah zaangfahnak lungthin le nemnak lungthin le nemnak lungthin ngei u law Pathian nih Khrih thawngin an ngahthiam hna bantukin pakhat le pakhat i ngaithiam u. (Efe. 4:32). Mipakhat khat kan ngaihthiam tikah asi loah kan palhnak, kan mawhnak akan ngaihthiamtikah zeitlukin kan i lomhzia le kan hnangamzia kan theih cio, thiltṭha asi ti atheitu lawng si loin, Pathian nih akan fialmi thil asi caah ngaihthiam naknun hi kan nei hrimhrim awk asimi thil asi. Kan nei kho lo ti sawhsawh in lungdongh ding asi lo, Pathian sinah ahalin haltaktak ding kan si. Biatak thlak tein kan hal asi ahcun hal u law kan pek hna lai akan titu nihcun kan pek hrimhrim lai.
Ngaihthiamnak hi kan taksa caah damnak asi:
Mithiam pakhat nih a chim mi cu, “Mi pakhatkhat kan huat ah khin, kan thisen zungzam pawl siseh, kan thisen ai chawhleh ning apunghman kho lo cutikah cun, kan health(cianmazi) achiatchuahter” tiah ati. Kan ngaihthiam tam pohpoh hna le kan mahtein kan taksa hrangah doctor ṭhacem kan rak si ti hi kan theih ṭhan ding zongah ka duh ngaimi asi fawn. Thiamsang pawl nih an cawnnak zongah huatnak nihhin kan taksa arianṭuan ding zat ṭuan kho loin atuah, cu lawng si loin kan taksa nih lengleiin arakmi zawtnak do khal loin akan tuah tawn tiah an chim fawn.
Ngaihthiamnak nih kan i pehtlaihnak a fehter:
Sihmanhsehlaw Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha akan thiampiak dih lai. (1 John 9). Kan nih minung thinglung kna ruahnak le kan lungput hi, adertukmi zumhnak, ngaihthiam khawh lonakin akhatmi asi, cu thinlung ruangah cun nuva ṭhate in khua asa ko mi zong aṭhenṭheh darhter hna. Ngaihthiam khawhlonak hi sual asi bantukin cu ngaihthiam khawhlonak nihcun chungkhar nuam aṭhenter hna i, hawikom ṭha aṭhenter hna fawn hna. Asinain kan Bible tlangah kan hmuh le kan thei bantukin Pathian sinah ngahthiam khawhnak nun kan neih khawhnak hnga kan hal i amah kan auhtaktak awk asi. Cuticun pakhat le pakhat Pathian hmaiah kan sual phuangin khat le khat kan i ngaithiam kho lai, cungaihthiam nak nihcun nuva siseh, chungkhat siseh, hawikom zong va siseh, kan i pehtlaihnak afek chinchin lai.
Ngaithiam nak hi chungkhar dirhnak caah biapi taktak asi:
Zeiruangah dah abiapi ti ahcun minung kan i dawtnak men hi cu ramri aneimi, dongh athiammi, dih athiammi, velhle he akhatmi asi. Nungak tlangval zong zeitluk hmanhin kan duh, kan dawt an i ti hmanhah khin, an i dawtnak cu innchungkhar an van dirhthawkin thlali thlanga hnu ahcun lungsivangin nun hmangmi tampi an um tawn achan minung kan i dawtnak ngaingai hi cu adih khomi an rak si taktak ti cu fiang. Mathai 6:14 ahcun, “Minih nan cungah an tuahmi ṭhat lonak nan ngaihthiam hna ahcun, vancung i a ummi nan Pa zong nih an ngaihthiam ve hna lai.” tiah kan hmuh. Curuangah pakhat le pakhat kan sualnak hi e entaunak sawhah hmang hlah usih, Pathianbia bantukin kan palhnak, kan tlinglonak, kan chambaunak zawntete hi i theithiam in, i ngaihthiam ding kan si. Adonghnak pakaht te ahcun ngaihtihamnak le theihthiamnak hi Bawipa nih kan nunah atakin kan hman akan duh. Cu ngaihthiamnak lawng cun cungkhar nupi, pasal karlak ah dawtnaktaktak cu diraim ko in kan hman khawh lai.
Ngaihthiamnak nih kan thinlung zawtnak adamter:
German ram i university pakhat ahcun minung kan thin ahan ah si maw, mihuatmi kan neih caan khin zeitluk in dah kan hrangah aṭhatlo ti cu (research) achan an hawl ti asi. Mah cu ahcun zeidah ahmuh chuahmi si ti ahcun, “Minung nihhin mi pakhatkhat kan huat tikah si maw, ngaihtiam khawh lomi kan neih ah siseh, kan thinhannak kan thinlung chungah kan i erh, kan up caan ah khin, kan thisen hmantein a kal tawn lo cu nihcun kan taksa hrangah thilṭhatlonak aphunphun a chuahter, cu pawl cu, lungrawhnak, lungretheihnak, beidonghnak, huam lonak(depression) aphunphun in thinlungah rian avan ṭuan tik ahcun taksa thi le tha nih arak tlinh tawn loh, adonghnak ah mitampi nihcun an thihpi tawn” tiah an chim ti asi. Efesa 4:26 ahcun, “Na thin ahun ahcun na thinhungnak kha sualnak chunga i an luhpitu siter hlah, cun na thinhunnak cu ni thlakter hlah. Khuachia cu canṭhan pe hlah.”tiah kan hmuh. Nan thinhannak cu ni nih tlakpi hlahseh timi te achim duhnak te cu, kan thinhannak, kan mihuatnak pawl hi kan thinlungah kan i chiah peng ding asi lo ti akan cawnpiak duhnak si. Curuangah kan thin ahan ah siseh, kan cungah mi pakhatkhat nih sualnak an tuah tikah Bawipa Jesuh nih a kan cawnpiak bantukin kan i ngaihthiam awk asi. Cuti asi ahcun thinhannak nih kan nunah hmunram an khuartatak kho lai lo.
