Pastor nupi nih adawtawk asi mipawl: Pathian adawtawk asi, Khrihfabu adawtawk asi, apasal le afa le pawl adawt hna awk asi. Thleidanmi nei lo tein dawtnak thinlung aneih awk asi. Khamhnak aco rih lo mipawl adawt hna awk asi. A Pathian rianṭuanpi pawl adawtawk asi fawn. Pastor nupi pawl cu innchungkhar lumtertu taktak pakhat cu an rak si hrim ko. Pastor nupi nih hin phaisa hman ning lei ah tenren athiam awk ngaingai asi hlei ah tuakto ning zong athiam zong hi aherhtuk fawn. Pathian rianṭuannak lei ah pasal le kilkamh an herh canah kilkamh khotu, veng chung u le nau sin ah siseh, Khrihfabu chung cawlcanghnak ah siseh, holhchimh chawnh nak zongah siseh ai ralring ngai zong hi aherh ngaingai mi asi. Mah sitawkte ah ai lawm khotu le sui le ngun thilri ah abuaimi asi awk asi lo i, thlarau lei thil ah angaina tu asi awk asi. Zeitik caan zongi apasal abomhkhawhnak lam atuaktanpitu asi awk asi fawn.
Alungreitheih caan ah siseh, abeidongh canah siseh hnemhkhawhnak ding in ruahnak thinlung ahman thiam aherh ngaimi asi fawn. Amah hrimhrim nih alungre atheihter ding hi asi hrimhrim lo.Pasal dehnak hmang, hrokhrawl chim hmangmi asi awk asi lo. (Jerimaih 3:20). Pasal theih loin athli athupin zeihmanh a tuahawk asi lo, Pasal nih nehhnu i atheih ding thil zong atheih loah atuah awk asi fawn lo. Nu cheukhat pawl cu an hawi ṭha le, unau chungkhat fa le sahlawh rualchan tein pasal um lo karlak ah Pasal duh lo zawng asi mi tuah tawn an hmang tawn. Pasal thin hnangam tein Pathian rianṭuanter hi nupi ai timh bik dingmi cu asi. Pasal dam lo nikhua tibantuk ah siseh, chiat toncan hei tibantuk ahhin nupi nih dawt le hramh hi an thinlungin an hlamtuk tawnmi asi ṭheu.(Isai 54:5; 1Pet 3:2). Ei le in lei zongah apasal duhmite atheihthiam i, angiahtuah thiamsak hi aherh ngaingai mi asi fawn rih. Mah duhning poh in si maw, achumtu thuthu ti hi Pastor nupi nuzia ding asi lo. Pasal duhning le aduhmi zulh hlir in achum achuan awk hrimhrim asi tinak cu a va si cuang fawn lo.
Muidawhnak hi nu hrangah asunglawituk ko nain pasal hrangah cun nungcang le ziaza in apasal achawimawi khawh hi asunglawibik mi cu asi ko. Rev. L Loyd William nih, “Lusun bantukin holh ding thei lo tiang i Khrihfabu phurrit ka phurhmi, midang nih an ka theihpi lo zongah an ka lomhter i, ka thlarau nun a ka thawhter ṭhantu cu ka nupi hi asi” tiah ati. Pastor nih anupi hi asuluchin asi rualrual in a sunlawinak bawitthutdan acimhtertu le asunlawinak ziamter khotu asi kho ṭhiamṭhiam fawn. Curuangah Pastor nupi hi an pasal le hrangah thlarau lei in siseh taksa lei zongin siseh akhurhawmhtu le alumtertu cu an rak si taktak ko.
Note: (Pastor le Innchungkhar timi cauk chirhchan in ka van t'ial mi asi)
Note: (Pastor le Innchungkhar timi cauk chirhchan in ka van t'ial mi asi)
