Pastor nupi nihhin ai cawn ding tlak le ai zohchunh ding pakhat asi mi cu Sarah bantukin pasal upat athiam i acawimawi thiamtu asi ahcun Khrihfa unau pawl lakin sunlawihnak cu ahmuh khawh lai. (Gen 18:12). Pastor hi mitampi nih an kong an ceih tawnmi hna le an phai tawnmi hna an si ṭheu tawn, asinain rak lawmhpitu le arak hnemtu, thazaang rakpetu zong cu an rak um ve ṭhiamṭhiam. Culakah pastor nupi dinhmun in apasal tlangrel aton hmanhah aṭhatlonak khuh piak thiam i, aṭhatnak zawnte kha achim, thazaang apek thiam asi ahcun nasa te ngaiin arak dirhpi, arak bomh tinak asi. Pasal soisel le dawtnak cang thiamlo tu cu, mah kut rori i innsakmi rawktu nu asi (Prov 31:28; 12:4). Nupi nih phunciar pahbuin rian aṭuanawk asi lo i, lunglawm hmaipanh tein innchungkhar rian pawl cu tluanglamh ding asi. Rianṭuan huam lo bu le phunciar pahbuin rianṭuan cu mah le mah i hrem ai khat (Prov 31:15).
Pathian Khrihfabu kilkhawitu an si bantukin an dinhmun ṭhatein atheihfiang apoimawh. Atuahawk i aidawh lomi, aṭha lomi, asawtpawt lo dingmi thil zong an thleidan thiam ngaingai aherh. Zeitik caan zongah siseh, zeibantuk dinhmun zongah siseh nundan ziaza dawh ahawl thiam zungzal aherh.(Prov 31:10-11). Apasal cu mipi hmaiah adir tawnmi asi bangin anupi ahruk aihmi, hnipuan siseh, aṭha maw, ṭha lo, aping maw peng lo, zoh achia maw chia lo tbk... ṭhatein acheck fel aherh tuk fawn. Zohdawhlo in ai thuam sual asi ahcun apasal mualphonak hmanh in amah mualphonak tu asi deuh.
Amah pastor nupi hrimhrim zong aiṭamhning ai ralrinbak aherh ve ziah ti ahcun an i ṭamh ning le an i hrukaih ningin anthinlungput le sinak ziaza tampi alangter tawn. Tulio bantuk chantiluan tuk lawmmam i i ṭamh, i hrukaih cu pastor nupi nih an ti awk asi lo. Sum le pai tlinhtawk tein thianghlim tein an ṭamh, hrukaih awk asi. Abiapibik mi cu Bible nih achimning bantuk te hi aṭhabik (1 Tim 2:10; 1Pet 3:3-4, Deut 14:1; 22:5, 22:5, Phi 1:27).
Pasal khual atlawn hlan dengah heh tiah hran len ding asi lo, lunglawmte tuin athlah liam deuh tu ding lawng si loin atlunnak ding lam hrang he tuah thla acampiak ding tu khi asi deuh. Khualtlun chawngi ngaih nuam lomi holhkam hrimhrim chim in chim lo ding, cunak cun an khualtlawnnak thawngpang tu ṭhatein ruahpitu i zuam ding asi. Pasal cak chinchin le tam chinchin in aṭuan khawh nak ding ca i bawmtu mi pawimawh asi zia aphilh lo aṭha.
Note: (Pastor le Innchungkhar timi cauk chirhchan in ka van t'ialmi asi)
