Germany nih cun Iraq chaklei Islamic State tapung IS pawl he ai kap cuahmah mi Kurdish ralkap pawl sinah bomhnak kuat ai tim.
Germany nih hin Kurdish raldotu minung 4,000 hrang hman ding mi ralthuam ṭhahnem lak cu akuat cang hna tiah defence minister Urusla von der Leyen nih cun Pathianni ah khan a chim. An ralthuam kuat mi lakah hin anti-tank rocket, assault rilfe, hand grenade, nigh-vision goggle pawl bakah puan inn raldonak ah at'angkai ngaimi nepnawi zong an i tel hna ti asi.
Buai chhuahnak bial i ralthuam kuat lo ding hin policy (Daan) an rak tuah cang mi asi, asinain tut'um i an policy tuah mi phung an buarternak chan cu chim in, Germany Chancellor Angela Merkel nih cun Iraq khuachak lei i um mi IS tapung pawl colcangh ning ruangah mi ting renglo nunnak le Iraq ram dinhmun cu ralmuannak dinhmun ah a um khawh lo caah asi' tiah ati. IS group-ah hin ramdang mi tampi an i tel ve ruangah hinih hin Iraq lawng si lo, Germany le Europe security dinhmumn tiangin harsatnak le buainak a phak ter khawhmi asi tiah a ti fawn.
German intelligence nih cun IS group-ah hin German mi 400 hrawng an um ve tiah a chim i, nai hrawng i IS minin Bombpuak tertu lak chung zongah hin German minung pa 5 an i tel tihi fiangte in an theih khawh cang hna ti asi. Germany nih hin Kurds raldotu hrangah hin ahlanah helmet (Lukhuh) le t'angbenh pawl telin arak pek fawn cang hna ti asi.
(Keimah: German zong nih hi IS tapung pawl cawlcangh ningah a lung atling ve hrim loh, kan van chim bantuk khan a mah GERMAN mi le sa an rak i tel ve fawn tikah ahcun a khua le ram hrang aruah tikah a thing a phang ve ziar ko hih, a cozah nih raltuknak bial chungah ralthuam pek lo dingin hnatlak nak rak nei cang hna hmanhsehlaw an dinhmun derthawng ding a van ruah taktak hnu ahcun an daan le dun tuahmi pahtlangin hi misual IS pawl dohnak dingah ralthuam bomh chanh lei in um thiam loin t'an ala ve ko cang hih.)
