Hi Philipino hngakchia pate Danie Cabrera nuntudan te le atumruhning te ka hmuh le ka theih tikah hin ruahnak ttha le raltthatnak thazaang thar tampi aka pek. Hi filipino hngakchia umnak hmun le hma, roprai hmanh nei lo, ahmanthlak zohhmanh in ngaihchiat thlakte asi mi, lamkap lungpher cungi cazoh lio le Mc Donald zuarnak room in, a vanchuak mi ceu(light) i rinh tein ca azoh lio hmanthlak cu internet leiah nasa ngaiin adarh ciammam i, mitampi nihcun an zaangfahtuk hlei ah an upattuk fawn, culawng si loin hi ruangah mi tampi bawmhnak zong adon phah fawn ti asi. Anu Christina Espinosa nih AFP achimh ning hna ahcun, "A fapa, kum 9 in a upa mi Daniel Cabrera nihhin bawmhnak in adon mi hmangin siseh, school supplies le college scholarship pawl hmangin asi duhtuk tawnmi 'Policeman' van si khawhnak dinhmun tiang si kho dingah a van bawmh tiin a chimh hna ti asi. A hmanthlak cu, college cawng lio mi hngakchia pakhat nih apost mite ahcun Cabrera nihcun McDonald zuarnak hmun in ceu avan chuak mi cu i rinh in, apawng teah stool adonh i, cuka teah cun a homework cu a tuah tawn ti asi.
Hman athlak piaktu Joyce Torrefranca nihhin hmanthlak caption ahcun, "I got inspired by a kid." tiin a post. Mah hi hnuah hin voi 7,000 leng share asi. Local TV chanelah tlangzarh a si cihfawn. Espinosa le a fale pathum hi ann inn akangh viar kum 5 liam hnu ah a ttuan tthingnak eicawp dawr 'mini-grocery store' ah a remrem dan in ttuan tthan in an khuasa ve top. Cabrera hi a fale pathum lakah hngakchia cem asi. Anu ttuannak grocery dawr hi McDonald pawng te asi i, cuka hmun i khuasami an si. Cabrera pa hi kum 2013 ah khan chungthletnak (severe diarrhoea) ruangah athi. A unau dang pahnih hi cu pasal neiin hmun dangah an mah le innchungkhar cio he khuasa in inn dang an tlei cio hna tiin a chim. Anu nihhin afapa hi, cacawn lawnglawng hi a ruat, a aatcilh, angiahsak tiin a chim, “cacawn lobak cu athinlung ah a um kho lo” tiin achim fawn.
"Cacawn le sianginn kai hi angaihsak tuk hringhran...chuncaw ken ding aneih loh zongah sianginn kai a tthulh cuang hlei lo” ti asi. Afapa te nihcun hitin anu sinah a chim zungzal tawn, "Ka nu, retheituk i khuasak i ka duh hrimhrim lo,kai timhmi hi ka hlawhtlin ding hi asi hrimhrim” tiah anu sinah a chim tawn, culawng si loin anu nihcun a fapa lungput ahmuh tikah ai lawmhtuk ah a fapa te chimmi biate cu zei atuah hmanh zongah siseh daitein um pithiam men loin a chim zungzal. Thinlung hi a vakhawih hringhran dah, curuangah mitam lak in bawmhnak adong, sianginn lei nih ei le in ding siseh, a cawnnak ding hrangah scholarship, college adih tiangin a herhmi vialte cu cawm dingin tavuan an lak piak dih. Culawng si loin school uniform pawl siseh, a cacawnnak ding zinan tiangin apek cap rih ti asi fawn. An umnak tualchung Khrihfabu siseh, social welfare pawl zong nih tangka hmangin an bawmh fawn ti asi. Torrefranca nihcun hi hngakchiapate hmanthlak a post mi nihhin vawlei cung hmun zakip spain, Germany, Portugal tiangin a darh nasa ti asi, minih hi hmanthlak te hi zohliam men kho loin an share cih leng mang fawn ti asi.
Mi ngaihsan ahlawh hringhran ko, ngaihsan hlawhtlak zong arak si ve hrim ko, zeica ti ahcun kan nih teh amah bantukin harasatnak dinhmun ah um in tong ciao usihlaw, khua zong kan ruat kho ti lai lo dah tiah ka zumh. Asinain zeitlukin minih hin hlawhtlinnak dingah le an raktuar, an rak tuarfai, zumhnak fek, an rak neih tihi hi hngakchiapate nun hin cawn ding lesson a va tam hringhran dawh ti uh law!!! Zeibantuk harsatnak si seh, lungdonghnak caan zong na tong asi kho men ko, zeibantuk dinhmun na phak caan hmanhah na beidong hrimhrim sawhhlah, mihlawhtling pawl hrimhrim khi an hlawhtlinnak dingah hin voikhat hmanh mithlitla lo le mihuat tong loin tluang zirzer tein mihlawhhling dinhmun i avan chuak mi an si ve bik lo tihi kan theih tthan ding ah ka van belh chap.
