Kan Bawipa Jesuh nihcun hi vawleicungi khual atlawn lioah nupawl hi a upat ngaingai mi pakhat an rak si ve, ariant’uannak ah mit’angkai ngaingai mi an rak si fawn. Aruang pakhat te cu zeidah asi ti ahcun Pathian nih amuihmelpu tein sersiammi an rak ve t’hiamt’hiam nak hi asi. Kan Bawipa Jesuh chan lio i miralt’ha le zumhawktlak an rak si, tuchan, tuni, tuchunni tiangin nupawl hi biaknak lei zongah siseh mi cungcuang, mit’hahnemngai an sipeng rih fawn. Atu kan chan le bangah hin cun, Pathian ramhrangah tiin nunthap ngam Pathian fanu le tor le cheng hmuh in reltham an um cang. Pathian nih aramkauhnak caah nasatak in ahman fawn cang hna. Vawlei fimthiamnak kan van zoh asi zongah siseh, vawlei lei rampi pakhat hruaitu si zongah nu pawl hi mi menmen an si ve ti loh. Nasa chinchin in Pathian ahman ve cang hna.
Consider the following five truths Jesus wants women to know:
1.Sakhua nungphun nih na pawimawhnak le na hlutnak kha in dodal hlahseh: zeiruangah ti ahcun Pathian nih khuaruahhar, maksak, ropituk sersiammi na si. Kei cu, kan nih cu nu pei kan si cu tiin thanau in i kilt’oih ding asi hrimhrim lo, kei cu ka dinhmun achiatuk hmantlakmi kan si lo tiin thanau ding asi hrimhrim loh. Jesuh le Samaritan nu tikhur ah an i tontik ahcun, Jesuh he cun bia an i ruahnak kan hmuh. Jesuh cu Judah mi asi, asinain anih cu Samaria mi asi, kan theih ciao bantukin Judah mi le Samaria mi cu pehtlaknak samfantiat hmanh anei loh achan cu samaria miphun pawl cu Judah mi hrangah cun mithianghlim lo bantukin an ruahmi hna an si, curuangah an mah he pehtlaih an duh hrimhrim lo. Asinain, Jesuh nihcun, samarianu a chawnh abiak, akawmh. Cuhnu ahcun Samaria nu nihcun Pathian fapa asi zia cu fiangtein atheih khawh i , azumh. Mah cu tuanbia cu samariaram pawngkam dihlakin athang dih.(John 4:1-42). Jesuh nih aramkauhnak ding caah hin pa lawnghi aherh mi an si lo, zeitluk in dah a lalram akauh chinchin khawhnak hnga nuhi an pawimawh zia cu mah tuanbia hin kan theih khawh.
2.Hmuitinh mi neiin Pathian nih an sersiam: Zeitluk hmanh in vawlei ah hlawhchammi na va si hmanh ah siseh, bawmtu nei lo, ngaktah na va si zongah siseh, vawlei phungin hnonmi na va si zongah siseh, hi vawlei ahhin chan neiin Cung Pathian sersiammi na si tihi philh hrimhrim hlah, nan thinnau hlah, na ngaihchia hlah, vanduaibikah i ruat hrimhrim hlah. Na ruahnak diklak, na nunnak zeizong vialte he, zeibantuk dinhmun harsatnak zongah siseh tiin Amah lawng nai bochan i asinah na nunnak na aap i, Amah chungah nai tuhlut asi ahcun, Pathian nih aramkuah nak caah sunglawi ngaiin hman an duh, an herh zungzal tihi na theih t’han ding ka van chim duh t’han. Jesuh hringtunu kumnote Mary kha kan vun zoh asi ahcun vancungmi nih, “Thiangthlarau fa na pawi lai” tiin a van chimh lio ahkhan akhuaruah ahar, athinhna phang fawn, cu vialte cu Azumhnak cu Bawipa sinah a aap dih, cucun vawlei khamhtu Jesuh Khrih hringtu nu a van si ti kan hmuh khawh fawn. Cucun khuachia nih an tuahmi nu Mary Madalene zong cu damnak aco hnu zongah Jesuh vailam an tah tiangin apawngi ava naihtu asi lawng si loin zarpini zingi Jesuh taksa chiti vathuh dingin ava kal hmaisacemmi zong kha amah asi fawn, asinain Jesuh cu arak tho cang. Jesuh Khrih thawht’hannak thawngt’ha phuang hmaisacemtu zong kha amah asi.(Mark 16:9). Thangt’hacim dingin siseh miralt’ha huaisen zong nu hi nan rak si tihi Pathian nih tuchan zong an chimduh t’hanmi hna cu asi.
3.Zaangfahnak hi Na Hrangah Umzia ngei ngaimi asi: Na nun hlun ruangah na lungrethei in ngaihchia in na um hrum tawn maw? Nunman neilo bantukin nai ruah cang a um tawn maw? Pathian zong nih aka ngaithiam kho hnga hme maw titiangin ruahnak na neih caan aum vetawn maw? Minung pei na si ve cu, zeitluk hmanh khin na bei adongin, misualbik nai ruah hmanh ah Bawipa nih adawtzungzal, thinlung thianghlimtein asin na panh ding caan an hngah zungzal. Na sining khan Bawipa nih an duh zungzal, zeihmanh i sawisel ti hlah, Bawipa kan dawt, kan ngaihthiam an ti cangmi ah Amen tiin amah sin i tuhlut ko. Hlawhhlangnu pakhat cu Pharasi pawl nih biakinn ah an van ratpi lioah khan, lungin thilakin cheh ding asi tiah an ti, asinain JESUH nih aleh hna i, “Sualnak ka nei lo atimi poh nih chep hmaisa uh” tiah atitik hna ahcun pakhat hnu pakhat in an i zukphiar i lodiam an zam dih ti kan hmuh. Cutikahcun, Jesuh nihcun ahohmanh nih sual an i puh lo, kei zongnih sual kan phaw ve lo, va kal va sual ti hlah” tiah ati. (John 8:10-11). Ahohmanh hi sualnak nei lo mi pakhat kan um lo, Jesuh nih nupawl sin zongah na nungliam cangmi na sualnak, palhnak ruangah mawhpuh ding hawl i tim hlah, Bawipa sinah na palhnak vialte he JESUH chungah cun lut law, nasatakin an thuamthar t’han lai, azaangfahnak hi na hrangah umzenei ngai mi asi tihi philh hrimhrim hlah.
4.Thlacamnak i Do Dingin Ttihhrimhrim Hlah: Vawlei leiin na mualphonak pawl, na hlawhchamnak pawl, mizohdeunak na tonmipawl kha, zeizong vialte teitu na khamhtu bawinak halin thlacamnak in tei khawh i zuam tihhrimhrim hlah. Jesuh hi na panh hmasatcemmi siseh, na auh hmaisatcemmi siseh. Anih nihcun na harsatnak siseh, na tuanbia hlun vialte an ngaithiamtu Bawipa asi. Voikhat cu, Capernaum lei an kal cuahmah cuahmah liao ahcun Jaira fanu damlo cu apa nih Jesuh sinah thlacampiak ding ava halbangin damnak aco. Cucun kum 12 chung thiputnu nih Jesuh sinah azumnak dihlak he a panh tikah cun damnak ahmuh (Mark 5:21-43) chung kan rel ahcun kan hmuh khawh. Na tonmi thil harsatnak, zonzaihnak vialte zong hi JESUH ah zumhnak hngatin, thlacamnak in kan tei khawh dih hna. Ngandamnak maksak akan pekmi hi ahmei, apa ti um loin kan dihlakin auchuahter akan duh adawtnak le asunparnak, akhamnak Thawngt;ha hi khuazakip hmunkip ah thanhter akan duh. Curuangah thlacamnak hi kan sual ralthuam vialte denviarnak ah at’hacem mi cu asi ko.
5.Innchungkhar Zohkhentu Ding Lawngah Kawhmi na si lo: Cung Pathian sersiammi, adawtmi, angaihven mi, fahniang na si. Hi vawlei cung thilnung vialte siseh, ahleiceiin minung pawl akhamhnak ThawngT’ha thei loin atlau cuahmah mipawl, Asersiamtu hna Pathian sinah kirpi t’han dingin mawhphurhnak na nei ve tihi philh awk at’halomi asi ve. Mah le phaktawk cioah mawhphurhnak aneimi kan si ti theiin, Pathian ke hram i umtam, amah he caan hmantam, aherhtuk hringhran, cucu zeitindah JESUH nih anemhngeh ti ahcun, voiklhat cu Jesuh Martha le Mary tein ah atlung cutikah Jesuh nihcun acawnpiak hna, asinain Martha cu Jesuh ei le inn dingah coka ah aizilen ti ka hmuh, asinain Mary ve thung cu, Jesuh kehram ah Pathianbia ngangko in aingaih sek, cutikahcun Martha nih Bawipa hitluk ka buai nain ka nau nih aka bawm fawn lo tiah aheititik ahcun, Jesuh nihcun nemte khin ahei leh, “Martha, Martha, nang cu thil tampi ruangah na buai, asinain cunakin abiapi deuh mi cu Mary nihcun aitthim, cu aithim mi cu ahohmanh nih an lak piak ti lai lo “ ti ah aleh.(Luke 10:38-42). Biadang kan van chim asi ahcun, Pathian hrangah ei in timhlamh thilt’ha tuah hi at’hatuk ko, asinain, Jesuh caan pek hmaisa, caan hmanti hmaisa hi kan ti awk le kan tuah hmaisat ding cu asi tihi kan theih t’han dingah ka van chim duh fawn. Zeibnatuk dinhmun si zongah ahmaisabik ah Bawipa auh hmaisat zungzal le kan caan hmaisacem hi ahmah he kan hman hmaisatbik awk asi hi cu hnu lawngah adang cu kan i awt, kan tuah awk asi.
