Tu lio ka nunnakah lungtur hma bangi um sawhsawh thiam loin aka turhhnawhtu Bible bung le cang te hi azei asi zongah Pathian sunparnak caah van aupi ve ko ning. (Sam 127:1) chungta, Bawipa nih inn cu asak lo ahcun, asatu hna rian rianṭuannak cu santlailo asi; Bawipa nih khua kha aven lo ahcun, avengtu hna hngilh loin an umnak cu santlailo asi.
Pathian nih minung hi minung timi min sawhsawh pu in asersiam mi kan si lo tihi ahmaisa ah chim ka duh, zumtu nitin caan hmannak ahhin umzia neitein nun dingah akan duh. Cucu kan nitin nunah Amah Pathian a sunlawi zungzal hi aduhbik mi cu asi.
Innchungkhar : Innchungkhar tluk i biapi mi le khuapi ngan dang hi aum hlei ti lai lo dah! Cu asi ruangah zeibantuk chungkhar in dah kan rat, mirum chungkhar in maw, sifak innchungkhar in dah ti hi abiapibik mi asi lo, abiapibik mi tu cu Pathian nih asak mi innchungkhar(khuapi) kan si maw si lo ti hi kan theih aherh ngai ngai. Pathian sakmi innchungkhar cu zeitindah kan theih khawh lai? Pathian sakmi innchungkhar cu an innchungkhar nunah Bawipa nih siangpahrang dinhmun diktak aco khawh. Zeithil an tuah ding asi hmanh ah ahmaisabik ah Pathian arawn hmaisatu an si zungzal. Pathian sakmi khuapi (innchungkhar) asi lo ahcun achungah lunglawmhnak taktak a um kho tawn lo, ava um hmanh ah khin kumkhat caah si maw, zarhkhat caah si maw, nikhat caah si maw, arauh hlanah minmei bangin cu lawmhnak cu aṭianzau tawn.
Kan holhfang: Pupa phungthluk(Proverb) ahcun holhkamṭha fangkhat nih siapi aman an rak ti. Mahhi zumtu nun he ai pehzul mi zong asi fawn, kan holhfang fangkhat ruangah minih thazaang an i an rak i lawmhtuk lioah zungzal in i huat thainak holhfang zong holh khawh arak si fawn ti hi kan theih aherh fawn. David siangpahrangpa nihcun, “Bawipa ka kaa ahhin ralvengtu ka chiahpiak law ka hmur ah hin cawngtu ka chiahpiak ko”(Sam 141:3) tiah ati. An bia cu rul lei bantuk asi i, an bia cu rawchok sivai bantuk asi” (Sam 140:3). Bawipa nih asak mi, aven mi zumtu kan sinak alanghnak cu: holh i sum khawhnak te hna, thilṭhalo tuah duhnak thinlungin i sumkhawhnak nun te hna hi an si. Jesuh nih a zultupawl sinah achim mi cu, “Thlarau nihcun aduh nain taksa nih atlinh lo” cucun, “Sualnak chungah nan tluk sualnak hnga lo, thlacam uh” tiah ati fawn hna. Curuagnah kan tisa duhnak, ruahnak ṭhalo thlichia hnawmtam kan nun i a hrangmi kan teikhawhnak hnga tisa nih atlinh lo zong hmanhah hramhram in Pathian sinah thlacam awk kan si.
Pathian sakmi nun: Bawipa nih asak mi, ahruai mi le aven mi kan si ahcun kan nun kaltlangin mi pakhatkhat nih hlawknak thazaang an i lakkhawh i, lunglawmhnak nun an hmuh khawh tawn, kawmhnuam akan ti lawng si loin kawmh chin lengmang akan duh, Abiathiangah kan hmuh mi cu, “mihrangah thlawchuak mi va si uh” tiah akan ti. Adangin kan chim asi ahcun, mihrangah eitlak theitlai va chuah uh ti he hmunkhat asi, zeibantuk theiṭha, theitlai achuahtu dah kan si? Kan nun hi Bawipa nih asakmi asi taktak ahcun theitlai ṭha achuahtu, mihrangah lunglawmhnak apetu, a bawmtu, tisa khuaruahnak zongah amah duhnak nakin Bawipa duhnak aithim deuhtu, aram le afelnak hawlhmaisatu asi tawn. Adonghnak bik ahcun kan mah le innchungkhar cioah siseh, kan mah le bulpak cio hi a cunglei nun le mizia, nunphung chungah hin Bawipa sak mi khuapi (Innchungkhar), nun neitu ka si maw tihi kan biahalnak siseh!!!
