Baibalrelnak:
2Siangpahrang 5:10,14, “Cun Elisha nih cun a sinah lamkal pakhat a hei thlah i, “ Va kal law Jordan tiva ah voi sarih in vaa kholh, cun na titsa cu a dam lai I na thiang lai” tiah a ti. 5:14, “ Cucaah Pathian mi bia bangkhan a vung I hnim I cun a titsa cu a dam i ngakhchia note titsa bantuk a si I amah cu a thiang”.
Thlacam hna usih: Ka kaa chung bia hna le ka lung chung ruahnak hna cu, nangmah cohlanawktlak si ko seh, maw Bawipa, ka lungpi le ka tlanhtu. Amen.(Salm 19:14)
Biahram dawmhnak: Kumzabu 9 hrawng hi Profet Elijah, Elisha le Micaiah chan an si. Hi hna pathum hi anmah chan ahcun “Pathian minung” tiah an rak auh hna. Siangpahrang 1:1- 17:41 tiangah hin Profet Elisha riantuannak kong ka hmuh. Elisha hi a tuanbia kan rel ahcun kanmah bantuk te lo thlofa, leithuangmi te a si ve. Profet Elijah nih a auh tikah a lei thuamnak cawtum kha a thah i, cu cawsa cu a lei thuamnak thing cun a chuan I raithawinak a tuah hnuah Elijah cu a zulh. Elijah riantuan piaktu ah ai cang.(1 Siangpahrang 19:19-21). Elisha hi khuate mi asinain a riantuannak cu khuapi chugah a si.( 2 Siangpahrang 6:13, 32). Bethel le Gilgal hmun zong a hmun ve.(2 Siangpahrang 2:1, 6:32).
Elisha le Siria siangpahrang: Elisha chan lio siangpahrang nawlngeihnak cu a rak sangtuk. Kawlram Newin le Thansui bantuk in an duhlomi paoh thah khawhnak nawl an rak ngei hna. Asinain Profet Elijah, Elisha le Micaiah te hna Pathian rian an tuannak ahhin tihnak pakhat te hmanh an ngei lo. Uktu siangpahrang pawl zong kha ral tha tein a cawn piak ngam ko hna. Kan Chin ram Pastorpawl le Evangelistpawl cu uknak thalo tuk tangah can sau tuk kan um lioah uknak tha lo tu chim hring ngam lo in kanmah le kanmah tu kan i soinak le kan i dohnak ah zumlotu nih an kan nih sawh.
Siria siangpahrang i a ralkap bu hotu Naman cu a thawng i a ral a thami a si.Sihmanhsehlaw mithinghmui a si. (2siang 5:1). Rum ngai, bawingai, fim ngai ko zongah zawtnak tha lo ngeih cu a nun ti a halve. Zawtnak lak hmanhah Thinghmui zawtnak cu fih a nungbik a si. Cu lioah a sinum nute nih rian a fialmi cu “Samaria i aummi Profet va ton kha a si. Sal nih siangpahrang rianfial cu a tu lawng hi ka thieh. Siangpahrang Naman cu damtuh ah a kal ve ko. Sihmanhsehlaw Elisha nih a damnak dingah Jordan tiva ah viosarih in vaakholh law na dam lai a ti.( 2siang 5:10).Siangpahrang dirhmun in salnu bia ngaih i, cun Jordan ti nawi i vai kholh cu a har tukmi rian a si. Sihmanhsehlaw zumhnak in a tuah dih caah a zawtnak a dam (2siang 5:140).
Zumhnak cu tuah a si: Siangpahrang Naman a damnak cu a zumhnak kha a tuahnak nih a langhter caah a si. Tuahnak um lo zumhnak cu a thi.(Jeim 2:17). Abraham kha Pathian he remnak a hmuhnak cu a fapa Isak biaktheng cung i a pekchanhnak thawng khan pei a si kha.(Gen. 22:1-14,Jeim 2:21). Hlawhhlangnu Rahab zong kha cu bantuk thiamthiam cun Pathian he remhnak a hmuhnak cu a tuahnak thawng in a si; Judah mingiatu pawl kha a rak luhter hna i lam dang in a chuahter hna(Joshua 2:1-21, Jeim 2:25).
Baibal ca nih zumhnak in peknak kong a kan cawnpiakmi:
1. Luke 6:38,“Midang kha thil va ṭhen hna u, nannih zong Pathian nih an ṭhenh ve hna lai: liam thluahmah in, nan i chap khawh chungin, nan zawi khawh le khawh loin nan kut chungah an thlet hna lai. Midangca i nan hmanmi tahnak rel kha Pathian nih nanmah ca zongah a hman ve lai,” tiah a ti.
2. Phungthluakbia 19:17,“Misifak cungah zaangfahnak nan geih ahcun Bawipa kha chaw na coih bantuk a si. Bawipa nih tling tein an cham lai.
3. Phungthlukbia 18:16, “Laksawng nih laksawng petu caah khan lam a hun i mingan hna sinah khan a phakpi”.
4. Phungthlukbia 28:27,“Sifakmi a pechan lengmangmi cu a cham bau bal lai lo, sihmanhsehlaw a mit a chinh kanh tu hna cu chiatserhnak tampi a hmu lai.
5. Galati 6:7b, Minih a tuhmi cu a zun ko lai.
6. Phungthlukbia 11:24,“Mi pakhat khat nih siang tein a ṭhenh lengmang hna i a rum chin, a dang pakhat nih tinsih in a um i herh baunak lawng kha a miak ko.
7. Galati 6:9-10,“Cucaah ṭhatnak tuah kha baa hlah u sih; kan ngol lo ahcun a theitlai kan zun caan kha a phan ve ko lai. Cucaah a caan kan ngeih fate, mi cungah ṭhatnak tuah kha i zuam u si law zumhnak lei i kan rualchan a simi hna cungah khan i zuam khun u sih, tiah kan hmuh.
Pu Van Kulh bawi lioah Falam khuachung ai chawhnak ah khuate pa namte a hmuh i a uartuk i, Pu.Van Kulh nih cun a duh tuk caah cawk in a rak hal an ti. Na duh zat kan pek lai a rak ti. Asinain khuate pa te nih cun a sianglo nain, “Bawipa nangmah hna i ka namte na duh cu a theh in kan thenh” tiah a pek. Pu.Van Kulh cu ai lawmtuk i khua a ruahmi cu cubantuk lungput cu a thatuk a ti i, a hnu ah kei zong nih hi te hi kan pek ve tiah a ti i, “ Thalphir” tha taktak mi a pekve an ti.
Serampore College ah Khrihfa tuanbia le Mission kong a kan chimtu Rev. Dr. Pratap Digal hi Orissa state in Hindu in Khrihfa ah ai thlengmi an si. A upa hi Orissa hrem lio ah an rak thah i nam in can 15 ah an rak canmi a si. Zumhnak leiah a fek ngaingaimi a si. A chimmi cu, “ keimah hi sifak tukmi ka si i kachung lei nih sianginn an rak ka kai ter kho lo i, Mi bawmhnak in ka kai lengmang. A tu cu Doctor ka phan ve cang. Ka sianginn kai lio bawmtu cazin ka zoh than tikah Mirum ah an i chuah dih, cucaah kei cu Baibal sianginn kaimi mi har mi bawm hna uh ti cu ka chim peng ko lai”,zeicatiah mi a bawmmi hna hi a dongnak ah an rum dih” ti a rak chim.
Biadonghnak
Sianginn kai dingin ka thawh ahhin phaisa ka ngeihmi cu Mawtaw cycle ka zuarmi man Ks.400,000 lawng hi a si. India in thlen ahcun Rs. 20,000 hmanh a rak tlingding a si lo. Kai thawh lai ah fakpi in thla ka cam. Cu lio ka thlacam dih ahcun ka lungthin chungah a hung chuakmi cu “Pumtling lomi Zohkhennak( Disabled Children Development Centre)hna sinah pek duhnak khi ruah lopi in a hung chuak”. Minung sinak cun keimah hmanh kai za lai lo, do ka cawi lai ka ti lio i, midang sin peknak a hung chuah tikah cun nikhat chung kai ruat hnuah satan nih a ka chimmi cu a si bal lai lo, Pathian nih thluachuah pek a ka duh i a si ko lai ka ti, zumhnak ka ngei caah Ks. 50,000 ka rak pek hna. Sianginn kainak tu cu kai zat lo caah ka Church member a simi Sayaci NgunThawng(Tleicia) sinah ks. 100,000 ka rak cawi i, lunglawm tein a rak ka cawih. A tu tiang kum 4 chung sianginn ka kainak a si ve cang i, kawl ram phaisa cun ting 90 reng lo ka dih cang nain leiba pakhat te hman ka ngei lo. Pathian nih a let tamtuk in a thei a parter ti ah ka zumh.
Nang zong biacah kan duhmi cu, a tu hi capar na rel dih hin fakpi in thlacam. Pathian zumhngamhnak ka ngeih khawh nakhnga tiah fakpi in Pathian sinah hal. Pathian na hal ahcun an leh ko lai. Cun, Pathian sinah thla na cam tik ah ruah lo piin, mi pakhat khat pek duhnak kha na thinlung ah a chuah ahcun vai sum hlah! Cucu Pathian nih na thlacamnak ah biathli an chimmi a si. A rannak in va tuah colh. Thluachuahnak tampi an pek lai. Siangpahrang Naman a damnak cu Pathian minung bia a zumh i a tuah caah a dam bangin, Pathian kan zumhnak cu kan tuahnak lawng lawng nih thei a parter.
Bawipa Pathian nih thluachuahnak in pek ko hna seh.
Sangukcung Fambawl
Serampore College
India. Ph: 80139446604
No comments:
Post a Comment