Ahmaisabik ah tuchun, tuni tiang damcahnak he kanun lam aka hruai i, azilthlithiangte akahawptertu le ka nunak dong lo cat loin aka kilkhawitu Bawipa ka thangt’hat, atu ca ka van ttial dingmi hi Amah sunlawinak tuah si ko seh. Ka hngakchiat deuh liao tein kei mah le kei mah ka rak i theih ning ka rak i hmuh ning cu hitihin asi: Bawipa nih arak ka dawt zia le arak ka vehvai ning hi aruah zia ka rak thiam lo.Kanu le kapa nih an chim lengmang mi cu ka hngakchiat liao i ka dam lo ning kong hi tutiang hin an chim an relmang tawn, cutlukin mingandam lo mi khi ka rak si. Nithum le zaanthum chung cu zeitik dah athaw adih te lai ti lawng bak an rak ka bawh. Ka zawtnakbik cu tangfah, kiktlaih mi khi ka rak si, ka zualtuk cang zeitiawk an theih ti loah khin Uitlak thin (Liver of frog) tiangin an rak ka ei ter, cuzawng cu kai ziak hlei tiawkin an thei fawn lo. Thih bawh cun an rak ka bawh mi khi ka rak si.
Asinain voikhat cu kan khua (vang zang) pitar tete thlacam t'hawng ngaingai mi pali nga hrawng khi an rak um, cupawl cu ka hrangi Cung Pathian thlahmi ka tila maw, fialmi an si ka van ti deuh hnga, nikhat cu zaanlei sang khuamuih chupsap hrawngah khin an thinlungah thlacam duhnak thinlung a um an tiin kan inn ahcun keimah thlacam piak ding cun an rak ra, cuticun thla an van ka campiak thaizing cun ka taksa hna a van cawl kho. Cuticun nikhat hnu ni khat Bawipa nihcun damnak cu a van ka pek, cutin ka hngakchiat damlo liao i thla arak ka campiaktu pitar pawl nihcun mual an kan liamtak viar cang an dihlak in.
Ka hngakchiat liao ahhin keimah kai theih cin ahhin, mah le mah vaiporh si lo khin, ka thlauk khi arak cak ngai in kai thei, achan cu ka theih bal lomi zeibantuk hla an sak ah siseh, zeibantuk hla tluansau hmanh va siseh, voikhat te an sak in kai cinken khawh dih, ka thluak zawng arak ngai fawn, bia an rak haltawn ahhin ahmaisabik deuh cem ahhin ka rak leh vetawn hna, asinain nawlnawlh in kum(12) hrawng ka si ah raifanh khawsik in ka zaw ciammam i, mah cu tum zawngah cun kei mah le kei mah hmanh ka nun kai zum ti lo, ka ruh lawng atang, ka thluak faktuk in arak ka tthih, mi zeimin hmanh kai cinkenkho ti loh, cuticun thantlang sizungpi ah an rak ka chiah, atawinak in van chim ko ning law cu dinhmun pawl lak zawng cun Cung Pathian nih arak ka kilven zungzal i damnak tlamtling avan ka pek tthan, asinain ka lei taksa ka theih khawhnak ka thluak cu ka zawtnak nih arak tthih tuk ruangah atutiang ka thluak, ka khuaruahnak hi afum phah thil hna hi kai cinkhen kho ti hna lo, kai cinken ka ti hmanh ah sau a nguh kho ti lo.
Ka hngakchiat deuh liao ahcun ka zaanmang ahhin vanmi hi ka rak hmuh lengmang tawn hna, hngakchia ti fam cu ka rak chim tawn zawngah mang sawhsawh si ko cuh tiah an ka ti lengmang tawn, asinain alengmang tikah cun sawhsawh asi lai ka zum lo, asinain ka rak chimtikah na mang si ko cu tiah an ka tithan lai tiin ka chim duh ti ve hna lo, misin i van chim ding le ka ning azak fawn hoi, atutiangin kan hngak chiat deuh liao i kan nun biathli, ka rak tawntawn mi tete pawl hi tuchun, tuni tiangah hin keimah tein ka um heitibantuk, keimah tein fianrial thlacamnak ka neih hei tibantuk, bible study caan ah siseh ka ruat ttheu tawn ve. Chia le ttha thleidan ka van thiam ngaingai hnu ka van ti lai maw, ka van tleirawl cho detmat tiang zong hin ka nunah hin aka controls tu neibantuk hin kai theih cang tampi a um tawn, cubantuk theihnak ka thinlung chungi ruahnak, theihnak(sense) kan ti la cu, a van um poh cun ka thinlungah ka hngakchiat liao i ka zaanmangi ka hmuh tawn mi heitibantuk pawl kha direct ka thinlungah an van lang tawn.
Chim le rel zong hi ka ngamh lonak achan pakhat cu: tuchan i mangmang tibantuk hna cu hrawkhrol si hei tibantuk, khawsik mang heitibantuk, zeibantuk kan hmuh hmanh ahkhin van chim khi ningzahthlak ngaingai khi arak sireng ve ko minung mithmuh ahcun. Asinain atawngtu le mah nuntak i tem ve lo ahcun atongtu zong nih an theihthiam dingin van chim le rel cu thil ol asi ve hrim lo. Curuangah a chim zong ka chim ngam bal lo, Ka hawikawmhbik sin hmanh ahhin ka chim ngam bal lo. Ka thinlung chung muril in fiangte in kai fian ve mi pakhat cu zeidah asi tiah cun, hlan liao lawngah Pathian nih Ami Israel mipawl sinah biachim aduh caanah profet pawl an mang hna in arak chimh tawn hna ti kan hmuh, asinain profet ka si tinak si loin, kan Pathian nihhin ami le fa pawl akan vehvai ning, aphung le alam, ahmun le aram tiang hmanh zongin ai lo tawn lo, ai dang ciao. Mah hi zawn teah hin asi fawn ka chim ngam tawn lonak achan zawng cu, profet tihna ah capoh an ka saih sual lai ti hna hi ka phang tuk ahhin, a tih in ka tih.
Nain keimah bulpak nun ahcun tuchun tuni tiangah hin ka thlarau nun acau ka titiakah, ka daithlan tikah, Amah sinin lamhla piah ah ka van kaltak caan heitibantuk, ka minung sinak asantuk caan, keimah le keimah thlarau leiah thazaang kai lak vesek ka titawn caan zawngah hin acaan ahcun, ka mang hmangin avan ka vehvai tawn bikin ka theih, mang hi ka mangtuk bal lem lo, a zeimaw caan teah hin ka rak cak loh ti
kai theih lo liao caan hna ah khin mang hi ka van neih thut tawn, cu ka mang pawl cu ka van i thangh bak khin k athinlung chungah cauk ttialcia mi hmuh bantuk khin fiangtuk khin ka van hmuh tawn. Cucun ka ruahnak ah arak lut colh mi cu Bawipa nihhin zeitik hmanhah arak ka kaltak lo asi hi, Bawipa sinah ka thinlung te hin Bawipa kai lawm, na ka vehvai i, ka thlarau dinhmun na ka chim tthan caah tiin thlacamnak hi ka nei vet awn. Cubantukin mang dangdai deuh si maw, zeihmanh tawng lem loin caan sau nawn hna ka um caan ahhin Pathian sinah Bawipa zeibantuk dinhmun ah dah ka um ka hmuhsak tuah tiin ahal hna hin ka hal hrim tawn, a caan ahcun zeitikhin dah ka van chim hnga tiah cun achim thiam zong hi ahar ngai, achan cu ka mang i ka hmuh tawn mi, avan ka vehvai tawn tiin ka ruah tawn mi, tong loin caan zetmawzet sau nawn ka van um khin ka nun khin mi ngai neibantuk khin ka van ngaituk tawn. Nain ka thil tawnmi hi nuam ka ti, ziah tiah cun nun thlahdah i ka um hi a siang hrim loh, asinain ka tisa nun hi, ka thunun kho hrim lo, misual tak cu ka rak si. Hitlukin ka sual ko nain sual teikhawhnak thazaangthar in a ka thuam tthan tawn. Hossana...!!!! Bawipa ka thangtthat.
Ka thinlung ruahnak i a ummi pakhat cu : Pathian nih hin ami le afa pawl akan auh ning ciao siseh, ahmun le aram tiang zong hin siseh, a kan vehvai ning hi arak i lo lo ciao tihi ka thil tawn mi lakin fiang chin in ka van thei khawh. Acaan ahhin cun, i pheh lo tein ka minung sinak dinhmun ka van zoh caanah cun vawilei hlawnthil hawl thil van titikah arianttuan i tim loin, lei chaw le va hawl hi ka caktuk vetawn asinain, ka thiltawn ding khi ka ngamh lo, ziah ti ahcun a kahruai ning le aka zoh ning ka ruah tikah hlawhtlingnak ka hmu hlei lai lo ti hi kai fiang ka thinlung chung tein. Ka phak tawk tein A rianttuan ter hi a ka duhsakbik mi thil asi ko Bawipa nih. Ahar zongah arian sunglawi hi ttuan ve dingin ka nunnak aka zuah phawt ahhin cun ka phaktawk in Acahnak rinchan in thlarau tlau Asin i hruai kho ve dingin ka ttuan ve ko lai.
(Note: Ka phan cemmi cu reltu thinlungah asi lo zawngin kan ruahsual lonak hnga, nan theihthiamnak kan hal fawn hna). (Zumtu timi cu thil hi atthalei zawngin ahmuthiamtu nun neitu nun hi asi). Bawipa sunparnak caah si ko seh.) (Tuchun, tuni tiang damtein kan nun khawhnak chan hi, A zaangfahnak liao liao ruangah asi). (Kan nunah Bawipa ngam dingin, leng dingin sawm zungzal u sih. Na nun hruaitu ah na sawm phawt asi ahcun, cantawk te i, lunglawmh thiamnak asi).
