Toidornak-Nun-kher kher-hi-cu-Aw-tlinh hi ava har dah..!!!

Bible tlangtar:

A donghnak ah ka chim duhmi cu, ruahnak khat le lungthin khat in um u, u le nau bantukin i daw u law pakhat le pakhat i zaangfah u law toidor tein um u.(1 Pet 3:8)

• Biahmaitthi: 

=============

#Pathian bia chungi fiang hirhiartein kan hmuh mi le amah Khrih Jesuh hrimhrim nih hmuh khawh le tongh khawh in arak kan cawnpiak mi thiltampi lakah zumtu nitin kan nunnakah kan herh zungzal mi cu "Toidornak nun" hi asi. Zeihe dah ka tahchunh ti ahcun, "Lungthu kethum ngei" he ai lo, achan cu lungthu kethum ngei cu ke hnih lawng cun adir kho lo, atlam atling loh.

#Cubantuk tthiamtthiam in, zumtu nunah Pathian duhzawngin kan nun khawhnak hnga le athlawchuah kan don khawhnak hnga caah aherh taktakmi cu "Toidornak nun" ngeih hi asi, mah hi tallo cun zumtunun atlam atling kho ve taktak lo. Asinabeltein, hringmi, tisa kan sinakin kan caah cun thil harsa, zulh harsa le tlamtlinh hi cu a va har hringhran dah!Culawng si loin zeiruang thengte ko ahcun dah "Tangdornak nun" nei ding cun  arak kan cawnpiak hnga?

• Achan pakhat cu:

================

 Mittthep karah ai thleng zukmak kho mi, mu le mal zong angei lomi sualnak phunzakip cawhrawi karlak i khua asa, atlong alengmi kan si ruangah "toidornun" arak kan cawnpiaknak chan pakhat zong cu arak si. Hi bantuk vawleicung i khausami le duhtlinlonak ram chungah enntainak le pakhat le pakhat i zuamhcawhnak boruak chungah lengmi kan si bantukin "tongdor nun" hi kan herh khunnak zong asi fawn rih.

• Cutlukin "Toidornun" abiapit zia le kan herhzia chimttualmal bu zong cun tthenkhat pawl cu capo ngaiin zeiset varuat cuca lem lo khin, mirang tthenkhat pawl nacha in 'Its my life' ti hrawngin hngawngdak nawnin ta tilhttalh tein nun hmangmi zong cu relcawk lo aphul in kan phul tthiamtthaim. Ahmun le hma zong ruat theng lem loin capo holh caltlai pipi holh zong kan hmang fawn rih.

• Jesuh Khrih nihcun mah le sualman leiba aicham kho ti lomi, sualman leiba ruangah setan thawng chungah atla cangmi kha, zaangahnak thawngin le kan nun sualnak i akhatmi hman atlakti lomi nun cu anunnak thaap tahrat in avan suanlawinak kaltakin avan kan tlanh. Cu khawmhnak tak ko cu kan tuahsernak tello zaangahnak ruangi khamhnak sunglawituk mi cu asi. Cuti asiah, i uanpiawk ding kan si maw, si e! kan sinak le kan dinhmun fiangfai tein kan i theih i, zaangfahnak thawngin khamhnak comi kan sinak hi Pathian zong nih i hmaingalpi zungzal dingin akan duhmi kan si fawn. 

• Asinain, Khrih Jesuh nih akan khamhnak hi fiangtein kan theih taktak asi ahcun zeitikhmanhah  ai capo lo ding kan si zia hi fiangtein kan hngalh khawh lai. Khrih nih akan khamhnak hi tthatein kan ruahtaktak lo ruangah le kan hngalh taktak lo ruangah hin i hmaihngalpi ning le i uanpi zia kan thiam tawn loh, kan minung sinak nih akan khuh dih tawn, cutikah automatic in tongdor lehlam lo cun kan i capo colh tawn.

• Khrih khamhnak thawngttha hi kan thinlung chung muriltaktak in kan theihfian i kan i nunpi  asi ahcun, capo nun nih kan nun cu virhkhoih in achuk le cho ah thui len hmanhhnasehlaw zeitikhmanhah  hmun an co kho  hrimhrim lai lo. Khrih khamhnak fiangte i kan theihnak nihcun "Toidornaknun" ai kentel chih, culawng si lon cu kan theihnak nihcun "tangdornak" cu akan cawnpiak tawn. Culawng si loin Khrih khamhnak fiangte i kan theihnak nihcun "caponak si loin toidornun, nunnemnak, zawnruahnak, thlawchuahnak, mithlawchuak sinak vialte hi Amah Khrih Jesuh thengtenih arak kan cawnpiak mi le i nunpi dingi ro akan roh tami cu asi." Toidornak nun zeitluk in dah abiapit tiah cun Pathian mithmai hmuhnak asi, Pathian mithmai hmu ti umzia cu; cantawk i diriamhnak nun neih khawhnak le thlawchuahnak aphun phun donnak asi.

• Tlangkomhnak:

===============
#Kan "Toidor" khawh lonak achan tampi lakah abiapitukmi pakhat asi mi cu; Khrih nih akan khamhnak fiangfai tein kan theih lo ruangah si seh, kan theih ko nabuin kan i nunpi duh lo ruang zongah asi fawn. Angaite tiah cun Khrih nih akan khamhnak chungah hin "Toidornak nun" hi arak i phum ziar ti hi athar in kan theihtthan khawhnak hnga Thlarau Thianghlim nih kan bawm hramseh.