Hi vawleicung caantawite kan nun chungah hin na neihchiah chawva in na minung hawi le hrangah thilṭha, rocaah zeidah tanhta khawhmi, chiahta ve awk zeidah na neih ve? Na damchungah neihchiah siseh, asi loah thil pakhatkhat ro rohta ding na vaneih khawh lo hmanhah, rotling asimi vemi capar pakhat tetal hi na minung hawi sinah rohta ve khawh i zuam ve usih ca---!!!
Bernard Saw nihcun, "hi vawleicung minung pawl nih kan thihhnu tiangi kan minung hawi hrangah miṭangkaimi kan sikhawhnak umchun pakhat asi vemi cu (capar rohta) chiahta hi asi," tiah arak chim tawn.
William Shakespear miropi le mi cuanghmuar asi zia kan theih dih, bia le hla ruangah ramkhat le ramkhat doral asimi zong nih remdaihnak an hmuh phah ti kan theih fawn.
Molton i capar ṭialmi pakhat “Paradise Lost, Pope- Epitles on man” tibantuk te pawl hna kan rel ahcun thinlung hi a virhkhoih hleiah kan thlaraunun ṭhanghphawk aherhmi tiangin aṭhanghter khawh lai titiangin reltu tampi comentnakah an chimceihmi asi.
Phillip yancey nihcun "What so amazing about grace" ti cauk le bang nih khan cun Zangfahnak thukzia le a sunlawi zia a kan theihter ṭhan lawng si loin, A zangfahnak a tharin, nawlnawlh in kan nunah a van kan temter ṭhan khawh.
Mark twain- nih cun "Sleepless Night" tiin a ṭialmi nihcun Bawipa nih akan pek mi zaandai nuam, zaan sunglawi chungah thinhnangam tein caan a hmang kho ve lomi, relcawk lo minung an um, cucu hremnak phunkhat asi ve kho timi a van kan theihter hleiah, kan nih lungretheihnak um lo tein, hnangam tein zaancaan kan hman khawhmi vialte a sunlawi zia atakin avan kan theihter ṭhan fawn.
Isaac Watts ve nihcun "Joy to the World" ti hla a phuah mi nihcun Zumtu pawl thinlungah Bethlehem leiah kan thinlung a van kan hoiter ve ṭhan i, Vawilei khamhtu van Siangpahrang Bawi Jesuh Khrih hung chuak cu kan thinlungah hmun van kian ṭhanin kan van chuahter khawh ṭhan.
Wlliam shakespear nih ṭialmi thotho "Merchant of venice" timi nih khan minunrawng le thlachiat ruatlo pawl nihcun zeithil hmah tuah hna sehlaw hlawtlinnak taktak an hmuhbal lo timi fiangtein avan chim pinah dawtnak taktak nei dingah theihkhawh chungin rak i zuam ve a rak herh ning, beidong loin hramhram i ai zuammi pawl nihcun dawtnak cu an pemh khawh tawn ti a kan cawnpiak.
Longinus- ve nih achim ve mi cu, On the Sublime i caṭial pawimawhnak a chimnak ahcun, caṭial a poimawh ning le a herhning zia duhtharek le lung singang in a chimh hna, "Anmah pulpak hrim zong nih a minthanter khotu capar, a cahmaikip van rel zongi thinlung leiah biaṭhaṭha ai zawimi, lomhnak le hlawhtlinnak leiah a kan hruai khotu cu capar sublimity cu asi" tiah arak chim ve.
=A donghnakbik ahcun zeidah ka van chim duh tiahcun, cauk vilate lakah aṭhacem le sunglawicem mi cu BIBLE hi asi. Midang zong nih thlawchuahnak an rak cocio nak hnga a BIBLE bia lawng zong si loin kan nunphung le khawsaknakah lam akan hmuhsaktu asi mi le a ṭhahnem dingmi capar tluankhattal, ukkhat tetal hi hi vawlei kan mangṭha hlanah rohta khawh i zuam cio ve usih ca.!!!Hibantuk zong hi Pathian sunparnak caah thilṭha kan tuah khi ava sivima ṭhiam ṭhiam ko.
No comments:
Post a Comment