Thil ziangkim khal hi kan pathian an si thei, aziangvek hmuahhmuah khal hi cibai kan rakbuk ziar thei. Kan caanṭhabik le tambik kan pekmi hmuahhmuah pawl hi, abik in Pathian hnen ihsin kan ruahnak, kan zumnak in fehsual tertu thil an si ih, kan kan theihlo laiah pathian lemah rakhman a ol lawng si loin kan biaziar tihi kan theifiang aṭultuk rori. Cubakah kan mah theihnak le thiamnak pawl khal hi Pathian lemah kan rak hmang riangri thei fawn.
1). Pathain thuhnuaiah maw, nangmai theihnak hnuaiah saw na kuun?
Na theihnak (feeling), ruahnakin a lo thunun maw? A lo herkawi rero maw, ka theihnak in in ti buai dah lo pi, thildang ziang hman cibai khal ka buk dah lo na ti men thei (Luke: 4) thu hi ruat hnik usih! Bawi Zisu in ramcar ih ni 40 le zaan 40 rawlulih a um laiah Setan ih athlemnak kan zoh asilen turhforhnak hi zozo khal in kan tong hrimrhim ding hi asi, zohman turhforhnak pumpelh thei mi kan um lo,turhforhnak pumpelh thei mi kan um lo, kan ralpa Setan cun tuiṭumte tal cu cibai i buk awla ati, Setan cun a mah cibai buukter hi athil tum le amission tumpi pakhat cu asi. Amah duhdaan le aremruatnak vekin tui'h kan ceen reronak leilung ahhin buainak le in tibuai theitu thil hlit in akhat ṭheh. Tluangtlamzet le ruahnak dingzetih khuarkhua kan ruah theilonak pawl tla hi ruahtham zet an si.
2). Lungsi tein ziangah Pathian na thangtthat thei lo?
Mitam pi cu ziang ruang bik ah si pei thinlung ruahnak tluangtlam le ruahnak dingte le Amah bia dingah caan rellote sung khal thla an cam thei loin ruangah voitampi cu an bei adong ṭheu asi. Hiang vek dinhmun pawl hi zumtu in kan nitinteih kan tonmi an si. Thawzet le ruahnak thianghlim te thawn biathei dingin Pathian hnenah kan dil ringring apawimawh. Kan nunnakah thildang aiin ahmasabik ih kan ngai pawimawh sawn dingmi kan sim leveten cu aiih ṭulmidang, mamawh dang kan nei ṭhenṭhen lala ko ding.
Mibuaitak cu kan si minung pawl hi, ziangbik na ṭuan, na tuah tiin in sut abangta sehla asim mumal ding thei cuang lo khal cu tor le seng kan um ding ka zum. Mitampi hrang ahcun chet-law maw tiih sunvu nisa mangkengih kan ṭuanak mipawl khal hin acaan ahcun beidonnak in thlentu an rak si riangri caan aum. Asan cu, Sunvu teih kan teimak ṭenṭonak pawl cun aziang ngai khal cu in thlen kupkap cuang lo ruangah arak si. Pathian thu kan zoh asilen, in hnokhnaitu pohpoh cu hlon ṭheh ih Amah lawnglawng zoh le rinsan dingah in duh.
3). Pathian ahmaisabik ih ret hi kan tiding mi si seh..!
Na caan na hmannakah siseh, na tangka hmannak khalah siseh, na sumsaw na celet daan in na duhdan vekin Bawipa na naih thei, na duhdaan vekin na caan khal na pe thei, ziangtlukin na siang ti sawnah a hngat aw sawn. Zo khal Bawipa thawn laicinnak ṭha le tlo hnget zet, Pathian "Aw" khal theiih nunhahdam zet-ih anungtu pawl kan va hmuh tikah, an mah bangtuk si ve kan va cak e! an nundan cu a va mawi ve ka tepve sin cak, tiin dawt ve menmen ding kan si lo.
An duh ruangmen ih va neih hngal an si ce lo. An nunnak ihsin an tonmi phenah ziang thil an tuah, ziangvek in Pathian thlarau thawn lengtlang thei dingin an caan an pek, an nung ti hi kan thei a ṭul zet, sim vivo cun tampi a um. Curuangah an nun ihsin ziang si kan zir ding? Kan nunah ziangmi thil si pei kan ret hmaisat bik ding timi theifiang loih dawngdah zet ih kan nun ding aphan ngaingai. Zumtu nunnak lakih natsia vekih kan nunih in eisiatu khal asi.
Thukharnak:
==========
=A ngaingai ti ahcun kan duhbikmi nei thei dingah cun amah nakih ṭul sawnmi thildang kan nei thei cuang lo asi lo sawm? Curuangah simduh mi cu tu ahhin ziang si kan ulbik mi le ka mamawh bik ti thei loin ziangtik tiang saw kan ṭulbikmi le kan pawimawhbik ti thei loin ziangtik tiang hi saw kan mairuahnak (pathian) le kan mai theihnak (pathian), kan mai hmuhnak (pathian) tuahaw cop in kan nun kan hman vivo heih lai ding? Maw zumtu, ṭhangharh a cutuk zo, ziangvek pawl in so kan nunnakah (pathian) si loin (Pathian) rethmaisa thei loih in tuahtu ti hi, mah le nun cio X-ray (check awksal hnik u sih).
=Kan nunnak ih apakhatnak dinhmun acotu ding ngaingai kan Lalpa, Pathian hi asi. Cutivekin kan caan hmannakah siseh, kan sumpai hmannakah siseh, kan innsang, kan rual pawlnak tiangin Amah in pakhatnak co a duh. Kan nunnakah Pathian Thlarau hi kan riahsiatter pang kei tihi aphan umtukmi asi. Ziangmi ah kan nun kan hmangtambik timi kan theifiang asilen kan nunah Bawipa'n pakhatnak dinhmun aco thei ding. Bawipa in lo thlawsuah ko seh.
No comments:
Post a Comment