Na nupi duat awla, duhdawt aw: 1.Na tuahnak thawn langter aw
Na nupi na duhdawtnak cu na tuahnak (action) thawn langter aw. Tuahnak tel locun duhdawt -nak cu a thi a si. Bible in “Pasal pawl, nan nupi duhdaw uhla an hnenah awkam saang hmang hlah uh” a ti. Col 3:19. Pakhatnakah pasal pawlin kan fate pawl hnenah Pathian kan duhdawt -nak thawn duhdawtnak kan langter hnuah a pahnihnak ah kan nupi kan duhdawtnak thawn langter ding kan si. Kan fate pawl kan duhdawt asi ahcun anmah hringtu kan nupi pawl khal kan duhdawt ve hirmhirm a tul. Pasal pawlin kan nupi pawl duhdawt ding hi Pathian thupek mi khal a si. “Pasal pawl, Khrih in Kawhhran cu a duhdawt ih a hrangah a nunnak tiang a pek vekin nan nupi pawl cu nan duhdawt pei” (Eph 5:25). Fate pawlin nu le pa hnen in duhdawtnak khawpten an co ttul vek n nupi pawl khalin an pasal hnen ihsin duhdawtnak khawp ten an co a ttul ve a si. Pasal hrekkhat pawl cun an nupi pawl an duh zet konan an duhnak an angter theu lo.
2.Upat peknak thawn langter aw
Pasal pawlin nupi pawlih upat ding lawng kha ruahsan ding a si lo, nangmah khal in na nupi kha na upat ve a ttul. Na nupi na upatnak in na faate pawl kha pakhat le pakhat upat awkdan na zirh rero a si. Nangmah a pasal hmanin na nupi cu na upat lo asile ziangtin na fate pawl cun an nu cu an upat ve thei ding? Kan nupi pawlih a ttongmi pawl thate’n kan ngai sakmi khal hi anmah kan upat langternak phunkhat a si.
Na nupi ih upat ding na duh vekin amah khal upat ve aw. Nupa cu pakhat le pakhat upatnak pek awk ding a si. Nupi lawngin a pasal upatnak a pekih a pasal in a nupi upatnak a pek ve lo asi ahcun, cucu bawi le sal (master and slave) dinhmun vek a si. Pasal pawl: nangmah parah tuah -hai seh ti na duh mi pawl kha na nupi parah ah tuah ve aw. Bible in “Mi in kan parah tuah haiseh ti nan duh vekin mi dang parah tuah ve uh” (Matt 7:12) Na nupi na upat asilen na fate pawl khalin an upat ve ding. Na nupi cu duhtawk in ttongkam tthalo le awkam sang thawn na biak asile na fate pawl in an lo cawng ding. Curuangah “na nupi thawn nan umtlang tikah a derdai deuhmi an si ti theithiam uhla upat uh, ziangah tile nanmah thawn hmun khatah Pathian ih pekmi nunnak laksawng ro cu an co ve ding” (1 pet 3:7).
3.Nangmah le nangmah na duhdawt awkvek in duhdawt aw
Mai nupi duhdawt lo cu mah le mah duhdawt aw lo thawn abang rep a si. Fala tlangval lai lawngah duhdawtnak hi langter ding asi lo. Fala tlangval lai hnak hmanin nupa si hnu ah duhdawt aw sinsin ding hi Pathian duhnak a si. Bible in “Mipa in an nupi pawl cu anmah ih takpum an duhdawt vekin duhdaw ve ding an si. A nupi a duhdawtu cu amah le mah a duhdaw awtu a si” (Eph. 5:28).
4.Na ttongmi tthaten ngai sak aw
Na nupi na duhdawtnak cu an ttongmi ngaisaknak thawn langter aw. Thil pakhatkhat na tuah tik khalah na nupi hnenah a ruahnak sut hlam aw. Pakhat le pakhat upatnak le duhdawtnak lang- ternak a si. Thil na tuah tikah na nupi ruahnak na sut ve lo asilen na nupi cu zianghman ah na siar lo vekah a cang thei.
5. Na caan pek aw
Na nupi thawn nan umtlang caan, na nupi kiangih na um caan hi nangmai hrangah na nomawk bik caan siseh. Na nupi hrangah na caan pek aw. Na fate pawl hrangah caan na pek ttul vekin na nupi hrangah (private time) caanttha pek aw. Nupi thawn nuamzet in um ding hi Pathian duhmi a si. Bible in “Vanhnuai ih tikcu tawite Pathian in nunnak a lo pekmi sungah hin na duh mi na nupi thawn nuamzet in um uh, ziangah tile leilungtlun na nun sungah hin cumi cu na hnaṭtuan man laksawng a si” (Thusimtu 9:9).
6. Na ttongkam thawn langter aw
Na nupi na duhdawtnak cu na ttongkam thawn langter aw. “ka lo duh tuk, na mawi tuk, na fel tuk” tivek ttongkam kha nupi pawlin an theih ttulmi le an theih duh zetmi ttongkam pawl a si. Thil an tuahtthat mi parah khalah porh awla lawm aw. Angki thar an hruk tikah “na angki thawn na kaih aw tuk, na pungsan (form) cu ka duh zawng rori na si” ti vekin sim aw. An hni siamsi mai ding. Bible in “Curuangah na no lai na nupi parah lungawi awla, A parah lungawi nomnak nei aw. Cun amah cu zukneng bangin a mawi mi le duhnungza a si. A duhnunnak cun a lo lungawi ter dingih, A lo duhdawtnak in a lo zeel ding a si” (Thufing 5:19).
7. Rintlak in um aw (Be faithfull)
Na nupi na duhdawtnak cu rintlaknak (faithfulness) thawn langter aw. Na nupi na duhdawt taktak asilen nunau dang uar hlah. Na mit ah na nupi kha a mawi bik n hmu ringring aw. Nupi nei cingin nunau dang uar hi ningzah thlak ngaingai a si. Bible in “Ka fapa, ziangruangah nunau dang na duh? Ziangruangah midang nupi ih duhnunnak cu na duh sawn?” (Thufing 5:20). Khawleng na suak caan le khual na tlawn caanah na nupi in a lo rinsan ngam ding hi a thupi zet. Na nupi cu Pathian in pekmi laksawng a si. Pathian pekmi laksawng na duh lo asi ahcun, amah laksawng a lo pettu pa a lungawi lo ding. Bible in “Nupi ton cu thil ṭtha ton a si; Cumi in Bawipa ih ṭthatnak na parah a langter” ( Thufing 18 :22
This article belong to
Saya Thian Nun Piang
No comments:
Post a Comment