Amos Bawi Tin Chawn Blogspot.com: JOHN BUNYAN LE THE PILGRIM'S PROGRESS

Ahmaisabik ah literature lam i a intresting tupawl nih cun (ZUMTU VANRAM LAM ZAWH), (THE PILGRIM'S PROGRESS) timi cauk hi kan relthlu rihlo hmanhah a min tal hi cu atlangpi nih cun kan theih thlu ttheu lai dah tiah ka zumh. Cun attialtupa zong hi John Bunyan asi tizong atlangpiin kan theih deuh viar ttheulai dah ka ti. A rel thlu cangmi nih cun zeitluk cauk ttha le relnuam, ngaihnuam asi ti hi kan theih lengah attialtupa thinlung le aruahnak anun i thil atonmi (experience) pawl hrimhirm hin thinlung hnuk a ulhter khawh tihi kan theih hmaisa dingah ka van chimduh. A ngaihhi anuam tuk hringhren zeibantuk minungte zong nih relkhawh dingin olte in avan ttial i zumtu nuning fiangfai tele thling thlipthlap tein avan ttial. Kha lio can i avan ttial ning ding ka van ruah hin, a thiam lawng silo in a idea hrim arak ttha in mimak danglam ngai pakhat cu arak si hrimhrim ve ko. Amah tuanbia tthenkhat le a cauk Bible tilo ahcun vawlei cungah cauk zuar tamcem mipawl lak i ai tal ve mi cu (THE PILGRIM'S PROGRESS) timi a cauk hi asi, atuanbia adihlak in kimcang tein cun ka van ttial khawh lailo caah atlangpin anun lamtlun lei siseh, acauk a chuah ( release) ning pawl siseh, atawinak in ka theih khawh tawkin chim khawh ka van i zuam ve lai...... .

John Bunyan hi 28th November, kum 1628 ah khan Elstow, Bedfordshire, England ah Thomas le Margaret Buyan lak in hi vawlei can hmang dingin arak chuak ve. Kum 1644-1647 ah khan Palimentary Army ah a rak lut ve asinain raldo arak reh hnu ah cun raldo hlan i arak ttuanmi tichiahnak t'engki chia, bungbel chia le thingkuang chia tipawl siamnak hmun ah cun akir than. Raldo lio hrawngah khan nungak tlangval lei duhthusam in na rak i hmang deuh le simen la amah le amah nunnak ah i thiam lo ngai nak thinlung arak nei tawn. Amah chimnak ah cun aw ttihnung ngaingai mi pawl hi atheih tawn i cu aw cu ZISUH KHRIH cu na zuar lai maw tiah an van hal tawn tiin achim.

Voikhat cu zarhteni ah hin an khau pawng phulah lentecelh nak phunkhat "Tip-cat" an ti mi ai celh lio ah aw in " Nasualnak i chir in vanram ah na kal lai maw, sualnak nei buin helram ah na kal lai dah?" vanti khin ai theih tikah, cubantuk i an Sabbath ni i lente ai celh ruangah cunglei in chimhhrin nak ah ai ruah. Kum 1650 ah khan nupi rethei ngaimi hi aneih i, anupui nih hin apa te nih ro akenter mi chun cu cauk pahnih te asi Arthur Dent ttial mi "Plain man's Pathway timi le Lewis Bayly ttial mi ttial mi "Practice of Piety" timi cu ai ken ve, asinain anupi min fiangfai in theih asi loh.

Mah hi cauk pahnih arelnak in anun tlawmpal tete in thlen hram avan i thawk. 1650 Kum ah khan fanu dawh le duhnung ngaimi cu anei, asinain achuahka tein mitcawsa in achuak i ahngakchiat lio teah cun duhnungtuk ko hmanhsehlaw avan upa deuhdeuh i tibelbul in um hram avan i thok. St. John Church timi ah Pastor John Gifford i cawnpiak nak cu angai ve tawn. 1654 Kum ah cun fanu pahnih nak Elizabeth timi cu avan neih tthan, cun 1655 kum ah Pastor John Gifford cu athih ruangah a aiawh in John Buyan nih thawngttha cu achimh ve tawn hna. 1656 ah a cauk hmaisa bik "Some Gospel Thruths" timi cauk cu achuah i, cukum lila ah cun fapa Thomas timi an van neih tthan.1657 ah khan "Decon" khrihfa Upa ah nemhngeh arak si i, hikum thotho ah hin an fapa pahnih nak John cu an van neih tthan i cu cun a cauk pahnih nak "Vindication" timi zong cu avan chuah tthan.

Thawngttha chim leiah amin cu nikhat hnu nikhat in avan thang chin lengmang i cuticun mithangchiat le rawi hram cu avan i thok. Doihthiam le mifir dinhmun ah acan hna cun an chuah thulh, kum 1658 ah khan anupi nih athih tak i, hi lio ah hin amah hi kum 30 mi hrawng asi ve cang, siannak um lo i Eaton Socon biachim i puh asi ruangah an thleih sihmanhsehlaw thawngtlak nak tiang i buainak asilo ruangah thawngttha chim cu ma duh loin hmailei panh in a pehzulh tthiamtthiam. Kum 1659 ah khan Elizabeth he an in um tthan, amah he fa pahnih Sarah(1667) le Joshep(1672) an neih tthan hna, cuticun afa hmaisa pa 4 le pawl he fa paruk a van nei cang.

John Buyan buainak emem cu England i Charles II Bawi luchin an chinh ter ni thok khan ahram avan i thok bak asi. Charles II kha Anglican Bu mi asi i, Bawi tthutdan i avan tthut hram thok bak khan an i hmuhkhawmnak hmun tawn innka vialte kha akhar colh hna i, mivialte cu Anglican biakinn longah i khawmh awk asi tiah aana(Order) khohkhan ngaiin avan chuah rup ai, culawng silo in Anglican zumhnak hoilei asilo mi cu chim lo dingin akhap viar hna. Cuticun kum 1660 November ni 12 ah khan Lower Samsell, Westoning, Bedforshire, Bedford in meng 10 hrawng ah athlite in thawngttha achim lio ah an tleih. Magistrate Sir Francis Wingate hmai ah an dirter i, anih hin Bedford Country Goal, Silver Street, Bedford ah arak tan ter, pulpak inn ah thawngtthabia chim dingin i hmuhkhawmnak tuah tilo dingin an ti hna, achan cu hipawl an i hmukhawm nak hin an Bawipa cu zeitimaw lam in an rawi sual lai ti an phan ruangah asi, sihmanhsehlaw asinain Buyan cun abia hi zulh ai tim cuang hlei loh. John Buyan nih cun " Tuni i nan ka chuahter ah cun thaizingah thawngttha chim kai thok colh lai," ati ruangah thlathum chung tang rih dingin kum 1661 January ah khan biakhiah nak an nei.

A nupi Elizabeth nih cun a pasal cung i an rel ning cu rel tthat khawh tthan dingin lam hawl in achuk le acho ah aizi len ve ko, sihmanhsehlaw amah John Buyan bik nih an chuah hmanh ah thawngtthabia chim thotho ai timh ruangah an dan nih le i khawmhnak silo ahranpa tein i khawmh nak tuah le an duh ttung loh, an khap fawn ttung, curuangah an chuah ngam ve hoi fawn loh. Mah hi lio atan ttum ah hin hi vawlei cung i cauk larcem pawl lak i tling pha "ZUMTU VANRAM LAM ZAWH" ti cauk attial chuah nak cu asi. Historian tthenkhat pawl nih cun mah hi ttum i ttum i atan silo in avoihnih nak ah asi deuh an ti, sau lo deuh i a tlak kum 1675 i atan tthan lio i a ttialmi asi tiin an chim ve fawn. Kum 1666 ah khan tlawmpal te cu chuahnak nawl an pek ve , asinain thawngtthabia a aupi ruangah thotho ah cun an tleih tthan tthiamtthiam, Bedford thawnginn ah an thlak tthan, cuticun kum 6 chung thawnginn ah cun an tan ter tthan, hika thawnginn a um chungah hin anupi le fanau i cawmnak dingah bia zei maw tete cu attial ve tawn, ticun atanpi pawl sinah thawngtthabia cu a chim tawn hna atan chungah hin cauk pahnih John Foxe- i a ttial mi "Book Of Martyrs' ti mi le Bible hi ai ken peng ve, thirchia in atuah mi violin( thanglawi) le chair(tthutdan keli nei) ke achia miin asiam mi phenglawng le, ballpen le cauk cu te asunlawi cemmi athil neih chun cu an si.

John Buyan hi kum 1672 ah khan Charles II in "Declaration of Religious Indulgence" tining, an phung ruangah thawng atang mi le tleihkhih atong mipawl ngaihthiam nak nawl achuah lio ah khan chuahter ve arak si, hi achuah tla chung thotho ah hin John Buyan nih St John's Church ah Pastor si dingin nemhngeh asi i an nawlthar chuah mi ah thawngttha chimnak nawl Licence nei hmasa cem zong arak si fawn. Biachim arak thiam hlei ah athawngttha chim zong a nung i munun arak khawih ngai, cuticun nikhat hnu nikhat in amin cu avan lar chin lengmang i, hmunkip kakip in thawngttha chim ding cun catlo bakin sawmank avan dong amah hman pumpak hmanh nih aizo ti lo cutluk cun sawmtu avan nei cang. Mitam u nih atheih lar bik nak cun "Bishop Buyan" tiin an theih cem.

Kum 1675 March thla ah khan Charles II nih cun anawlbia tuahthar mi "Declaration of Religious Indulgence" timi cu zumh lo piah arawkviar tthan i, Buyan zong cu tleihkhih avan tong tthan, kum tampi arak tlak cangnak thawnginn ah cun avan thlak tthan, Quakers an timi pawl hna kha Charles II nih chun an thawnginn i tlami lakah ngaihthiam i a um mi an theihtheih kha avan hal hna, an nihnih cun an Bu member min an pekmi lakah John Buyan min cu van tthat ah arak tel ve, cutikah John Buyan zong cu chuah zalen arak um kho ve tthan, hi hnu ah hin cun tleihkhih le thawngtalk timi hi atong ti loh. Bawi asi mi Charles II cu James II nih avan thlak hnu ah khan James II nih cun kum 1687 ah khan Bedfford area (bial) i ro arelnak vialte zoh pitu dingah nemhngeh ai tim i asinain John Butyan nih cun duh leh lam loin arak hnar diam, asinain kum 1688 ah khan " LORD MAYOR OF LONDON" Chaplain hrangah an rak nemhnget tthiamtthiam.

Kum 1688 chung lila ah John Buyan hi London lamah Reading le Beskshire tepawl kaltlangin fapa airemkholimi pawl karlak ah remnak tuah dingah cun ava kal. Cuka ah cun khawsik, tlangrai nih arak thleih ai, a hawipa pakhat John Strudwick, Snow Hill, Holborn, London i a ummi nih cun a inn leiah arak zohkhenh, sihmanhsehlaw a zawtnak cu zuallam a van panh deuhdeuh cuticun August ni 31, 1688 ah khan Bawipa hrang i zumhtlak, miralttha, tthahnemngai le miluhlul John Buyan nih cun A rian attuanpiak zungzal tawnmi a Bawipa sinah lungretheih harsatnak, mithli le ttah aihram umti lonak vansuikhuapi ah cun adawttukmi anupi fanau le a zoh khenh cuahmah mi a church members pawl sihnaseh ahawikom ttha vialte hna cu avan kal tak ve cang hna. A ruak hi London i ummi Burnhill Fiels thlanmualah ah cun an vui. Kum 1862 ah khan athlanah amah hmanthlak philhlo nak ah tiin( azukttuhpi)(statue) cu an tuah. Mah hi hnu kum 1874, June ni 10 ah khan Bedfford ah ahmanthlak thotho (Statue) cu siamthiam ngaimi Sir Joseph Edgar Boehm nih cun DAR in asiammi cu "Dean of Weatninster" nupi Lady Augasta Stanley nih cun hawnnak avan neih tthan, cucun a Statue dang zong cu Kingsway London zongah an rak siam tthan fawn. John Buyan hi fa le 6 a neih hna i afale 5 nih cun nupi pasal nei in tu le fa tepawl zong tampi an van neih ve cang. Elstow i "Moot Hall Museum" nih cun kum zabi 19 nak tiangah khan cun a cithlah pawl, an ciruang pawl hi an record thlipthlap hna ti asi, asinain khuacan avan sauhhnu ruangmang cun John Buyan cithlah pawl hi theihkhawh asi tiloh ti si.

A cauk ttialmi lak i alar cem mi cu "Zumtu Vanram Lamzawh" timi cauk hi asi, amirang holh cun "The Pilgrim's Progress" ti asi.A Bu pum mindik tak cu The Pilgim's Progress form This World to That Which Is to Come" ti asi avan sau ngai. hi cauk attialmi hi a thawnginn athlak hmaisat lio i attialmi asi i, ahrangah can neta kum 1684 cho hrawng ah khan attial tlu mi asi tiah zimh asi. A edition hmaisabik mi hi buhnih ah tthen asi i atthenkhat nak cu kum 1678 ah khan Lodon ah chuah (release) arak si. A tthenhnih nak cu kum 1684 ah khan chuah tthan arak si ve, a buhnih i kop in kum 1728 ah khan chuah tthan arak si, a bu tthenthum nak hi kum 1693 hrawngah khan chuah tthan arak si. Cuhnu ah cun kum zeimawzet avan ruah hnuah kum 1852 ah a cauk pawl vanchuah tthan, an van( Release) tthan hna "The Pilgrim's Progess" timi cauk hi tuchun tuni tiangah Bile tilo ah cun Zumtu(Christian) cauk lak cun tthacem asi tihi vawlei cungpumpi nih aruah mi asi peng rih. Holh phunzakip 100 cuang nih lehmi cauk asi. China(TULUK) Communist cozah zong nih khin khawtlang culture theihnak phunkhat si dingin tiah chuah ve hnik usih an ti i copy 200,000 an tuah, cucu nithun chungin pakhat hmanh tang loin ekvut in an cawk viar ai !!!

KAN BAWIPA NIH HIN LUNGSAU TEIN AMAH AZUM I AI TLEIH ZUNGZALTU HNA HI CU A DONGHNAK AH CUN BAWIPA NIH SUNPARNAK HI ARAK PEK HRIMHRIM KO HNA.