HNAH HLUN AN TLA IH HNAH THAR AN CERH

A hmaisabik ah dam le tlauagten kum 2014 in hlangkaitu kan Pathain hmin ka thangthat. Duhdawtmi Nu le Pa, U le Nau nan zaten Kumthar cibai nak thawn nan kut kalo kai. a tlangpi thuin kumpi a hungthar cun ziang hmuahhmuah hi an thlengaw danglam theu. cumi thil tampi a thleng awmi lak ihsin kan nunnak ih thazang kan raklaak theinak hrangah thingkuung / thinghnah pawl in kan zoh ding. kumpi aliam ih kumthar a si cun an hnahhlum pawl hmuahhmuah a tla ttheh ih hnanthar an cerh sal theu. a biktak in kanlam ciizawl thingkung pawl nanthei ko ding an hnan pakhat hman tang loin a tlafai ttheh hnuin hnanthar a cerh si kha. duhdawtmi unau tuhi 2014 kumthar kan thlengzo ih Pathian hmaiah na ziaza hluh pawl cu Pathian hmih sunlawinak hrangah ziaza thar in thleng mi na nei ve maw? kan nunhlun kha nunthar in kan thlang nak ding ah thutlang phun (6) in ka tuah cu pawl hmang in thazang kan laktlang pei uh.

1. Lungawi thusimnak

(Saam 100:3-4) " Bawipa cu Pathian a si kha hngilh hlah uh; Amah in in tuah ih amah ih ta kan si;kannih cu a minung kan si; A khalh mi tuu kan si.

A Biak imm sungah lungawinak thawn ra u;A hmun thianghlim ah thangthatnak thawn; A parah lungawi uhla a hmin thangthat uh."

David siangpahrang nunnak kan zoh tikah Pathian thangthat hnak in nuam a timi zianghman a umlo.ziangruangah tile Pathain kilvennak hnuai ih nun cu a nuamtuk ruangah si. Pathian in kumpi kum khatsung thihnak, natnak le zatlaknak pawl lak ihsin in humhim ih ei le in ding rawl, hnipuan, kan hipding thlithiang, damcahnak le thlawsuahnak phunphun in pek ih tlunah 2014 kumthar ah in hlangkaiter tlahi ziangtluk in lungawi thusim ding so kan si. a liam cia kum pawl ah lungawithu na rak sim thiamlo a si hmanah 2014 kumthar ihsin thok in na ziaza thar hrangah sun le zan in Pathian hnen ahlungawithu sim daan a thaimtu si thalangaw. 

2.Sual sirnak

(Thufim 28:13) " Na sualnak thuh na tumah cun na hlawhtling dah lo ding;Na sualnak cu phuang in hlonhlo aw, Pathian in a lo zaangfah ding."

Milai sualnak tuah lotu zo hman an umlo zovek minung khalin sualnak an tuah. sualnak cu ziang a si? Pathian ih duh lomi tuah kha sualnak a si.

unau nangteh a liamcia kumah ziangsualnak so natuah? Pathian hmaiah siarcawklo sualnak natuah mi a um ko kha. a tlun ih Bible kan siar vekin 

na sualnak cu phuang in hlon aw, Pathian in a lo zangfah ding a ti. na sual nak bansan duh loin Pathian thu zir le ngai taima zet khal awla Pathain ih ngai damnak na co cuanglo ding. Pathian ngaidam zangfahnak na co duh a si ah cun tuikumthar ihsin thok in a liamcia ih na sualnak pawl kha sualsir / rim leh sual bansan, tuahnawnlonak thawn Pathian hnen ih ngaidamnak dil nak nunkha a thar in nei thlang aw.Pathian ngai dammi na si ding.

3.Nun hlanawknak

(Saam 37:5) " Bawipa hnemah na nunnak pe aw; Amah rinsan awla a lo bawm ding."

Nun hlanawk kan ti ruangah mah le mah that aw tahrat in Pathain hnen ih nunpek tinak lam silo in, Pathain sunlawinak hrang ih nun pumpek awk

sawn kha si.kumthar a hung si leveten kumpi kumkhat sung kannun daan ding kha a hmaisabikah Pathian hnen ah na hlan dah maw? tui kum 2014 a thok le veten na nunnak kha Pathian hnen ah hlannak nei aw. damcahnak na ngahnak hrangah, hna natuannak hrangah, le amah Pathian ramhrang ih pum napek awknak ding hrangah. Pathian hnen ihsin thlawsuah kan conak ding hrangah siseh, Khrih le a kohhran hrangih kan telnak hrangah siseh kumtluah ka nuntukhawsak daan ding sisehPathian hnen ah kan nun kan hlan aw pei uh. thlawsuah kan donnak ding lamzin a si."(1Peter 5:7)" Amah cu na zawn a lo ruattu a si.

4.Thuhrisahcatnak

(Joshua 24:15) " Bawipa nan ren duh lo a si ahcun tuihsuh ahhin hril uh; Mesopotomia ram nan pupa pawl ih an rak biakmi khawzing pawl maw nan biak sawn ding; a silole tuih nan umnak ram Amor miphun pawl ih khawzing pawl deuh so nan biak ding, hril uh. kei le ka innsang cun Bawipa kan biak ding a si," tiah a ti."

Thuhri sahcatnak / thutluknak timi hi milai le milai karlak ah thupi lawng silo in Pathian le milai kharlak hrang khalah lo theihlo in a ttulmi a si. a liamcia kumah Pathian khal ngaih saklo le ziang siarlo in na rak um tla a si menthei. tu kumthar 2014 ah sualnak maw natuah sunzom ding? Khrih hrnagah na thei tawk tein na tel sawnding? ni khatkhat ah na rinlo laiah na nunnak a cem leh ding. kumkhua nunnak ih a lo hruai thleng theitu maw, catuan siatralnak ih lo fehpi tu si na hrikl ding? a tu rori ah thuhri sahcatnak tuah loli aw. Joshua cun " Kei le ka iinsang cun Bawipa kan Biak ding tiin thuhri sahcatnak a tuah. 2014 a tu ihsin thok in nangkhal Joshua vekin Bawipa riandingah thuthri sahcatnak tuah ve aw. 

5.Mai sinak theihfiang awknak

(Isaiah 44:2) " Keimah hi a lo seemsuahtu Bawipa ka si. Na nunnak a seem vete in ka rak lo bawm zo. Zianghman ttih hlah; i riantu ka siahhlawh na si. Ka hrilmi, ka duhdawt mi na si."

Nangmah te'n zoka si ziangtin leitlun ah ka suak, ziangtuah dingah ka nung tivek pawl tla thu na ruat ttheu men ding. leitlun ah mah le mah theifiang 

aw cuca lo an tampi. Pathain in Isaiah hnen ah Keimah hi a lo semsuahtu Bawipa ka si a ti. Isaiah semsuah tu Pathain cu nangmah a lo semsuan tu khal a si thotho.Pathain in a minung si dingah le amah rian dingah a lo sersiam curuangah nangcu mi sunglawi le mi vanthabik na si. a tu 2014 kum thok in nathuhla kha thaten ruat awla Pathain in a thabik a hmin sunlawihnak ding hrang ih a semsiam mi ka si ti khal hngilh nawn hlah awla, Pathain amah riantu a siahhlawh i hril zo ih Pathian ih i duhdawt tuk ti khal kan cing ringring pei uh. maisinak kha theifiang ih 2014 sungah mah le thei tawk ten Bawipa rian ciao uh si.

6.Ziangtin Pathain hmin ka sunglawiter ding?

(Tirhthlah 20:24) " Sikhalsehla ka hrangah ka nunnak hi zianghman ah ka siar lo;Bawipa Jesuh in ttuan dingih i pekmi Pathian ih zangfahna Thuthang ttha phuan ding ttuanvo hi famkim zetih ttuan thluh thei ding lawng hi ka saduhthah a si."

Leitlun ih Pathain ih in sersiamnak san bik cu a hmin sunlawihtu ding hranglawngah a si. mitampi cun cuithu cu thei duhlo in sualnal phunzakip thawn Bawipai hminan siatter / an baalter.na nitin nunnak ah ziangtin Pathian hmin na sunlawiter? Paul cun Khrih hi a sangbikah hmaihngal

upatnak pek thei ningla ka duh a ti. cun a saduhthah khal le a nunnak hnak in Pathain thu hi famkim zet ih phuan hi a si. duhdawtmi unau Paul khal milai thotho a si, a tuah thei mi cu thuah thei dingah Pathian thauh theinak a thuthangtha phuantheinak, thlacaam theinak, mibawm theinak Pathian in bulpak ciar ah in pek cucu thei fiangin tui kum kumthar ihsin thok ih Pathian hmin sunlawinak hrangah kan thazang kan nunnak zaten pek ciao uh si. Pathian in a ramhrang ttuan theinak thazang, damcahnak le caantha inpek laiah hin kanthei tawkten Pathian hmin sunlawinak hrang tuan ciao uh si.

A siartu nan zaten kum athar ih thingkung thinghnah pawl an thlengawk ih hnahthar an cerh bangin kumtharah kan nunhlun tthatlonak pawl cu baan san ih Pathian thuah nuthar kan nei ciao theinak hrangah Pathian thlawsuah nak nan parah thleng hramseh. Amen...

By Salai Lal Biak Thang from malaysia