“Vawlei cung mitampi nihcun ttihmi zong anei lo tiah an ka ti tawn, asinain ttih mi hi tor le cheng ka nei ve ko, asinain Pathian ka zumhnak nihcun ka ttih dingzat asimi vialte lakin aka ttihter lo, Pathian he kan i ton hlanpiin Sersiamtu a um ko la tiin azummi ka rak si i, kum 16 ka si liao ah khan Pathian he kan rak i tong” tiin Bear Grylls nihcun acauk thar Ghost Flight timi an chuah ttum i an kawmhnak ah achim.
Bear Grylls hi ho dah asi hnga tiin i hallen theng ahau lem lo, TV channel ah( MAN & WILD )zohtu na si ve ahcun mingaihsanbak patling, pa ralttha asi zia cu chim len hau loin nan theih cio ko lai dah tiah ka ruah. A ho poh nih anu apa e ti loin ngaihsan hlawhmi pa asi, abikhmanh in nuhngak pawl nih an uar hlei ti asi. Abia le hla hi cu atlangpiin kan theih viar deuh thlu cang laid ah tiah ka zumh, asinain Pathian ai bochan zia belte kan theituk theng lem lai lo dah tiah ka zumh. Mirang pawl hi an chantiluan ning hi arang kan ti lai maw, atthawng kan ti lai dah, Pathian kan herh lo ti phunphai in an i la i, zumhnak lei ahhin an dal ve ngaingai, Biakinn hrimhrim kharmi zong zeimawzet an um ti zong kan theih fawn hna. Asinain TV i kan hmuh ning le kan rak theih hna ning hi an rak si thlu theng lem loh ti cu afiang.
Pathian zumtaktak, Conservative Christian timi hi rel cawk lo an rak um ve. TV i kan rak hmuh mi cin khi cu entertainment asi i, hi bantukin an khawsak ning a si lo zia cu fiang chinchin in theih khawh kan van i zuam lai. Bear Grylls nihcun nikum 2014, june ni 4 ah khan a cauk Ghost Flight timi cu achuah i, arauh hlanah ekvut an cawk thlu daim ko. Bear nihcun an kawmhnak ah hitihin a chim, “Eton timi sianginn i ka rak kai liao in ka nun hram ka rak i thok tiin ka ruah, kum 16 mi ka si i, sianginn kai hi ka rak huam lemlo, asinain tlangcung kai le Martial Art lei ah ka nun ka van pek deuh tik ahcun mah cu lei rumro ahcun ka thinlung cu akal. Scotlang i tlang cung kan kai kha nuam ka tiin kan philh kho hrim lo, thli le ruahkar lakah tlang kha kan kai ava si kaw, Adventure lei i, ka thinlung aka luahnak chan zong hi asibik ko rua tiah ka zumh” tiah achim.
Kum 16 mi ka si liao ah khan Khristian zumhnak taktak cu ka van hmuh khawh:
“Hi zumhnak hi Biakinn in ka neih mi, ka hmuh mi asi lo, ka hngakchiat liao te hin zettehimaw cu zumh mi hi ka rak nei. Kum 16 ka si ah khan Pathian lei i kaihruaitu, kapa bantuk bakin ka zohmi nihcun aka thihtak caah lungleng, vansaangin ka rak um, ka lung hrim arakrawktuk, thingkungah cun thla ka rakcam i, Na um taktak ahcun ka pawngah hin van i langh tiin thla cu ka cam. Cucu Pathian he kan i tawnnak ni cu asi, mahcu thawk cun Pathian ka zumhnak hi nikhat hnu nikhat atthang chin lengmang i, Pathian he hin i pehtlaihnak fekte kan nei, Biakinn ah hin kai khawm tam cuca loh, asinain nitin tein caan hman kai thawknak dingah ka ihnakah khupbilin Pathian sinah thla ka cam tawn, cuticun ka caan hman cu kai thok tawn” tiin achim.
Pathian ka zumhnak nihcun ka ttihdingzat aka ttihter loh:
Mi nihcun ttih nei lo tluk ahhin an ka ruah tawn, asinain ahman ning te ahcun ttihmi tor le cheng ka nei ve. Ralkap ka ttuan liao i, sky- diving accident ka ton ttumah khan doctor pawl nihcun ttihnakin kan nun hi ahman cang lai tiin an rak ruah viar mi ka si. Parachute in kan zuantlak ding hna hi ttihnak in ka khat ve tawn, asinain Pathian ka zumhnak nihcun keimah tein ka um loh tiin avan ka theihter tawn, cunihcun ka ttih dingzat zong ka ttih lo phah tawn. Zeizong vialte Sersiamtu he zeipoh hi kan pahnih in kan hmachon tlang tihi ka thinlung fiangtuki kai thlaih chih. Ka zumhnak nih hin lenglei Adventure lei i, ka vachuahnak ahhin nasatakin aka bawmh, aka kilhkamh, thazaangthar aka pek. A chelcaanah tlangah ka kai, achel caanah ramtangah ka vak chuak, hmuntin ahhin Pathian thil khuaruahhar tuahmi pawl hi ka hmuh tawn hna. Thihttihnak hi ka nei bal lem lo, aruang cu, thi sual ning law ka kalnak diktak ka vaninn ah ka kal ti hi fiangtein ka theih caah asi tiah ati.
Kapa kha rakdam rih sehlaw cu aw....!!!
Kum 20 mi ka si liao ahhin ka pa nih aka thihtak, kapa hi pa ropitak asi, mi lungtluang, nel um, capoh duhngaimi zong asi fawn. Ka hngakchiat liao tein tlangkai ning aka cawnpiak lawng si loin mah cu lei ahcun teirialthlak tein tha aka pek. Hawi le kom ngai dingin le cawnnak lei zong ngaihsaktu si dingin thazaang aka pek tawn. Cucu sianginn kai nak in ahlawkthlak deuh tiah ka rak i ruah. Ka ngakchiat liao ah khan cun ka ngaihsan ning le ka ngaih ning pawl kha mithmuh ah langhter ning ka rak thiam tawn lo. Rak dam sau deuh sehlaw cu aw, ka ngaihsan ning le ka ngaihzia pawl kha ka van chimh hnga dah kaw.
Mah le mah i zumhtawknak hi ka nei bal lo:
Hngakchia zakzummi ka si caah mah le mah i zumhtawknak hi ka nei bal lo. Sianginn kan dih khan ka hawi le nihcun Officer lei an zawh luaimai liao ah kei cu ralkap ttuan ka duh caah keimah tein duhthimnak cu kai tuah i ka duhnak cu ka zulh bak ve. Ralkap ka tlaknak khan mah le mah i zumhtawknak(confident) cu ka van nei ve. Vawlei sum le pai nuamhnak pawl hi ka huam zawng, ka uar zawng asi ve lem lo, asinain tlangkai hei tibantuk, ramtang vah hei tibantuk tu nihhin ka thinlung an ka lak deuh tiah a chim tthan. Cun anih hi kum 2009 kum ah khan Grylls hi kum 35 asi nain Chief Scout dinhmun si kho mi vialte lakah hngakchiacem ah thim arak si.
