Fiangfai-tein-Pathian-Aw-Na-Thei-Maw?

Pathian sin in arami nihcun Pathian bia kha an ngaih, sihmanhsehlaw nan nih cu Pathian sinin a rami nan si lo i cucaah cun nan ngaih duh lonak cu asi. (John 8:47)

• Acaan ahcun Pathian nih thang nawn in le fiang ngai khin kan nunah bia chim tawn. Asinain, atam u ahhin cun dintein kan nunah a chimh tawn. Cu ‘Aw ’ te cu;  ṭhatein kan ngaih lo asi ahcun theih khawh asi tawn lo. Cucaah fiangtein a ‘Aw’ thei khawhnak hnga abia nung ‘Bible’ rel dingah kan caan kan pek lawng si loin kan reltam hrimhrim zong hi akhun ko. 

• Kan ruahnak(sense) thinlung zong hi thilherh sisai lem lomi ruahnak sawhsawh ah hmang loin dingtein Amah leiah kan hngah zong aherh fawn rih. Pathian ‘Aw’ thei kho taktak ding cun  i timh sawhsawh nak men in angah loh, tangdornak nun neih ahau, lungsau ahau, culawng si loin ahleicein thianhlim nun a herh. Ahlehnak hngakin lungsau tein, daitein thlacamnak he kan hngak tawn maw?

• Biahalnak ka van tuah duh mite cu; Pathian ‘Aw’ thei dingin na caan na pe siang maw? Na caan na pe ngam maw? Na pe kho maw? Theih duhnak thinlung na ngei maw? Theih na hiar maw? Thei dingin timhlamhnak teh na nei bal maw?, timi te hi asi, mah le nun cio van zoh ṭhan phot hnik usih. 

• Bawipa nih asin i kan saduhthah, kan lungthlitum kan chim tawnmi hi vanin tup tiah atlangtlang in avan kan thlak tawn lem lo. Asinain, zeimaw caanah hin cun mithmuh tongh khawh zongin direct in akan lehnak an hmuhkhawh caan zong cu aum vetawn ko. Atam u hi cu; minung hmur le ka nih achimkhawh lomi kan ti lai maw, achimthiam lomi lam dangdang in akan leh tawn cu athlawchuah kan donmi vialte cu ṭhatein a ‘Aw’ kan ngaih tawn lo ruangah theithiam loin kan vui kan vai tawnnak chan cu asi ṭheu tawn.

• Adonghnak ah ka chim duhmi cu; Pathian hmaiah suallam ngai loin kan vui kan vai tawnmi hna hi, kan nunah Pathian nih achimmi ‘Aw’ fiang tein kan theih tawn lo ruangah asi. Na nunnak i Pathian chimmi ‘Aw’ fiangte thei kho ding cun ahmaisa kan chim bangin abia nung reltam usih, uar usih, caan pe usih, thianhlimnak le lungsau tein thlacamnak he alehnak hngak i zuam  usih. Cuti kan tuah asi ahcun fiangtein a ‘Aw’ kan theihkhawh lawng si loin amen men le asawh sawh ah Pathian hmaikaah vuivai ngam ding kan si lo zia kan i fiang kho lai. Bawipa nih atharin na nunah in thlawchuah ko seh.