1. Nupi pasal neihnak nih kan nun akan kilkhawi ṭha:
Nupi pasal neih hi nun i thlahdah lonak asi. Tlangval sauhtuk le nungak sauhtuk hi zeitlukin va fel ko hmanh zongah khin minṭhat khawh asi theng lem lo. Khilkhawitu le aneitu um in kan i theih lo tikah kan caanhman siseh, kan phaisa hmannak zongah siseh, khurkhua ruahduhnak tuk aum lemlo tikah caan zeiruaram loin hman afawi te. Vawileicungi rianṭuan hlawhtlin olbiknak cu nupa ṭangrual hi an si. Akan neitu le akan kilkhawitu bik ding cu kan nupi le pasal le hi an si. Pathian nih mipa lawng um cu aṭha loh ati ruangah Pathian nih minu apek. Nupa cu pakhat le pakhat ai kilkhawi tonh ding hi kan si.
2. Midang bochan thlak sinak pakhat asi fawn:
Kum upattuk tiang nupi pasal nei loin um hi thilṭha tuahnakah i chirhkanh ding atam ngai tawn. Duhtu neih lo ruangah si hleng lo khin kum upattuk deuh tiang nungak le tlangval in um hi mah nakin minih an helhkam deuh tawn hna. Minung hi nupi pasal i nei dingah Pathian remrauhmi asi ruangah nupi pasal nei loin sautuk um hi mi bochan awktlak si ding ahar.
3. Nun saunak asi:
Sii lei thiamsang mi hna nih an chim ning ahcun, nupi pasal nei lomi hnanakin nupi pasal nei mipawl hi an chan asau deuh tiah an chim. Zeiruangah ti ahcun, nupa cu nupa sinak an hmanruangah, asinain hibantukin hmang ve lotu pawl cu zawtnak phun dangdang nih olsam tein atlunh khawh lengmang hna ti si. Ka nupi ka pasal tiin thinlungin i thlaihchanmi neih lo pawl cu an thinlung avakvai tawn, curuangah rothil ṭha zong an khawl huam loh, an beidongh zong a ol cuang fawn. Kum upattuk tiang an nung kho lo ti si rih. Nupa sinak hmanpah lengmang hi thisen tlenghfainak caah aṭhatukmi asi tiah siibawi pawl nih an chim cio.
4. Nun hnangamnak pakhat asi fawn:
Atu kan chan ahcun nupi pasal nei lemlo zong khin nupa sinak hmannak aphunnphun aum ko nain thin diriam te le lungcim tein hmang loin thinphannak le mah le mah i phuhrungnak he hman ahauh caah hibantukin nupa sinak hmannak hin damlonak le zawtnak aphunphun achuahtertu asi ruangah nupi pasal neih hi aho zong nih an duhmi le tha an i pekmi cu asi cio. Thinphang deuh i nupa sinank hman cu, lungtur zawtnak neicia le bang an si sapbei ahcun azual ol chinchin. Mah le koppi, nupi pasal lungsi tein hman ding asil.
5. Tuamhlawmtu ah aṭha:
Mah le hnakruh, nupi pasal le tuamhlawm ning le kan nu le pa, u le nau tuamhlwm ning an thiam lo ti si loin, a nuamh ning, adiriamh ning ai khat bak lo, mah le nupi pasal thuamhlwm ning cu zeitlukin an kut thaphrephruappi asi hmanah arak i dangtuk ṭhiam ṭhiam. Athiang zong athianghlimtuk fawn. Pasal le zualhma ngaiin van zawt caan le bangah cun, chungkhat u le nau in i zuutmuai awk i aremlocin hna ahkhin mah le nupi pasal i zuutmuai piak cu ning zong azak lem loh. Chungkhat u le nau cu zohkhen an thiam deuh ko zong hmanh ahkhin mah le nupi pasal tuamhlawm he cun a rak i dang hrim ko.
Ṭhenkhat nu le bang cu mah pasal le pom le cawi hmanh i ningzak mi an um rih. Mah le koppi, mah taksacheu tuamhlawm ngaingai tlukin anuam le athiammi saya, sayamah, doctor tampi zong nih an tluk hlei ti si. Chiatni ṭhatni le bangah cun kan nupi le pasal tlukin ahohmanh akan tuarpitu le theithiamtu dang hohmanh an um lo. Nupi pasal timi cu ahopoh kan si ah kan vai zuut, kan vai muai ko hna, asinain damlo nikhua i van i zuut van i muaipiak timi hi thil ol cu asi lem lo, asinain hibantuk nikhua ko ahhin nupi pasal neih lo apoi ning le zohkhentu aherh ning, an tarhnu ko ahhin zohkhenhtu, kilkhawitu aherhning afiang chinchin.
6. Pakhat le pakhat phurrit i chawn asi:
Phurrit an zaangkhaiter ngaingai. Nupi pasal hi acaan ahcun phur an ritter bantukin khin va um tawn hmansehlaw biakepnawi, phunkim vanruahtaktak ahcun nupi pasal ṭha neitu pawl hi vawleicungah mivanṭabik lakah an rak i tel ve. Phungthlukbia 18:22 ah nupi aa hmuhmu cu thilṭha aa hmuhmu asi, Bawipa acungah aṭha ti kha alnaghter. Mawṭaw ṭhaṭha neitu cu thilṭha an nei ati lo. Pasal nei mi hngaknu cu silhfenh an neih le neih lo ding cu apasal cungah aihngat cang. Pasal zong khawlakah silhfen ṭetneknuk he atlanlenter lo tu cu anupi asi tawn. Nungak fel le fim ngang kum 30 lengcang mi cu tefa ṭha nei cangmi nupi he cun minih an zoh ning le an hmuh ning ai dang deuh. Pasal aneih duh lonak achan le ruang chim ding tampi cu a nei ko lai nain aṭangkaituk lem lo. Nupi pasal hi phurrit pakhat le pakhat kan i phurh tonnak lam tampi aum. Thil poimawh pakhatkhat aphak tikah, an pa mawh, an nu mawh, tiin mawhphurhnak zawnah kan i theithiampi, kan mah lawngin kan tuarti lo, tuarpitu kan nei, theihpitu kan nei. Kan bulpak min asi ti lo kan nupa min in asi cang.
7. Kan tlinnak zawnte i hmuhsak thiamtu dingah:
Nupi pasal tlinlonak hmutu dingah si loin atlinlonak zawnte kha nangmah ruangah mitling asi khawh ding kha asi. mah nupi le pasal akengkawi khotu cu mi zeipoh nih an upat zungzal ko hna. Mah le koppi sawisel hmangmi cu minih ahnunlei in kutchutum an pek tawn hna. Na koppi cungah mirh ziiziai tein um khawh i zuam law nupi ṭhate si an in ti ko lai. micheu khat cu tangka hawl thiam ngai i, fale zohkhenh thiambak lomi an um fawn. Mikomh thiam ngai i rawlchumh ah rinhtlak bak lomi an um fawn. Na koppi na theihthiamnak, na ngaihthiamnak kha nupi pasal tling na sinak tak cu asi ti kha philh hlah. Ahopoh hi kan tling viar, kan tling lo viar ti hi kan theih aṭha.
Nan pa theih loin lengchuak hlah, khauchia na tong kho
Na nupi lungtlinlonak tel loin inndangah va leng hlah. Biaṭha lo na theih sual lai.
Taksa athaktuk i kheuh loin um khawh asi lo bantukin nupi pawl nih tuahpiak hau mi, pawimawh ngaingai an nei tawn tihi theihthiam piak khawh i zuam
Nupa sinak hi midangdang diriamhnakah hmansian ding asi lo. Nupa kopkim lawng nih diriamtein hman lawngah asunglawi.
Pasal nak nupi nih ngiarnak hi ataktak an si deuh ṭheu. Diriamhter khawh an hau.
Pumpeknak hlawhtling bik cu mah nupi le pasal sin i i pumpek hi pumpeknak hlawhtlingbik cu asi. Na pasal sinah a pumpulukin i ap khawh i zuam.
Nupa atuleklek i ai ṭhen mipawl fale pawl khi an ral achia, thilṭha tuah an ṭih tawn.
Nupi le an lung ai lawmh ahcun an fale zong an i dawh khun ti si.
Amah koppi taksa uilotu nihcun amah le mah hrangah thilṭhalo ai ser tinak asi.
Na koppi cungah holhkam hrang le holh ṭha lo chim hmang hlah.
Nupi pawl thilkuai kho bantukin dimhdorh an hau. Innchungkhar dawhtertu le rawkter khotu an si ruangah dawtthiam an hau.
Nu pawl nih an chimmi dihlakin zumh ding an si loh, achan cu biachap an hmang. Nupi pawl hi dimhdorh taktak an hau nain, nupa sinak hman lio ahcun dimhdorhtuk an duh lo ti si.
Mah nupi si lomi ihpi cu thil poitaktak chuahpitu asi bangin mah pasal si lo ihpi aduhtu nu cu ramlak saram bantuk an si i chansau dingin an i tlak lo.
Nupi pasal lungrualtuk cu Pathian le thihnak ti lo cun zeihmanh nih ṭhenkhawh an si lo. Setan tibantuk menmen nih ṭhenkhawh mi thil asi lo.
Chirhchan cauk : Nupa nunnuam si dingah timi cauk chung ta asi
No comments:
Post a Comment