Messiah he i ton hi nun danlamnak asi:

Kan Bawipa Jesuh Khrih he ai tongmi hna nunah zeibantuk thilset dah aphan timi cu ahopoh nih kan theih hiar zawng asi ve ṭheu lai dah tiah ka zumh. Bible chung kan zoh asi ahcun Jesuh achuah hnuah arak tongngahtu pawl nun kan zoh asi ahcun thlarau lei ah thazaang kan i lak khawhmi thiltete an um len hna. Cupawl cu atanglei bantukin van zoh khawh i zuam hna usih:

1. Simeon nunah: (Luka 2:28-35)

Pathian salpa Simeon nihcun Khrih Jesuh ahmuh tikah apom i hitihin Pathian sinah lawmhnak bia achim/ athangṭhat, “ Nihin ahhin, maw Bawipa, nangmah nih na salpa cu daitein ka rian na ka limter cang, atu cu nangmah na biakamnak kha atling cang” tiah ati. Vawilei cungah hin kan thlarau chim lo, kan lei taksa tihal hmanh khim le khop in kan riamter kho lo, lei chaw le va, rumnak, hlawnthil, hmun le lo le ram vialte hmanh hi nei hmanh hnausihlaw, hnangamnak, nun diriamnak taktak akan pe khotu hi an um hrimhrim lo. Asinain, Nazareth Jesuh Khrih nun chungril taktakin atongngahtu/aneitu lawng nih nun hnangamnak taktak cu an ngeih tawn.

2. Mifim pawl nunah: (Matthai 2:11-12)

Khuachak lei mifim pawl cu Khamhtu Mesiah tong dingin ramhlapi in an i thawh. An va hmuhtikah lunglawmhnakin an khat i laksawng an pek. Khrih Jesuh atong ngahtu taktak nihcun an nunah seherhnak, zawnruahnak in an khat i mahhrang lawng an ruat bal lo, phundang in kan chim asi ahcun an i umpi sawhsawh thiam lo, an i lawmhnak hi tuahsernak in an langhter tawn asi lo hmanhah chim ve phuan ve duhnak thinlungin an khat.

Mesiah an va hmuh i laksawng sunglawi an pek hnu ah, an ratnak lamṭhing in kir ti loin, lamdangin an tlung, an lam ai dang diam. Jesuh Khrih atongngahtu taktak nihcun avawlei nun nuamhnak, diriamhnak lam kha azul duh ti lo, amertak riangmangi anun ah lamthar azawh, phundangin kan chim asi ahcun Messiah atongngahtu taktak pawl cu an lamzawhmi ai dang, vawleimi tisami he zeitikhmanhah an lam zawhmi ai lo kho bal lo. An nun ning ai dang hrimhrim.

3. Tuu khaltu pawl nunah: (Luke 2:8-20)

Vancungmi nih tukhaltu pawl sinah Khamhtu (Messiah) kha achuak cang timi thawngṭha achimh hna hnu ah, vancung ralkapbu nganpi cu vangcungmi sinah khan an rung lang i Pathian kha hla in an thantṭhat: “A sangbik van ahkhin Pathian cu sunparnak hmu ko seh, cun adawtmi hna umnak vawlei ahhin remnak um ko seh,” tiah an ti. Vancung mibupi an kir ṭhan hnu ahcun tukhaltu pawl cu Messiah cu an va ton. Tuukhaltu pawl nih Messiah an va ton tikah lunglawm ngai in Pathian cu an thangṭhat.

Khirh Jesuh thinlung taktakin atongtu kan si ahhin cun amah thangṭhat le cawimawi loin kan um kho hrimhrim lai lo. Cubantukin tuukhaltu pawl zong kha Khrih an tontaktak hnu ahcun an ṭhut hrim arem ti lo, an i sumkho hrim ti fawn lo, chim le phuan darh zawkzawk ko khi an duh, an hiar. An nun petu Pathian fiangtukin an i theih caah an kut le ke, an taksa ruangpum in Khrih sunparnak caah hman an duh i, nuam an tibik mi thil zong asi fawn.

Tlangkomhnak: 

============

Khrih Jesuh (Messiah) he ai tong ngahtu nun ahcun kan taksa ruang pumpi hi amah thangṭhatnak le sunparnak ah zeitlukin kan rak hman awk asi zia fiang tein an hngalh khawh lawng si loin, vawlei cungah mi nihlawhcem le mivanṭhacem hi kan rak si. Halleluiah Amen. 

Question: Khirh he kan i tong taktak cang maw ti belte cu bulpak kan nun cioah kan biahal si ko seh.

“NA DIHLAK IN MERRY CHRISTMAS TIIN NAN KUT KAN TLAIH HNA”