VANLEI PROGRAME:

Jesuh sinah Lazaras damlo thawng an thanh, sihmanhsehlaw adam lo ti atheih buin nihnih a camchap Johan 11:6...

A MAKTUK AI!!  a dam lo ti atheihbu ko zongah nihnih a va cam chap rih ti kan hmuh. Mah hi zawnah afaingtuk mi pakhat cu zeidah asi ti ahcun dam lo damter lawng hi Jesuh Khrih nih aitinh mi asi lo ti hi asi.

Awle asi ahcun, na dam lo i thla na cam, asinain na thlacamnak aphi(result) le na hmu fawn lo, na buai ve tawn asi lo maw??? Bawipa nih aka daw lo le asi lai heitibantuk maw, ka zawn aka ruahpiak duh lo le asi lai heitibantuk maw, kan ruahnak akip le akawi ah arak vak len kho ko, asinain kan Bawipa nih khan Lazaras a dawttuk ko asinain adam lo thawng atheih bu in, nihnih ahlei in a umnak hmunah va panh loin a um ti kan hmuh, kan theih. Duhning kan nei cio tawn, asinain Bawipa Prpgrame a rak i dang diam tawn tihi kan theih a herh. Bawi Jesuh kha um sehlaw Lazaras damlo i um mi kha adam hrimhrim lai ti zumhnak nei in, Marthi le pawl kha rak buai len ko hmanhhnasehlaw, Bawipa Jesuh kutcak i langh dingin, van lei programe arak si ziar rih lo.

Van lei programe si ttung lo ahhin, vanlei hawih in kan mah

ruahning in heh tiah kan rak i nawrsek tawn ttheu, mah hihi kan tuah lo ding i kan theih ding mi thil an si.  John 11:11 ah zeitin dah kan hmuh ti ahcun JESUH nih Lazaras aa hngilh, thawter dingin ka kal lai tiin a zultupawl sinah a chim hna. A damlo lio ah a umnak hmunah ai um i, athihhnu hnu lawngah Lazaras cu a va panh. Amah Jesuh nih cang 15 chungah cun, {cuka hmun i ka um lo cu kan lawmhpi hna, nan zumh khawhnak caah tiah a van chimh chin lehlam hna. Lazaras damlo nak hmun i a um lo kha Jesuh nih nuam arak ti deuh khi arak si deuh, Mary le Marthi nih Lazaras damlo ruangah Jesuh an auh khawh lo lio caan ah, damlo thihnak nak nihcun Jesuh a van auh khawh. Bawipa hika ahhin nang um law cu, kanu ttapa hi a thi hnga lo ding nain tiin Marthi cu a ttap, damlo damter dingah Jesuh cu a herh, a duh, Asinain Jesuh nihcun damlo thih caan kha a hngak hoi fawn.

Damlo damter nakin a thukdeuh mi  van lei programme cu an raktheithiam kho hrim lo, John 11:25 chung i kan zoh asi ahcun vanlei programme asi zia fiangtuk in kan theih khawh, kan hmuh khawh, “Kei hi thawhtthannak le nunnak cu ka si” tiin Jesuh nih a chim. Pathian sunlawinak lang ding cun damlo cu athih arak herh tinak asi. Damlo damnak pek aiin a sunglawi deuhmi thawhtthannak le nunnak hmang cun Marthi lepawl an ngaihchiatnak, an lungfahnak, an aihramnak pawl  cu damter an rak si diam ai. Marthi lepawl nihcun Lazaras damlo damnak dingah Jesuh an herh ti kan hmuh, adamter khawh tizong an zumh asinain a thi cangmi thawhtthannak belte an rak zum kho ziar lo, kan damlonak damter dingah Bawipa kan herh, kan harsatnak hmun le kan retheihnak hmunah thawhtthannak thiltikhawh zia hi kan rak zum in kan rak ruat ban kho hrim tawn loh. Kaazawn te ahhin thlacam nak he theihthiam khawh i zuam hna u sih.

Kan harsatnak le kan buainak bawmtu dingah Bawipa cu kan herh, kan auh tawn, asinain Lazaras a van thibak i, thawhtthannak hmangin a sunlawinak cu tarchuah i a van umbantuk te khan, kan nih zong hi kan nunah tuar khawh lo tiang ding i kan ruah mi, thil harsa kan timi, ngaihchiatnak, lungretheihnak, aphunphun zong asi ko hnga, asinain cu vialte an mualpho nak hmun ah Pathian hi a van i lar tawn, parchuah hram a van i thokka te hi a sitawn. Kan duhmi le Kan herhmi Asinah kan halmi vialte dong thlu ding le hmuh thlu dingin kan i tim, kan i ruah tawn hi cu, a va hruhthlaktuk hringhran, thihnak cu thawhtthan nih a teibantuk in Pathian sunparnak kan hmuh khawh nak ding ahcun kan mah kan nun i, kan Lazaras hi kher hi, arak thih hmaisat hi arak hau tawn.

Na damlo ti kha Jesuh nih a thei lo asi lo, harsat, lungretheih, na cungah aphan tikha a thei lo asi lo, an philh zong asi hlei lo, asinain kha vilate cung i, Bawipa sinah kan beiseinak thinlung kha, beiseinak dik lo asi ruangah, vanlei programe arak si ttheu tawn lo.Na thlacam nak kha Bawipa nih a thei lo asi lo, na nunnak te i, na theih lomi te kha pei, Bawipa nih ai timh tawn mi cu asi tihi thei tthan hna usih, culawng  si loin kan mah le kan mah, kan Lazaras hi a thihhmaisat zungzal i, thawhtthannak thiltikhawhnak cun na/ka thlacamnak cu leh akan timh zungzal tihi athar van thei tthan hna usih tihi, Bawi Khrih min kan sawm hna. Vanlam programe ahhin cun nungcung in thi timi hi arak si.

BAWIPA nan dihlak cungah atharin thlawchuahnak in pe ko hna seh.