Thil ziangkim khal hi kan pathian an si thei, ziangkim khal cibai kan buk hmuahhmuah hi, thil ziangkim khal kan caantha bik le kan caan tambik kan pek mi hmuahhmuah pawl hi, abik in Pathian hnen ihsin kan ruahnak, kan zumnak in peengtertu, in fehsual tertu thil hmuahhmuah hi, kan hrangah pathian lemah kan theih lo laiah kan rakbia thei ringring tihi kan theih hmaisat attul, culawng silawn kan mai ruahnak le kan theih nak rori khal hi kan rak pathian thei ziar fawn.
1). Pathain thuhnuaiah maw , nangmai theihnak hnuaiah saw na kuun??
Na theihnak feeling, ruahnak in a lo thunun maw, a lo khal rero sawn saw, ka theih awknak in ti buai lo, himi thuhnuai lawngah si ka kun ttheu, thildang ziang hman cibai ka buk dah lo na ti men thei (Luke: 4 thu hi kan ngaihtuah hnik pei uh, Bawi JESU in ramcar ih ni 40 le zaan 40 rawluh ih a um lai caan ih Setan ih athlemnak kha, thlemnak, turhforhnak hi kan tong hrimrhim ding hi asi, zohman turhforhnak pumpelh thei mi kan um lo, tukforhnak pumpelh thei ding khawp ih thlarau mi a um thei lo, hmelma pa cun tuttum tal cu cibai i buk awla ati, hmelmapa cun a mah cibai in bukter hi athil tum, amission tumpi pakhat cu asi. Amah duhdan le aremruatnak vek in tuih kan cen rero nak leilung ahhin buainak le in tibuai theitu an va tam lawmmam em. Tluang le hngilzet ih khuaruah thei lonak khal hi ruah tham hi a va si em!!! Hmelmapa thiltum asi.
2). Lungsi tein ziangah Pathian na thangtthat thei lo??
Mitam pi cu ziang ruang bik ah si pei thinlung ruahnak tluangte le ding tein Amah Pathian bia dingah second sawmthum hman thlacam thei loin an um ruangah an bei tiang adong ttheu. Hi mi nun hawrkuam hi zumtu a mi le fa pawl in kan ton ttheu mi an si, thawzet le ruahnak dingfelnak thawn Amah kan biak thei nak dingin kan dil ringring attul, hihi hngih hlah usih. Kan nunnak ah thildang hnak in ngai pawimawh sawn dingmi kan sim tikah a cu hnak ih ngai pawimawh sawn dingmi kan nei tthentthen ding a zum um. Leitlun ih mibuai tak hi cu kan va si ngai em, ziangbik kan ti tiin in sut abangta sehla kan tuah le kan ttuan mi sim mumal ding thei lem lo khal tor le sengin kan um ko ding a zum um. Mitampi hrang ahcun chet law maw tiih sungvu nisa mangkeng ih kan ttuanak mipawl khal hi in ti beidong tertu ah an cang sal ttheu. Asan cu nileng ih kan buai rero nak khan zianghman in thlen ttheu lo ruangah arak si ttheu. Kan Bible ahcun in ti hnoktu le in dawnkhamtu pohpoh cu hlonhlo ih Amai Jesu lawnglawng zoh ih focus dingah in fial, in duh asi.
3). Pathian rethmaisat bik hi kan hna, kan tiding mi si seh
Na caan na hmannak ah le na tangka na hmannak ah siseh na kilkhawinak hmun khalah siseh na duhdan vek in Bawipa na hnaih thei, na duhdan vek in na caan khal na pe thei, ziangtluk in na siang ti sawnah a hngawt sawn. Mi, Bawipa thawn laicin nak ttha, tlo le hnget zet, A awkhal theiih nunhahdam zet i nung kan va hmuh tikah, an mah bangtuk si ka va duh ve nan aw, an nundan a va mawi em, ka temve sin cak, tiin awt ve menmen hlah usih, an duhnak men le an neih mi thil, thlawsuah an si bik lo ti hi kan theih attha, an nunnak phenah ziangmi an tuah i, ziangvek in Pathian thlarau thawn nuntlang, leng tlang thei dingih an nun, an neih thil, an caan an pek timi kan theih hmaisat attul, sim vivo cun tampi sim cawk lo a um ko ding nan, kan sim thluh thei lo ding ruangah an nun ihsin kan zirding mi siseh, kan rethmaisat dingmi thil hi ziang asi tihi thei fiang lo ih nun hmangtu kan si sual pang ding hi a va phan um em, zumtu nunnak hrangah attihnung bik mi lak ih telmi pakhat khal asi.
Thukharnak:
A ngaingai ti ahcun kan duhbik mi nei thei dingah cun thildang, ttul sawn mi kan nei thei cuang lo asi lo sawm? Curuangah ka sim duh mi cu ziang si tile, tu ahhin ziang si kan ttulbik mi le ka mamawh bik ti thei loin ziangtik tiang saw kan mai ruahnak pathian le kan mai theihnak pathian, kan mai hmuhnak pathian tuah awk cop in kan nun hi kan hman vivo lai ding, aw zumtu tthanghharh a cutuk zo, ziangvek pawl hi saw an si ka Lal Pathian rethmaisa thei lo ih i tuah tu hi tiin kan nun X-ray, check awsal hnik u sih, kan nunnak ih thil hmaiabik hi Aduh cucu ziang asi pei, ziangtinkim, ahmuahhmuah ahhin kan hnen ihsin Ahmaisabik aduh tihi, a thar in theisal usih, kan caan hmannak ah siseh, kan sumpai hman nak ah siseh, kan innsang, kan rual pawlnak tiangin in siseh, Amah in pakhatnak a duh, a hril asi. Ziangmi ah si ka thazaang, kan ruahnak, ka fimnak, ka sumpai, ka hriselnak, ka caan ka pek tam bik ttheu, ziangnak ah, kan pek tambik hi mi fiang te ih kan thei fiang ngaingai silen kan nunak ah Bawipa in a PAKHATNAK AH LALNAK A CO RINGRING THEI DING. BAWIPA IN LO THLAWSUAH HRAM SEH.
No comments:
Post a Comment