NA NEIHTAWK AH LUNGAWI THU SIM AW

( Matthai 14 : 13 – 21 )

Jesuh Khrih leitlun a lenlai ah, thilmak tamzet tuahmi a nei ih, cumi lak ihsin sang panga le nga pahnih hmang ih mi thawngnga rawl a darmi khal hminsintlak a si. Thawngnga timi hi mipa lawng an si ruangah, nauhak le nunau tel cun an tamzet ding. Ziangkim tithei a sinak thawn zoh cun, mi thawngnga lawng hman si lo in, leitlun mipi zate khal rawl a dar thei ding timi cu el theih lomi a si. Cumi lak ah, Jesuh Khrih in sang panga le nga pahnih tlun ih a thil tuahmi hin thazang thar mi a pe zet.

Jesuh Khrih cun Nauhak pa hnen ihsin an rak kenmi sang panga le nga pahnih cu a lak ih, “Pathian hnenah lungawi thu a sim…” timi kan hmu thei. Ziangruangah lungawithu a sim? Pathian in khai thil malte hmangin, mi tamzet rawl a dar ding ti a theihfiang ruangah lungawithu a sim ih, cui a lungawi thusimnak ih rahsuah cu, “An ei theh hnu ah a hleifuan bawm hleihnih an khawm” a si. Jesuh Khrih cun a kut ih umsun mi te ah Pathian hnenah lungawithu a sim ih, cumi cun thlawsuahnak khal a thlen hngal a si.

Tufang ih kan neihsun ah kan lung a awi thei maw? Kan neihsun ah kan di a riam maw? Kan neihsun ih kan di a riam lo a si ahcun, kan diriam lomi kha kumtluanin aihram rero phahin kan nei lanta ding. Asinan, kan neihsun, kan par ih a thlengmi ziangkim ah, Pathian hnen ah lungawi thu kan sim thiam a si ahcun, a phen ah Pathian thlawsuahnak a rak um ringring theu ih, kan neihmi sunte kha Pathian in pungthang nei in thlawsuahnak in pe ding a si.

Pathian cun kan neihsun, kan kut ih ummi parah ziangvek lungput kan nei timi hi a zoh ringring. Tufangah dinhmun thalo zet ah kan ding, harsatnak kan tuar reo a si hman ah, Pathian parih kan lungput hi dik seh. Pathian cun kan parah thil a tisual dah lo ruangah, kan Pathian hnenah lungawithu sim sawn ding kan si. “Na neihsun te ah, Pathian hnenih lungawi thusim thiam na si ahcun, na neih dahlomi tiang Pathian in a lo pe thei a si”.

“Na neihsun te ah, Pathian hnenih lungawi thusim thiam na si ahcun, na neih dahlomi tiang Pathian in a lo pe thei a si”.