BAWIPAI JESUH IN RALRING DINGIH IN CAH MIPAWL ARAK THLENG CUAHCO THLANG

Pathian hnat’uantu pawl ka sawiselnak si lawn, tulai kan sanih Pathian hnatuantu pawl t’henkhat mitin vun cuan cun maw, fihnung, Bawipa duhzawng asi thei na cingih tuahduh lo tahrat ih mahduhnak sawn thlunih anomnak men lawngih rongbawltu pawl vun hmuh hin cun maw anunnak zinzawh mi le an hmailam khua hi a va em..!!! Bawipa Jesuh cun nang le kei hnenah Amai nunih a hngat awtu pawl hrangih theih dingmi pawl cu ziangmi an si kan theih apawimawh zet, Mitampi cu (JESUH) vekin rel awin mitampi bumin an um ding thu in sim kha a va diktak em!! Kan leilung tlun kiltin kan zoh asilen zirhnak mak taktak, Jesuh rori vek ih salaw khal an tam, an um hnauihni ngai. Kan leilungpi cu rel loh kan ram, kan khawtlang hmanhah rongbawltu pawl zirhnak mak taktak theihding an um vivo thlang ti hi kan theihfiang apoimawh nasa. Tulai rongbawltu t’henkaht pawl nundan, an nuncan, kan theihthei nak dingah Athuthianghlim Bible bung le caang kan vun zohhnik pei uh,  JESUH kan tlunih  arak thlentik ah kan rak theihthei nak dingih in timi  asi. Curuangah t’haten khan rak siar ve aw; theih rak tum hram aw;

(Marka 13:5-6)

Jesuh in a sang hai ih an hnenah hitin sim a thawk, “Zohman in an lo bum lonak dingah varalring uh. Ziangah tile, mitampi ka hmin in an ra dingih, “ Khrih cu keimah hi ka si,” tiah mitam pi an bumding.

(Matthai 24:4-5)

Cule Jesuh in ahnenah hitin a sawm hai, “Zohman in an lo bum lonak dingah va ralring uh. Ziangahtile, ka hmin in mitam pi an ra dingih,  mi tampi an bum ding.

(Luke 21:8)

JESUH cun, “Zohman ih an lo bum lonak dingah va ralring uh.Ziangahtile, ka hmin in mi tampi an ra dingih, “Keimah hi Khrih ka si,” tiin le, “A caan khal anai zo,” tiah an ti ding. Cu tikah an dung va thlun hlah uh.

Leilungtlun hmun zakip ih um milai pawl hi zawiih thlah kan si pei?? Bawipa ramkauhnak dingah, sunlawinak dingah rong kan bawl kan titak nan, kan Pathian hnat’uantu t’henkhat kan rongbawl dan hi ningzahthlak hi a va si t’heu em!! A thuhtak amuril sungih lutih coihsuak lo hin, kan ruahnak men le kan nunnak lenglam luangliam men men in kan aupi tamsawn thlang, A thutak, eitlak si loin, ngainuam men, hngawng tlunlam, kaa lawngin duhthusam ih relnuam titu rongbawltu tor le seng kan um zo leitlun, leitlun cu rel lo, kan nih laimi, chinmi lak khalah relcawk lo kan um zo. Ziangvek in so cung PATHIAN ih minung pawl in hmuh dan mithurel mimen tawk loin Bible sung mi a thu rori kan vun zoh pei. Ziangvek ih thusim ding le thusimtu kan si ka vun zoh pei.

(Matthai 12:34)

 Nan nih cu rulturnei cithlah pawl nan si. Mit’halo nan si laiah ziangtin at’hami nan t’ong thei ding? Ziangahtile, kaa cun thinlung sungih a khat mi a t’ong.

Tui kan san kan hman rero mi, kan cen rero mi hi lei ahhin rongbawltu siarcawk lo torleseng Pathian thuthangt’ha rongbawlnak ihsin sunzawn thei nawn lo ding le t’uan thei nawn lo dingih dinhmun athleng tu an tamtuk zo, cuvek rongbawltu cu ziangvek milai, rongbawltu an si pei? Hinah kan theihding um cu ziang asi tilen, Bawipa Jesuh in in cahta mi A thu kan vun zohsal pei..

(Rom 1:25)

Pathian thutak cu thuphan ah an thleng. Sersiamtu hnak in sersiam mi thil sawn cu bia le rian in an um. Sersiamtu cu kumkhua thangt’hat in um seh. Amen.

Thuthangt’ha ruangih  kan tlunah ziangvek harsatnak a hung thleng asi khallen, riahsiatu sisawn loin lungawi sawn ding kan si. Adinhmun ihzir in kan nunnak tiangih liam a t’ul hmanah ralt’hazet le A hmin sunlawinak dingah kan pek ngam sawn ding hi arak si. Pathianthu theifiang lotu hnenah bum ih an um lonak dingah nang le kei tuahsuak ding le t’uansuak dingah in duh asi. Asiammi minung t’ih rero hnak in in sersiamtu Bawipa t’ih a t’ha sawn. Curuangah a thudik hi ralt’ha le felfai tein sim le phuang kan zuam sawn pei. Kan nunnak ding hrangah kan thinlung kan nunnak in luahkhattu ding hrang ahcun himi bung le caang, a thute hi luahkhat ter sawn u sih, cumi cu kan taksa thlarau hrangih rawlt’habik asi ding.

(Philipi 1: 21-24)

Ziangahtile, kei ka hrangah cun nun hi Khrih a si ih, thih cu hlawknak asi. Sikhalsehla, taksa ih ka nun vivo asile cumi cu ka t’uanbangnak rah suahtertu ding asi; cuticing cun ziang ka thil sawn ding ti ka thei lo. Ziangah tilen kei thil pahnih lakah awlawksawngin in ka um, fehsuak ih Khrih thawi um duhnak ka nei; cumi cu a t’hasawn mi asi.Sikhalsehla taksa ih ka um hi nanmai hrangah a t’ul sawn.

Ka Bawipa Jesu ih in cah vekin hmuntin, khuazaramkip ih fehsuak in athuthangt’ha ausuahpi dingih thupek, fialmi kan si ti theiin, tomen hlah u sih, Athu hi um menmen pidingin in ti lo, kan hnatheih men ih sim mi kan si lo, nang le kei hi, fehsuak ih Amaicahnak, fimnak rinsan ih hmainor ih rundamnak thuthangt’ha hi ausuah pidingin in fialmi kan si. A thuailam ih bung le caang hi ka vun zoh Pei:

(Luke 4:18)

 “Bawipa thlarau cu ka parah a um, Ziangahtile, miretheipawl hnenih thuthangt’ha sim dingah hriak i thih zo. Thinlung kekkuai mipawl damter dingah, saltang mipawl hnenah suahnak thu sim dingah le mitcawpawl in khua an hmuh theisalnak dingah, nehsawh tuartupawl zalenter dingah le Bawipa duhsak kum thu phuang dingah i rak thlah asi.”

Leilungtlun huap si loin, kan mai chinmi, laimi hnenah hi vek rongbawlnak hi ziangvek asi pei tihi t’haten fiangte’n rak zoh ve hnik aw, rak ruat ve hnik aw?? Mah ruahnak men ih t’habik titu si maw, rorel t’heutu, Pathian duhdan sawn silawn mah remruahnak sawn ih hngawt awtu hi zo asi ti khal rak ruat ve cih aw? Kan ramah rongbawltu t’henkhat pawl cu atlun ih kan Bible thu vek in fehlem lo, anuam nakcin ih rongbawltu, thlarau sualsal sungih tang mipawl, hruaisuak tu le zawnruahnak taktak nunneitu cu malte bak kan si lo t’heu, kan thiltum le kan tuah dingmi taktak, kan Bawipa in in fialmi taktak kan duty atam sawn cun kan mai t’anghmasial nak le duham nak siseh, anuam cinih rongbawlnuam kan tituk ruangah ka tihding bikmi kan t’helh lel lel atam sawn cun, hihi kan theih at’ul, kan ralrin a t’ul.