US nihcun an ram le an tuanpi mi ram pawl hrocer tu cu, Iraq tapung, misual pawl, Islamic State (IS) tepung pawl cu hrawhviar dingin le nuai viar dingin a van chim than cang. US Defence Secretary Chuck Hagel nih cun, "Pentagon nih IS thiltikhawhnak hrawk dingin atheih mi zeipoh a ti lai,"tiah a ti, mahhi rual ahhin Iraq ramah cozah hnget a din khawh zau nak hnga a chim fawn. IS tapung pawl nihhin Iraq chaklei le Syria ram ṭhenkhat pawl lain umhmun an khuar i, ram cau chinchin lak dingin heh tiah hmailei nawrin hma an la cuahmah ko. US nihcun Iraq chaklei IS pawl ai do cuahmah mi, Kurdish ralkap pawl bawm dingin vanlawng hmangin akah hna pinah bomb hmangin IS hmun pawimawh zeimawzet cu atlak i an i rawk cang tiin theih asi.
August thla khan IS- pawl nih hin American journalist, James Foley cu a lu an tanpiak i, hi video hi internet-ah a hluanh cucun US cu IS lakah betak thlak i an kah hna nak hi din dingin an hrocer fawn hna. Hi hnu, nihnih niah khan American journalist dang, Steven Sotloff zong cu a lu an tanpiak nak video an van chuah than hoi, US an hrocer cu an ti menmen lo ti langhter nak caah an hman mi asi. Tapung pawl nih hin US le a lungrualpi mi rampawl cu US lak in i thiarfihlim dingin hrocer in, an chimning bantuk in an zulh lo asi ahcun British mi an thlaih lio mi, David Haines cu kan thah t'han lai tiah an leh fawn hna. David Haines hi British ralkap hlun asi i, chawmdawlnak riantuantu lak ai telmi asi.
US Vice President, Joseph Biden nih cun US- nih IS cu hell tiangin a dawi lai, tiah a chim. IS nuaiviar dingin an do chih thluahmah rih ko lai tiah a chimchap rih, mahhi hrangah hin ramdang pawl zong tuanpiin tangrual ding zongah a sawm colh hna. Biden nih cun, "America mipi pawl cu IS ral pawl theinak lengmang pi tiangin a cakmi asi, an tum zong a ruh," tiah a ti fawn. Mi dang pawl nih America mi le sa hibantuk in an sersatnak an tuah hna asi ahcun, an hnungtawlh hrimhrim lai lo i, zeitik hmanh ah an philh bal fawn lai lo tizongah a chim chap rih fawn.
Britain zongnih IS- pawl nih hin British mi an hren cuahmah mi cu thah dingah an hrocer thanhna ruangah, daite cun an umtak hrim lai lo tiin a chim. UK Foreign Secretary Philip Hammond nihcun David Haines him khawhnak dingah a theih khawh chungin hma alak lai tiah a chim hnu ah a herh asiah cun vanlawng i kahnak zongah an i tel ve lai, tiah ati. France President Francois Hollande zongnih i tuar ve ti loin IS- pawl cu fak deuh i ralkap cahnak hriamhrei hmangin kah an hau tiah a van chim ve fawn.
Nithumni ah khan US-ah Sotloff- chung le pawl le a hawi t'ha t'henrual pawl nihcun an theih zungzal nak caan serh an hmang, Sotloff- hawi t'ha le an chungkhar thawngzamhtu, Barak Barfi nih cun Sotloff cu Pathian hrangah a martar, anunnak a hlan tiah a chim , aw chuak kho ve lomi pawl hrangah t'uammi asi, tiah ati. Arabic scholar, Barak Barfi nih cun IS bawi, Abu Bakr al-Baghdadi cu Islam cungcang i debate aneihpi nakah a co colh, "Ramadan hi zaangfahnak thla tiin a chim i, khawika dah na zaangfah nak cu?" tiin, Pathian nih cun rapthlak tuk i midang a dohtu pawl cu zeitik hmanhah a dawbal hna lo, tiah ati.
No comments:
Post a Comment