LOMHNAK BIACHIM "HUHAM"

Bible Cangthim: (1 Thessalonian 5:16-18)

Vawlei cung mi vialte   a tlangpi nih hin cun  lunglomh nak bia chim thim lotu hi kan mah le tawk cio cun kan um lai lo dah tiah ka ruah. Curuangah lomhnak bia chim timi “ HOLH FANG” te hi a nung  PATHIAN zumtu lawng nih kan hman mi le kan holh mi lawng arak si  loin, zum lo tu zong nih an rak hman cio mi holhfang arak si ve,  atamdeuh lebang hna ah hin cun,  a kan mah zumtu nak hmanh in zumlo tuk pawl nih hin an hman tam deuh tawn rua tiah ka ruah, angai te tiah cun zumtu timi le “Lomhnak biachim” timi hi ai ai peh khi asi, zumtu cu lomhnak cang thiamtu siding hi kan si hrimhrim, cucu Kan Bawipa Jesuh Khrih nih a kan cawnpiak mi zong asi fawn.

 Asinain kan nih nih cun kan duhthusam atlin tik lawng ah si maw, kan duhmi kan ngah, kan neih lawngah si maw, lomhnak chim kan thiam, kan hmangm, kan sungh kan zatlak, kan i tinh ning bantuk in kan cungah avan phanh lo tikah khawika lomhnak bia chim cu hla, a theih in kan thei tilo, kan theih zongah  kan chim kho lo. Kan theih ding mi cu kan nih zumtu pawl  atheih cu chim loin a nun i kan i nunpi ding mi hi asi. Curuangah PAUL nih  a chim mi cu, “ A zungzal in i lawm uh, a zungzal in thlacam uh”, tiah kan hmuh. (1 Thes 5: 16-18). Cucu Bawipa nih kan nih zumtu mihna kan tuah ding i a kan forh mi zong asi.

Bawipa kan Pathian sinah  lomhnak bia chimnak ah  huham cahnak, t’hawnnak ngainai a um ti a theitu zumtu hi kan tlawmtuk hringhren, zeizong vialte ruangah lomhnak bia Bawipa sinah kan chim thiam khawh nak hnga atang lei  atanglei bantuk thlawchuah donnak asi zia van zoh hna u sih.

1).Lomhnak bia kan chim ruangah kan comi thlawchuah nih kan lung akan lomh ter

Nifa tinte kan co mi thlawchuah cungah kan i lomh khawh loah cun zeitin dah kan t’hancho khawh lai??  kan neih mi le kan doncia mi asunlawi zia kan theihthiam lo i, kan neih rih lo mi lei tu kan ruah lengmang ah cun zeitik hmanh ah lomhnak cang kan thiam kho lai lo.Asinain Bawipa nih thlawchuah a kan pek mi pawl hi, co dingin kai tlak hrim lo ti’n kan mah le kan mah kan i theihthiam khawh asiah cun cuthil pawl keimah tein ka tuah kho lo, ka um ter kho lo ti fiang tein kan theih khawh lai. Cutikah thlawchuah relcawk lo an kan petu,  Bawipa dawtnak  athuhzia kha kan theih khawh lai i, lomhnak bia kan chim khawh lai. 

Kan ei-mi zanriah hi mirum pa zanriah he ka tah ah cun zeihmanh asilo kho men, zeihmanh lote zong ava si ko men la, asinain zanriah ei-ding nei lo midang tampi an um ti na ruah t’han ah cun lunglomh nak chim lo in na um kho hrimhrim lai lo.Sam cat’ial chungah kan hmuh mi cu, sam cat’ialtu pawl nih nitin an tonmi cungah Pathian sin i lomhnak bia chim a herh zia a kan cawnpiak mi kan hmuh khawh. PAUL zong nih , “Kan Bawipa Jesuh Khrih min in zeizong kip caah Pathian cu lawm u”, tiah a kan forh t’hiamt’hiam fawn.(Efis.5:20).

2).Lomhnak biachim ruangah lung retheihnak le ttihnak lak in humhminak a um

Tihphan nak le lung retheih , vansan nak pawl hi kan nunnak caah (poison) he a khat mi tihnunza ralpawl an si. Kanthlarau a kan chiatchuah hlei ah kan taksa thlarau zong a kan zorter fawn.Lung retheihnak  thinlung nih kan taksa akan chithcuah pinahg pawpi dam lonak, zawtnak, lung zawtnak le a dang thinlung lei  zawtnak aphunphun a chuahter fawn tihi mifim pawl nih a hmuh chuahmi zong asi. Lung rethei nih zeihmanh thathnem nak anei lo. 

Curuangah Jesuh nih, “Hi thil hna cu Pathian bialo  mihna nih an lung re an i theihpi zungzal mi pei asi cu, vancung khua a ummi nan Pa nih hi thil vialte cu nan herhdih hna ti cu a hngalh ko” (Matt 6:31-33) tiin kan nih zumtu mihna nih kan nunnak ah kan i ukter dingmi thil an silo zia fiang tein a kan chimh than.Kan thinlung kan nunnak nih Pathian thatnak kan tep ngah i, cabang lo i lunglomhnak bia kan chim asiah cun, Cung Pathian sin in, dongh athiam tilo mi thinlung hnangam, deihnak in kan thinlung cu akan tuam piak lai. Cuticun lomhnak bia kan chimkhawh zungzal lai i, lung rethieh le tihphannak vialte cu kan thinlung chung, kan nunak ah siseh, hnahnohnak a kan pekho tilai lo.

3).Lomhnak bia kan chim ruangah cahank kan nei

A nung Pathian a zumtu taktak tu nih cun nifa tinte ahmuhton mi thil vialte cungah lomhnak bia chim lo in a um siang bal lo. Cu lomhnak cu Pathian pekmi lomhnak asi i, cahnak zong a si fawn.(Neh 8:10). Khrih Jesuh chung i Bawipa nih a pek mi lunglomh nak cu ahman mi le atlamtling mi asi caah zungzal in a hmun. Pathian fale pawl cu harsatnak, retheihnak, lungretheihnak, sualforhnak le tihphan nak vialte in lak in kan luat hlei lo. Acan le bangah hin cun zumlotu hna nak hmanh hin kan ton hlei cuang can a um kho men. Asinain kan Bawipa Jesuh nih, “Nannih nih keimah he nan i pehnak thawngin lungdaihnak nan hmuh nak hnga, hihi kan chimh hna, vawlei nih harnak an pek hn lai. sihmanhsehlaw tihhlah u. Vawlei cu ka tei cang,” tiah ati. Cucu zumtu nang le kei hrangah kan cahnak , kan thawnnak a rak si.

“Bawipa chung i nun nunnak ah khan i lawm zungzal ko u ti kan duh hna, i lawm ko u tiah kan nolh than rih ko lai”(Fil.4:4) tiah zumtu pawl thazang pe in ca a tial lioah PAUL hi Rom thawnginn chungah harsat nak le beidong vansangin a um lio asi. Sihmanhseh law, harsatnak, beidonghnak le khuaruahhar vansan nak a um cuahmah lio i, lomhnak bia  a chim khawh hi, “Khristian pawl kan zumhnak” langhter nak caah asi.

Bia donghnak:

Curuangah lunglomhnak bia kan chim tikah kaa lawng i chim le relmen  ding asilo i, kan nunnak taktak in kan langhter ding hi asi. Cuticun Bawipa Pahthian cu i rinchan in lomhnak bia cu kan chimkhawh zungzal lai. Harsatnak, beidonghnak, lung retheihnak , beidonghnak kan tonmi vialte cu kan hrangah thazang kan laknak dingah acan ter than lai.( Isai 40:31). Nitin tein lunglom tein kan um kho lai. Sam catialtu nih cun, “Maw ka nunnak Bawipa cu thangthat tuah, ka chung i um vilate hna a minthianghlim cu thangthat tuah uh. Maw ka nunnak Bawipa  cu thangthat tuah, athatnak vialte cu philh hlah,” (Sam 103:2) ati.

Nangteh zeibantuk zumtu dah na si ve, lomhnak cang thiamtu zumtu na si maw?? Sam catialtu nih  achim bangin kan cung i Bawipa athatnak vialte hi philh hlah u sih.

. 

BAWIPA NIH IN THLAWCHUAH KO SEH.