Kan lairamah Pathian Thawngṭhabia aphak hnu kum 100 kan lonh cang i, kan Christian sinak kum 100 atling cang fawn. Hlan lio i kan nih laimi hna nih kan i uan bikmi le kan chim uarbik mi cu zeidah asi kan ti asiah cun miphun dang lakah zumhtlak kan sinak nunte hi malo in kan i uan ngaimi le kan chim uar tuk mi arak si tawn. Hlan lio i kan laimi pawl cu an nunning a rakhman, arak diktuk, athianghlimtuk, zohchunh atlak mi, hrawkhrawl chinhmangmi an asi lo,misawisel zong hmang lomi tiah miphun dangnih theih mi kan rak si tawn. Curuangah kan laimi chinchiahnak ah “VAKOK” hi cuanter arak si.
Asiah cun atu Khristian kan si hnu kum 100 a tling cang hnuah zeibantuk dinhmun ah dah kan um? Miphun dang pawl nih te zumhtlak ah akan hmu rih maw tuni ah teh? Kan theih cio bantuk in tuchun ah kan nih laimi pawl hi khawika hmun zongah siseh zeibantuk miphun hmanh nih zumhtlak ah a kan hmu kho tilo. Hi poi ka ti tuk mi asi. Thawngṭhabia chungah kan lut deuhdeuh, kan pil deuhdeuh kan tinain hrawkhrawl chim le misawiseltu duh chinchin tu khi kan lo. Pahtian fa ka si, kan hei tiko nain sehtan fa lehlam maw kan rak si ziar!! Kan ram kan miphun zia le nunning hi hrawkhrawl chimnak le lihchimh nak in akhat dih cang, tihi kan hmuh le kan theih cio mi asi ko. Zeitin dah na ruah ve na thinlungah zeidah a um ve poi hi na ti ve lo maw??
Cucu zeiruangah dah asi hnga tiah na ruah ve?? Nun tel lo i hmurka lawng (Chungthu lengnal ) mi piangthar kan tamtuk caah asi. Bible chungah hrawkhrawl chim hmaisabik mi cu setan asi tiah a um.(Gen 3:13). Setan cu hrawkhrawl bawibik asi. Curuangah kan Bawipa Jesuh Khrih nih hrawkhrawl chim hmangmi pawl sinah, “Nannih cu setan nanpa i fale pawl nan si...” (John 8:44) tiah ati. Ṭhate kan ruah asiah cun hrawkhrawl chim, dehnak hman, lihchim, mirelchiat hmannak hin kan mah le kan mah zong kan lungre an akan theihter tawn. Nikhat khat ah alang ṭhan lai i, kan tuar ṭhan ṭhiamṭhiam telai ti thinphangin a kan um ter. Biahman cu kumkhua in anung zungzal (Phung 12:19) a ti. Cupin ah, “ A hmanlo mi theihpi tu cu hremnak in a luat lai lo, hrawkhrawl achimtu cu athi lai,” ti kan hmuh (Phung 19:9).
Hrawkhrawl, lih chim le mi relchiat hi mi zeipoh nih olsam tein kan hman tawn mi holhfang asi. Zei ah kan hei rel lem hoi lo. Pastor siseh, hruaitu saya seiseh, chawlet mi le cozah rianṭuantu cheukhat le bang nih hin cun chim le rel le hman anuam khun ati ko mi khi kan lo. Nuam hna khi kan va ti hoi ngai cu aw!! A hman lo mi cungah kan mah ruahnak bantuk in chim le rel hi thawngai kan vai thei hoi tawn.Cubantuk kan chim le olthadak in kan olhṭheu ruangah hin midang hrangah zeitluk lungfahnak , ngahchiatnak zeibantuk dah a cunngah aphan tihna aruah nak cang le kan thei fawn tawn lo. Kan “lei” hi kan i ralring tawn lo kan thlahdah tuk tawn hi hi apoituk hringhren. Kan “lei” hi fate asiko nain mihrangah thihnak tiang in thihnak tiang a phakter khotu asi.(James 3:1-12). Kan lai holh tahṭhimhnak ah “ Holhkam ṭha nih siapi aman” ti kha kan theih zungzal awk a herh ngai mi asi.
Holkam i ralring loin a hman lomi hrawkhrawl chimnak ruangah thihnak tiang aphakpi. Khua pakhatah hin nu le pa nei lomi ngakṭah unau hnih te hi an um i, a ṭapa cu kutke ṭhalo mi a si ti asi, a Unu nih cun an i cawmnak dingah tiin dawrah lian nawn mi pakhat ah hin rian cu ava ṭuan ti asi, voikhat cu a unu cu a rianṭuan nak ah ruahlo piin adam lo i a tlu i cuticun rian zong ṭuan kho lo cun cuticun a um ti asi. Cuticun a rianhawi le nih cun innah an van tlunpi ti asi. Midang pawl nih cun bia fiangte thei hmaisa loin heh tiah a unu cu an relchiat i sual an puh ti asi. Cubia aṭpa nih atheih tikah cun aning azaktuk i zeihmanh ruah kho ti loin amah le amah ai awkthat ti asi. Cubantuk thawngpang a ṭapa nih atheih tikah cun a unu zong cu ai tuar lo i ai that ve ti asi.
Cu unau hnihte ruakvui nak ahcun khawmhnak cantawi an van hmang tikah an Pastor pa nih cun hitihin bia a van chim, "Vancungah BAWIPA nih khuika ah dah na tuu pawl teh an um aka tiah cun, Bawipa tuu pakhat hmanh ka neih ṭung lo, canghngia rual lawnglawng ka neih hna,” tiah ka leh lai tiah ati ti asi.
Curuangah cun zumtu u le nau, kan nun ziaza le kan nunning hi tuu rual bantuk maw kan si? Cinghngia bantuk dah kan si? Bawipa nih duh lomi hrawkhrawl chim, lih chim le mi relchiat hman hi kan ramah a ciah in a kan ciah thlu cang. Hrawkhrawl kan chim, lih kan chim le mi kan sawisel ruangah kan hrangah zeidah kan i hlawkpi, kan ṭhathnem a um? Nawlbia pahra chungah, “ Amhman loin midang sualnak puh hlah,” (Exo 20:16) tiah a um. Ṭhatlo nak nih kan uk ti hlah seh, ṭhatlonak kha ṭhatnak in teikhawh i zuam u sih(Rom 12:21).
Kan ram, kan miphun nih rinchan tlak kan sinak le bochan tlak kan sinak hi lak kirṭhan hi i zuam ṭhan u sih. Bawipa hmaiah i chir ṭhan i thinlung chung muril taktak he kan nun i hlan ṭhan hna u sih. Kan ram, kan miphun lakah Bawipa nih sunlawinak coṭhan ko seh...........
No comments:
Post a Comment