NGAIHCHIA THINNAU IN NA UM MAW??? ( 1 JOHN 4:16 )

Hawidang bantukin thinlung hnemtu, dawtu na tong bal ve maw? Micheu cu an dawttukmi an samthlairemte he lung diriam tein tikcu le caan an hman lioah, lungkuai mitthli he daikilkawm teah thinnau in na relh sual maw? Lenrual hawi le chungkhat salawh rualchan zong nih theihpiak loin lungleng sivang, beidongin na caan na hmang maw, asiloah na dawttukmi na tlangval/ngaknu he tluang dangdang ah khuasami nan si maw?

Lungleng in na um zungzal lai maw?

Dawtnak hi hopoh nih kan duh cio mi asi, dawtmi neih zong kan duh cio, cucu ahmanmi asi, thilsual zong asi fawn lo. Asinain, dawtnak tlamtling le dawtkhawhnak taktak thazaang cu Bawipa sin lawngin ara. Adawtnak le zaangfahnak nih an zelh zungzal, aven zungzal fawn. Na ruahnak vialte na lunglennak vialte, nemtu nei lobantuk i nai ruahnak vialte zong kha alaktein an pekhotu, an theihpiaktuk,na zawn an ruat zungzaltu Bawipa na sinah a um zungzal ti kha ka van chim duh, cucu fiangtein Bible nih akan chimhmi cu Pathian cu dawtnak le Sersiamtu Pathian asi, adawtnak sunglawutukmi zong cu kan nunah alaktein akan pek vet than tiah (1 John 4:16 ) ah kan hmuh khawh. Cucun  Bawipa cu kan dawt zeiruangah Amah nih a kan dawt hmaisa caah asi tiah (1John 4:19) kan hmuh khawh tthan. 

Asinain nahawl tawnmi, na hngah tawnmi le na beisei tawnmi dawtnak cu na ton lo caanah, na hmuh ve lo caanah zeitin dah na um?

Kan nun chungril lawnghuam i a ummi hnawhkhahnak ding caah tiin mi pakhatkhat hi ahopoh nih kan herh cio tawn, cucu minung phung asi ko. Cu kan khawlmi nu/pa maw va si hnaseh, kan thinlung chung i kan saduhthah (desire) ngaingaimi dawtnak taktak cu lungsitein, diriamtein cupawl nihcun akan pe kho hlei  cuang loh. Zeiruangah ti ahcun  minung ṭhiamṭhiam an si ve ruangah asi, dawtnak taktak timi hi minung nihcun i pekkhawh timi hi a um loh. Achan cu, cu dawtnak cu miṭhep karah an ziam kho mi an si. Kan saduhthah taktak cu minung dawtnak menmen nakin athukhleimi--- kan thlarau nun tiangin akan chunhpenh, akan virhkawih  dih khotu, kan thinlung hmunruak, hmunlawng, kan herh taktakmi dawtnak tlamtling cu Bawipa dawtnak lawng hi asi. Amah he i pehtlai dingin sersiam mi kan si ruangah amah he kan i pehtlaih lo asi ahcun chambaunak he kan khat ko lai.( we’re incomplete). 

Bawipa nihcun akan dawt, cu lawng siloin amah dawtve  khawhnak thazaang zong akan pek chih ve, asinain cucu nangmah cungah ai hngat ve. Cudawtnak dongh athiam lomi Khrih dawtnak sunglawi nanun ah na tep cang maw? Na tep rih lo zong asi kho men, kan minung tisa dawtnak, kan i pek tawnmi nak cun kan thinlung kan zeizong vialte akan theifiangbiktu Cung Pathian dawtnak hi na neih asi ahcun na buainak vialte, na lunglennak vialte na retheihnak vialte cu an lo dih lai. Cucun hi vawleimi nih an in hnawl hmanah (HOILOPAR BAWI JESUH) sinah hnangam tein nai din kho cang lai.