PIANTHARNAK TI UM ZIA CU ZIANG MI A SI PEI??

Tlangval pakhat hi thawng atla ih, cumi thawnginn sungih atla ve mi, midang pawl cun,  lungawi hnisiamsi tein an rak wellcome t’ha nasa. Cui thawnginn sungih tlanlen le khawsak cu nuam atituk ruangah thawngtla e tilawn, suah khal nuam a tituk ah suah khal a paih nawn lo ti asi. A duhmi hmuahhmuah le a cak zawng  hmuahhmuah an tuahsak t’heu ih cutin nitin nuamawk zet le lungsi zet in a nitin caan cu a hmang liam t’heu ti asi. Hiangpawl an lungawinak le nuam an tibik nak  asanbik ih an ruah mi cu ziangsi asi telen, hi mi thawnginn ih tangmi pawl hi  an duhduh ih nun, tlanlen theih  le zovek mi va t’ih le va hmaisong  um loih nuamtawl ih an duhduh tuah thei ih an um hi a sibik  ko ti’n an hmu. T’henkhat in le Sex an hmang, t’henkhat  pawl len rittheih thil an duhduh, an cak hmuahhmuah an tuah thei fawn. Nuamcennak hmunpi tisehla a sual lo ding. 

 T’umkhat cu thawnginn vengtu pakaht cun, “ thawnginn sungih  sual aphunphun an ti nasa letuk ruangah, an nunnak a siatsuah thluh hlanah  hi thawnginn ihsin suah zalen an t’ul, an mamawh asi hi” tiah thawngtla pawl suah zalennak dar a vun tum. Cutin thawnginn saangkapi cu a vun hawnsak hai, t’henkhat pawl cun saangkapi lam panin suah zai an rel rero,  asinan thlagval pakhat thawnginn sungih nuamtawl rero, nuam cen rerotu cun thawngin ihsin suak thei lo dingah a ruat aw,  thawnginn saangkapi ongaw cu azoh ih a zumthei cuang lo, “ suak khal sehla in kai thotho ding” ti’n thawnginn saangka kiltu hnen ahcun a thinlung, aruahnak a hngatngam taktak thei lo asi.

Thawnginn saangka kiltu cun, “Tlangvalpa, thawnginn saangka hi on asi e, zokhal a duhtu pohpoh cun hi thawnginn sung,  sual rawngbawlnak hmun ihsin suah theih asi. Na thubuai hmuahhmuah kha siatbal in/ malh in a a um thluh zo asi. Na sualnak hmuahhmuah nawhreh thluh asi zo. Na sualnak hmuahhmuah kha ngaithiam na si zo ti na zum ngam ih, ka thusim mi na zum phawt asi ahcun thawnginn ahhin na tang nawn  lo ding. Saangkapi ongaw ahkhin suak thlang awle, tiin a sim phah rero. Asinan, tlangvalpa cu rinhlelhnak, nun cun anun a tuam t’heh ruangah thawnginn ihsin cun suak thei lo ding vekin a ruat aw ringring asi.

 Thawnginn ihsin suah ding cu thil harsazet mi thil ih aruat. Thawnginn sungah nuam citin hmuahhmuah tham in, nuam a tawl rero zo ruangah athlah thei lo, a nundan hmuahhmuah voilekhat ih tlengawk dingah a ruat aw, cumi cun thawnginn ihsin suah ding cu phurrit a pek belhsah sinsin asi.  Thawnginn vengtu cun, “Khati na umdan khan a tawk, ziang hman a t’ul lo, na umdan le na khuasak dan khal danglam awk tengteng thluh ding asi cuang lo. Ka thusim mihi zum awla, ka thu hi thlun mai aw, atlacop in nundan le khawsak dan cu na thiam ve mai ding. Thawnginn ihsin suah ruangah voilekhat ih nundan thlengawk a t’ul cuang lo pi. Na ruat thuk letuk asi kha. In zum awla, na lam cu ka lo khawhhmuh sak vivo ding” tiin a simbeet vivo hrih....

KAN THEIH DIGN LE KAN ZIR DIGN MI

Ka rual, tlangvalpa vek hi kan si ve lo maw??? Piantharnak hi thil harsa letuk le nundan hmuahhmuah thlengaw thluh hngal dingah na ruat ve t’heu maw? Cutivek ih thinlung pitu nasi pang ahcun piantharnak taktak ziangtik hmanah na co dah lo ding. Kan lei taksa duhzawng le cakzawng pawl hmuahhmuah fehsan/ tanta thluh hngal dingin ruahnak thinlung nei hlah.  Na pianthar ruangah khan nanun dan le na khawsak dan khan danglam thluh hngal dingin ruat hrimhrim hlah. Na hmaiah  saangka a ongaw ringring so khaw, rinhlelnak/ zumngamnak nei loin hmailam pantop mai aw. Hilei mawinak le nun diriamnak pawl hi thlahlel hrimhrim hlah, ziangah tilen mitt’hep karlak men ziamral thluh men ding leimawinak pawl hin kumkhua nunnak alo pethei silo. Na hmai saangka ongaw mi ahkhan luttop mai aw, t’ihhrimhrim hlah. Anihcu in tumcop Pathian asi kha aw. Anih cun na zalam cu alo khihhmuh sak vivo ding so khaw.

Na si dandan vek khan ngaithiam na si so khaw. Na tisual mipawl khal ngaithiam na si thluh zo so khaw. Tuah khan na hrangah saangka a  ongaw ringring so khaw. Saangka onnak lam cu pan mai aw, cui saangka feh dingin man a um lo, free thluh asi. Na hrangah saangka a ongaw ti na zumngam ih, hmailam panin ke na kar asi ahcun na thawngtlaknak hi leitlun ihsin suah zalen an si ve ding. Cemni nei lo kumkhua lungawinak hmun ih ceng rero tupawl  neihmi bangtuk nunthar nei dingah saangka na hrangah a ongaw ringring. Rinhlelnak tal loin A hnen pan awla, Anih cun na lamzin, na fehnak zalam alo hmuhsak vivo ding. AMEN