.jpg)
Peter nih cun ni dang i a tih zungzal mi le ṭuan zungzal tawn mi bantuk in Gennesaret tili ah nga tlai dingin sur a vorh ṭhan ti asi. Sur a vorh tinte in a hlawm lengmang fawn ṭung, hlawhcham laklawh hin tumruhnak a kan pek can hi a um ve, voikhat ṭhan seh, atu hi a donghnak siseh ti chim hna hi a rak olte. Peter zong nih hin a dongh siseh tiin zakua deiin a rak vorh zong asi kho men mi asi. Zan khuadei i vorh cangah cun tili chak le thlang, hnung le hmai, sir le kil vialte a hrawh dih ṭheu men lai dah nan ti ve maw??
*Zingkhua a hung ceu i, mi pakhat a hmuh bal lomi, a ho ti zong a theih lomi cu mipi nih tiruihmaih in avan zulh i, Peter lawng thengte ah cun a kai, mipi cu a cawnpiak hna. Cuti i a hmuh zong a hmuh bal lomi le a theih zong atheih bal lomi nih mipi a van cawnpiak lio ah cun Piter le a hawile pawl nih cun an hlawhchamnak sur cu thiangte in an suk i, an lawng i cuangmi Jesuh cawnpiak nak cu zeidah a chimh hna le a cawnpiak hna tizong cu zeihmanh a ngaiahsak lo. Piter nih cun zankhuadei i an hlawhchamnak bak zeihmanh hi aruatkho lo men lai dah tiah ka zumh. Thlawchuah petu nih hin a kakal tak le simen lai a?? Zei ah hme ka hlawhcham lengmang?? Zei ah hme ka ruah ning le kai timh ning hin asi khawh tawn lo?? Nga le kan tlaih khawh ṭung ne loah cun zeitin ah kan eiin ding ti le rawl kan i cawk kon ne lai aw?? Kan innchungkhar hrang i ka cawimi leiba kha, nga man i i rulh dingin kan i chim chawn ṭung, zeihmanh ka tlai fawn ṭung lo, zeitin dah kan rulh nen lai aw?? Hi bantuk biahal nak phunphun hi Peter thinlung i a ciahtu le a khatmi biahal nak asi ṭheu lai dah tiah zumh a um.
*Cuti i mah le mah i thiam lonak le beidong ngai i, a um lio ah cun a min Nazareth Jesuh an ti mi, hmuh zong a hmuh bal lomi nih cun, “ Ti thuhnak lei panh law, ngatlai ṭhan dingin na sur cu vorh ṭhan tuah” tiah a van ti. Hi Na Zareth Jesuh sinah hin Peter nih ahlawhcham thu le hla a chim fawn ṭung lo, zeitindah zanah ahlawhcham ti a theih?? Hmuh zong a hmuh bal lomi, theih zong atheih bal lomi bia cu zeitindah a ngaih khawh hnga?? Sur corhmi asi le silo zong athei fawn lo, eihawl nak i lo lotuk mi lak i (advice) van i pek i van zulh van tuah cu hruh thlaktak khi asi, thil ol cu asi bak lo. Perter nih hin zankhawdei in a ṭhuatneknek cang caah, tithuhnak siseh, aponhnak siseh, asir, akil akawi in a vorh thlu viar cang, nga a um lo ti a theih viar cang. Mipi heh ti i an i zit vutvut hnu le nitlang a vansan hnuah cun nga an ngam bal ti lo. Hi vialte hi ngatlaitu Peter nih a theih cikcek mi rian a si. RABBI zan khua in kan vorh viar cang sihmanhsehlaw Na nawl in sur ka van voth ṭhan lai seh tiah nawlnolh cun avan vorh ṭhan.
*Cutin Peter nih cun, Nazareth Jesuh bia cu apom i, Peter nih hin nga atlaih taktak hi a zum hrimhrim lai lo. Theihbal lomi nawl zulh cu ruahchan nak nung le zumhnak nung neih khawh cu thil harsa ngai asi ṭheu lai dah tiah ka zumh. Sihmanhsehlaw Peter nih a zumh le zumh lo lam pang si loin nawl pe tu cu lei le vancung vialte i nawlneitu asi caah asi deuh. Nawl a petu bia cu thilti kho asi caah Peter lei in rak i timhlamh ciammam arak herh lem lo, Peter nih a tiding mi cu nawl petu nawl pek ning bantuk te i tithuhnak leiah survorh kha asi ko a ti ding mi cu. Lawngzah i tihthuhnak lei i kal bal lo kha cu zeiti awk an theih kha ka zum lem lo kha lio ah khan cun, tithuhnak lei an kal i an sur an van vorh i an sur avan rih deuh hmanh ah khin a um ballai lo tibak lo kha cu Peter thinlungah zeihmanh khi a um bal lo.A sinain sur cu tithuhnak leiah an van vorh ṭhan zongah khan nga cu a um ballai lo tibakkha Peter thinlung kha si bal lai lo ti khi mithlamah a van cuang colh.
Asianin JESUH nawlbia bantuk te cun an sur cu lenglei ah an van hnuh i, tichung i sur a um cuahmah lioah cun an sur kha a rithrim lai lo, dimdoih lo ngai khin lengleiah cun taṭhutmat khin a van hnuh ṭheu lai tiah ka zumh, a zei nga cu maw kan tlaih lai, ti ruahnak kha Peter thinlung luahkhat tucu asi ṭhiamṭhiam ko lai ti cu theih cia asi ko. An sur, lenglei i duhsah te i an van hnuh tikah cun an sur cu a van rit chin lengmang cang ai, minung pakaht men nih hnuh le chuah khawh ding khi a siti lo. An hawi le an auh hna midang bomhnak in lenglei i avan hnuhchuah khawh hnu cun, nga lawngte nga lawngte, an tamtuk ruangah an sur tiangin aṭeṭ ti asi.
*Dawtmi unau, na thiltuah cuahmah miah khan na beidongin na hlawhcham sual maw?? Na theihnak lenglam ah midang theihnak tiang khan relfel(pi le) khawh nai tim tawn, lam dangdang na hawl tawn, asinain beidonnak le hlawhcham nak bak lo cu na lawh tawn lo ti ko?? Piter bantuk khan thadi le zaangba in an tuah na ṭuan tawn ko. Jesuh Khrih van le vawlei cungnung bik hin na hrangah lam dang an hawl piak khawh lo si loin, na hlawhcham tawnnak hmun thengte ah khan dakhaw A thiltihkhawh ṭhawnnak langhter ai timh tawn cu. Na zawtnak, Na eiin hawlnak, Na leibat mipawl siseh, Na innchungkhar, Na nupi/sal fanau pawl siseh, lam dangdang in na hlawhcham nak hmun thengte ah khan Jesuh Khrih kha ngaicang law, a bia cu vainam kap hnih harmi bantuk thiltikhawh ṭhawnnak in a khatmi asi tihi philh hlah. Jesuh Khrih nawlngai le a aw an ngaicang bute in hmailei ah ke na van kar ah cun A thiltikhawhnak cu na cungah langhter in a um lai.
*Jesuh nih dairih ko an ti ah cun daite in um ko, Jesuh nih ka caan aphan rih lo atiah cun hngak rih ko, Jesuh nih tuah kal chuak an tiah cun kal chuak ko. Nangmah ruahnak le nangmah ruahnak kha telrelh i tim peng hlah. Pathian bia na donkhawh nak hnga na thinlung innka tu kha rak hawn piak ko. Bawm kho li dingin Pathian kut cu tawiter asi lo i, na lung retheih vansan nak authawm thei lo kho lo dingin Pathian hna cu chetter asi lo. Beidong hrim hlah, Li thuknak lei cu panh law, ngatlai dingin Bawipa bia bantuk tein na sur cu vorh ṭhan ko.
BAWIPA NIH IN THLAWCHUAH KO SEH.....
No comments:
Post a Comment